ಜೆರುಸಲೇಂ: ಭಾರತೀಯ ಯುವಕನೊಬ್ಬನನ್ನು ನೋಡಿ ಚೀನೀಯ ಎಂದು ಅರಚುತ್ತ, ಕರೋನಾ, ಕರೋನಾ ಎಂದು ಕೂಗುತ್ತ ಆತನ ಮೇಲೆ ಇಸ್ರೇಲಿಯನ್ನರು ಹಲ್ಲೆ ಮಾಡಿದ ಘಟನೆಯನ್ನು ಸ್ಥಳೀಯ ಮಾಧ್ಯಮಗಳು ಬಿತ್ತರಿಸಿದ್ದಾಗಿ ವರದಿಯಾಗಿದೆ.
ಇಸ್ರೇಲ್ನ ಟಿಬರಿಯಾಸ್ ಪಟ್ಟಣದಲ್ಲಿ ಈ ಘಟನೆ ನಡೆದಿದ್ದು, ಗಾಯಾಳು ಯುವಕನನ್ನು ಅಲ್ಲಿನ ಪೊರಿಯಾ ಆಸ್ಪತ್ರೆಗೆ ದಾಖಲಿಸಲಾಗಿದೆ. ದಾಳಿಗೊಳಗಾದ ಯುವಕ 28 ವರ್ಷದವನಾಗಿದ್ದು, ಅಮ್ ಶಲೇಮ್ ಸಿಂಗ್ಸನ್ ಎಂದು ಗುರುತಿಸಲಾಗಿದೆ. ಈತ ಬ್ನೇಯಿ ಮಿನಾಶೆ ಸಮುದಾಯಕ್ಕೆ ಸೇರಿದ್ದು, ಈಶಾನ್ಯ ರಾಜ್ಯದವನು ಎಂಬ ಮಾಹಿತಿಯನ್ನು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.
ಹಲ್ಲೆಕೋರರ ಪೈಕಿ ಇಬ್ಬರನ್ನು ಗುರುತಿಸಲಾಗಿದ್ದು, ಅವರ ಪತ್ತೆಗಾಗಿ ಪೊಲೀಸರು ಬಲೆಬೀಸಿದ್ದಾರೆ. ಈ ನಡುವೆ, ದಾಳಿಗೊಳಗಾದ ವ್ಯಕ್ತಿ ಹಲ್ಲೆಕೋರರಿಗೆ ತಾನು ಚೀನಿಯನಲ್ಲ ಎಂಬುದನ್ನುವಿವರಿಸುವ ಪ್ರಯತ್ನ ನಡೆಸಿದ್ದನಾದರೂ, ಅದು ಪ್ರಯೋಜನವಾಗಲಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.
ದಾಳಿಗೀಡಾದ ಸಿಂಗ್ಸನ್ ಮಾಲೊಟ್ ಪ್ರದೇಶದ ನಿವಾಸಿಯಾಗಿದ್ದು, ಭಾರತದಿಂದ ಇಸ್ರೇಲಿಗೆ ಕುಟುಂಬ ಸಮೇತ ಮೂರು ವರ್ಷಗಳ ಹಿಂದೆ ವಲಸೆ ಬಂದುದಾಗಿ ತಿಳಿಸಿದ್ದಾನೆ. ಈ ಹಲ್ಲೆಗೆ ಸಂಬಂಧಿಸಿ ಸಾಕ್ಷ್ಯಗಳು ಇಲ್ಲ. ಹೀಗಾಗಿ ಆ ಪ್ರದೇಶದ ಸಿಸಿಟಿವಿ ದೃಶ್ಯಗಳನ್ನು ಪಡೆಯಲು ಪೊಲೀಸರು ಪ್ರಯತ್ನಿಸುತ್ತಿರುವುದಾಗಿ ಮೂಲಗಳು ತಿಳಿಸಿವೆ. (ಏಜೆನ್ಸೀಸ್)