2014ರ ಡಿಸೆಂಬರ್ನಲ್ಲಿ ಭಾರತ ಪ್ರವಾಸಕ್ಕೆ ಆಗಮಿಸಿದ್ದ ಪುತಿನ್ ಬದಲಾಗಿರುವ ಭಾರತವನ್ನು ಕಂಡಿದ್ದಾರೆ ಮತ್ತು ಅಂತಾರಾಷ್ಟ್ರೀಯ ವಲಯದಲ್ಲಿ ಹೆಚ್ಚುತ್ತಿರುವ ಭಾರತದ ಪ್ರಾಮುಖ್ಯವನ್ನೂ ಗಮನಿಸಿದ್ದಾರೆ. ಹಾಗಾಗಿಯೇ, 2014ರಲ್ಲೇ ವಜ್ರ ಸಂಸ್ಕರಣೆ ಸೇರಿದಂತೆ 14 ದ್ವಿಪಕ್ಷೀಯ ಒಪ್ಪಂದಗಳು ಉಭಯ ರಾಷ್ಟ್ರಗಳ ನಡುವೆ ಏರ್ಪಟ್ಟಿದ್ದವು ಎಂಬುದು ಗಮನಾರ್ಹ. ಪ್ರಧಾನಿ ನರೇಂದ್ರ ಮೋದಿಯವರ ವರ್ಚಸ್ಸನ್ನು ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಕಂಡುಕೊಂಡಿರುವ ಪುತಿನ, ಆ ಕಾರಣಕ್ಕಾಗಿಯೇ ಭಾರತದ ಪ್ರಧಾನಿಯೊಂದಿಗೆ ಉತ್ತಮ ಸ್ನೇಹ ಹೊಂದಿದ್ದಾರೆ. ಆದರೆ, ಭಾರತವು ಅಮೆರಿಕದ ಆಪ್ತ ಮಿತ್ರರಾಷ್ಟ್ರ ಆಗಿರುವುದು ರಷ್ಯಾದ ಕಣ್ಣಿಗೆ ಕುಕ್ಕುತ್ತಿದೆ. ಅದೇ ರೀತಿ, ರಷ್ಯಾ ಚೀನಾಕ್ಕೆ ಹತ್ತಿರವಾಗುತ್ತಿರುವುದು ಕೂಡ ಭಾರತಕ್ಕೆ ಕೊಂಚ ಕಳವಳಕಾರಿ ಸಂಗತಿಯೇ. ಭಾರತದ ವಿದೇಶಾಂಗ ನೀತಿ ಈಗ ಬಲಿಷ್ಠಗೊಂಡಿದ್ದು, ಜಾಗತಿಕ ಪ್ರಮುಖ ರಾಷ್ಟ್ರಗಳೊಡನೆ ಬಾಂಧವ್ಯವೃದ್ಧಿ ಆಗಿದೆ ಮತ್ತು ಇದರಲ್ಲಿ ರಷ್ಯಾ ಕೂಡ ಹೊರತಾಗಿಲ್ಲ ಎಂಬುದು ಗೊತ್ತಿರುವಂಥದ್ದೇ. ಆದರೆ, ಪುತಿನ್ ಅಧಿಕಾರಾವಧಿ ವಿಸ್ತರಣೆಗೊಂಡಿರುವ ಪರಿಣಾಮ ಅಂತಾರಾಷ್ಟ್ರೀಯ ರಾಜನೀತಿಯ ಮೇಲೆ ಯಾವ ರೀತಿ ಪರಿಣಾಮ ಬೀರಲಿದೆ ಎಂಬುದನ್ನು ಕಾದು ನೋಡಬೇಕು.
