ಷೇರು ಮಾರುಕಟ್ಟೆ ದಿನೇದಿನೆ ಹೊಸ ಎತ್ತರಕ್ಕೇರುತ್ತಿದ್ದು, ಈ ವೇಗ ಇತರ ದೇಶಗಳ ಅಚ್ಚರಿಗೆ ಕಾರಣವಾದರೆ, ನಮ್ಮ ದೇಶದಲ್ಲಿ ಬಂಡವಾಳ ಹೂಡಿಕೆಗೆ ಪೂರಕ ವಾತಾವರಣ ನಿರ್ವಣಗೊಳ್ಳುತ್ತಿದೆ. 2014ರಲ್ಲಿ, ಅಂದರೆ ನರೇಂದ್ರ ಮೋದಿ ಪ್ರಧಾನಿಯಾಗಿ ಅಧಿಕಾರಕ್ಕೆ ಬರುವ ಮೊದಲು 25 ಸಾವಿರ ಅಂಶಗಳ ಆಸುಪಾಸಿನಲ್ಲಿದ್ದ ಸೆನ್ಸೆಕ್ಸ್ 75 ಸಾವಿರ ಗಡಿ ದಾಟಿ ಈಗ ಹೊಸ ದಾಖಲೆಯನ್ನೇ ಬರೆದಿರುವುದು ಗಮನಾರ್ಹ. ಬಾಂಬೆ ಷೇರು ವಿನಿಮಯ ಕೇಂದ್ರದಲ್ಲಿ (ಬಿಎಸ್ಇ) ನೋಂದಣಿ ಆಗಿರುವ ಕಂಪನಿಗಳ ಮಾರುಕಟ್ಟೆ ಮೌಲ್ಯ 400 ಲಕ್ಷ ಕೋಟಿ ರೂಪಾಯಿ ದಾಟಿ ಹೊಸ ಮೈಲಿಗಲ್ಲನ್ನು ತಲುಪಿದೆ. ಇದಕ್ಕೆಲ್ಲ ಕಾರಣ, ಕಳೆದ 10 ವರ್ಷಗಳಲ್ಲಿ ಕೇಂದ್ರ ಸರ್ಕಾರದಿಂದ ದೊಡ್ಡ ಪ್ರಮಾಣದಲ್ಲಿ ನೀತಿ ಬದಲಾವಣೆ (ಪಾಲಿಸಿ ಶಿಫ್ಟ್) ಆಗದೇ ಇರುವುದು. ಸರ್ಕಾರದ ಸ್ಥಿರತೆ ಮತ್ತು ನೀತಿಗಳ ನಿರಂತರತೆ- ಇವು ಉದ್ಯಮಗಳಿಗೆ ಅತ್ಯಂತ ಮುಖ್ಯವಾಗಿ ಅಗತ್ಯವಿರುವ ಅಂಶಗಳು. ಹಾಗಾಗಿಯೇ, ಇಡೀ ಜಗತ್ತಿನ ಇತರ ದೇಶಗಳು ಆರ್ಥಿಕ ಹಿಂಜರಿತದತ್ತ ಸಾಗಿದ್ದರೆ, ಭಾರತ ಮಾತ್ರ ಆರ್ಥಿಕವಾಗಿ ಮುನ್ನಡೆಯುತ್ತಲೇ ಇದೆ.
