ಕರ್ನಾಟಕ ರಾಜ್ಯವನ್ನೇ ಉದಾಹರಣೆಯನ್ನಾಗಿ ತೆಗೆದುಕೊಳ್ಳಬಹುದಾದರೆ ಹಲವು ಸಹಕಾರಿ ಬ್ಯಾಂಕುಗಳ ದಿವಾಳಿಯಿಂದ ಸಾವಿರಾರು ಗ್ರಾಹಕರು ಸಂಕಷ್ಟಕ್ಕೆ ಸಿಲುಕಿದ ನಿದರ್ಶನಗಳಿವೆ. ಅಲ್ಪಸ್ವಲ್ಪ ಆದಾಯದಲ್ಲೇ ಉಳಿತಾಯ ಮಾಡಿ ಸಹಕಾರಿ ಬ್ಯಾಂಕುಗಳಲ್ಲಿ ಠೇವಣಿ ಇಟ್ಟ ಬಡ ಮತ್ತು ಮಧ್ಯಮ ವರ್ಗದ ಕುಟುಂಬಗಳು ಬ್ಯಾಂಕ್ಗಳ ದಿವಾಳಿಯಿಂದ ಕೌಟುಂಬಿಕ ಸಮಸ್ಯೆಗಳನ್ನು ಎದುರಿಸುತ್ತಿವೆ. ಮಕ್ಕಳ ಮದುವೆ, ಪುಟ್ಟ ಸೂರು ಮತ್ತಿತರ ಉದ್ದೇಶಗಳಿಗೆ ಉಳಿತಾಯ ಮಾಡಿ ಠೇವಣಿ ಇಟ್ಟಿದ್ದು, ದಿವಾಳಿಯಾದಾಗ ಠೇವಣಿದಾರರು ಆತ್ಮಹತ್ಯೆ ಮಾಡಿಕೊಂಡ ನಿದರ್ಶನಗಳಿಗೆ ಕೊರತೆ ಇಲ್ಲ. ಕೆಲವು ಹಿರಿಯ ನಾಗರಿಕರಂತೂ ಈ ಬ್ಯಾಂಕುಗಳ ಠೇವಣಿ ಬಡ್ಡಿಯನ್ನು ವೈದ್ಯಕೀಯ ಸವಲತ್ತಿಗೆ ಮೂಲವಾಗಿ ನಂಬಿದ್ದರು, ಇದೀಗ ಕೆಲವರು ತುತ್ತು ಅನ್ನಕ್ಕೂ ಪರದಾಡುವ ಸ್ಥಿತಿ ನಿರ್ಮಾಣವಾಗಿದೆ.
