ಚರಕಸಂಹಿತೆಯಲ್ಲಿ ಅಜೀರ್ಣ ಉಂಟಾಗಲು ಕಾರಣಗಳನ್ನು ಸರಳವಾಗಿ ಪ್ರತಿಪಾದಿಸಲಾಗಿದೆ. ಊಟವನ್ನು ಮಾಡದೆಯೇ ಇರುವುದರಿಂದ, ಅತಿಯಾದ ಪ್ರಮಾಣದಲ್ಲಿ ಆಗಾಗ ಭೋಜನ ಮಾಡುವುದರಿಂದ, ಒಮ್ಮೆ ಹೆಚ್ಚು ಮತ್ತೊಮ್ಮೆ ಕಡಿಮೆ ಪ್ರಮಾಣ ಹೀಗೆ ನಿಯಂತ್ರಣವಿಲ್ಲದೆ ಆಹಾರ ಸೇವಿಸುವುದರಿಂದ, ದೇಹಕ್ಕೆ ಒಗ್ಗದ ನಮಗೆ ಹಿತವಲ್ಲದ ಆಹಾರವನ್ನು ಸ್ವೀಕರಿಸುವುದರಿಂದ, ಜೀರ್ಣಕ್ಕೆ ಕಷ್ಟಕರವಾದ, ಆಹಾರ ತಯಾರಿಸಿ ಹೊತ್ತು ಕಳೆದು ತಣ್ಣಗಾಗಿರುವ, ಅತಿಯಾಗಿ ಒಣಗುಣಗಳನ್ನೇ ಹೊಂದಿರುವ ಆಹಾರ ದ್ರವ್ಯಗಳನ್ನು ತಿನ್ನುವುದರಿಂದ, ಹಳತಾಗಿರುವ ಹಳಸಿರುವ ಕಲುಷಿತ ಗೊಂಡ ದುಷ್ಟ ಭೋಜನದಿಂದ, ವಿರುದ್ಧಾಹಾರ ಸೇವನೆಯಿಂದ, ವಾಸಿ ಸುವ ಪ್ರದೇಶಕ್ಕೆ ಹೊಂದಿಕೊಳ್ಳದ, ನಾವಿರುವ ಭೂಭಾಗದ್ದಲ್ಲದ, ಹಸಿದಿರುವಾಗ ಸಮಯದ ನಿಯಮ ಅನುಸರಿಸದೆ ಸೇವಿಸಿದ, ಕಾಲಕ್ಕೆ ಅನುಗುಣವಾಗಿ ಬೆಳೆದಿರದ ಆಹಾರವಸ್ತುಗಳ ಸೇವನೆಯಿಂದ, ಮಲಮೂತ್ರವೇ ಮೊದಲಾದ ಶಾರೀರಿಕ ವೇಗಗಳನ್ನು ಸರಿಯಾಗಿ ನಿಭಾಯಿಸದೇ ತಡೆಹಿಡಿಯುವುದರಿಂದ, ಸರಿಯಾದ ಜೀರ್ಣಪ್ರಕ್ರಿಯೆಗೆ ಅತ್ಯವಶ್ಯಕವಾದ ಜಠರದಲ್ಲಿರುವ ಅಗ್ನಿಯು ದೂಷಣೆಗೊಳಗಾಗುತ್ತದೆ. ಇದರಿಂದಾಗಿ ಸೇವಿಸುವ ಆಹಾರವು ಸುಲಭವಾಗಿ ಜೀರ್ಣಗೊಳ್ಳುವ ಗುಣಧರ್ಮವನ್ನು ಹೊಂದಿದ್ದರೂ ಅಪಚನವಾಗಿ ಅನ್ನವು ವಿಷರೂಪವನ್ನು ಹೊಂದುತ್ತದೆ. ಅಜೀರ್ಣವು ಆಗಬಾರದೆಂದರೆ ಮೊದಲು ಮಾಡಬೇಕಾದ ಕೆಲಸವೆಂದರೆ ಇಂತಹ ದುರಭ್ಯಾಸಗಳನ್ನು ತ್ಯಜಿಸುವುದು.
