ಸಣ್ಣಪುಟ್ಟ ಕೆಲಸಗಳನ್ನು ತಂತ್ರಜ್ಞಾನದ ಬಲದಿಂದ ಮಾಡಲಾಗುತ್ತಿರುವ ಕಾಲವಿದು. ಅಲ್ಲದೆ, ಮಲಗುಂಡಿ, ಒಳಚರಂಡಿ ಸ್ವಚ್ಛತೆಗೆ ಸಾಕಷ್ಟು ಸುಧಾರಿತ ಯಂತ್ರಗಳು ಬಂದಿವೆ, ಅವುಗಳ ಬಳಕೆಯೂ ವ್ಯಾಪಕವಾಗುತ್ತಿದೆ. ಹೀಗಿರುವಾಗ ಹೊಸ ಚಿಂತನೆಗಳು ಅರಳಬೇಕಾದ ಶಾಲೆಯಲ್ಲಿಯೇ ವಿಕೃತ ಎನ್ನಿಸುವಂಥ ಕೃತ್ಯ ನಡೆದಿರುವುದು ನಾಚಿಕೆಗೇಡಿನ ಸಂಗತಿ. ಘಟನೆ ಕುರಿತಂತೆ ತನಿಖೆಗೆ ಆದೇಶಿಸಲಾಗಿದೆಯಾದರೂ, ಅದು ದಾರಿ ತಪ್ಪಬಾರದು. ರ್ತಾಕ ಅಂತ್ಯ ಕಂಡು, ತಪ್ಪಿತಸ್ಥರಿಗೆ ತಕ್ಕ ಶಿಕ್ಷೆಯಾಗಬೇಕು. ಇಲ್ಲಿ ವ್ಯವಸ್ಥೆಯ ವೈಫಲ್ಯವೂ ಅಷ್ಟೇ ಮುಖ್ಯ ಕಾರಣ. ಸ್ವಚ್ಛತೆಗೆ ಸಂಬಂಧಿಸಿದ ಯಂತ್ರಗಳು ಅಥವಾ ಉಪಕರಣಗಳು ಕೆಳಹಂತದವರೆಗೆ ತಲುಪುವುದೇ ಇಲ್ಲ. ಆಗ ಮಾನವಶಕ್ತಿಯ ಬಳಕೆ ಮಾಡಲಾಗುತ್ತದೆ. ಒಳಚರಂಡಿ ಮತ್ತು ಮಲಗುಂಡಿ ಸ್ವಚ್ಛತೆಗೆ ಮಾನವಶಕ್ತಿಯನ್ನು ಬಳಸದೆ, ಯಂತ್ರಗಳ ಮುಖೇನ ಕೆಲಸ ಮಾಡಿಸಿ ಎಂದು ನ್ಯಾಯಾಲಯಗಳು ಕೂಡ ಹಲವು ಸಂದರ್ಭಗಳಲ್ಲಿ ಹೇಳಿವೆ. ಆದರೆ, ಸಂಬಂಧಪಟ್ಟ ವ್ಯವಸ್ಥೆ ಎಚ್ಚೆತ್ತುಕೊಳ್ಳದಿರುವುದು ಶೋಚನೀಯ.
