ಕೆಲ ದಿನಗಳಿಂದ ಪಂಜಾಬಿನಲ್ಲಿ ನಡೆಯುತ್ತಿರುವ ಬೆಳವಣಿಗೆಗಳು ದೇಶ-ವಿದೇಶಗಳ ಗಮನ ಸೆಳೆಯುತ್ತಿವೆ. ಅಷ್ಟೇ ಅಲ್ಲ, ಖಲಿಸ್ತಾನ ಬೇಡಿಕೆ ಮತ್ತೆ ಮುನ್ನೆಲೆಗೆ ಬಂದು ಹಿಂಸಾತ್ಮಕವಾದೀತೇ ಎಂಬ ಕಳವಳವೂ ಶುರುವಾಗಿದೆ. ಹೀಗಾಗಿ ಪಂಜಾಬ್ ಮತ್ತು ಕೇಂದ್ರ ಸರ್ಕಾರಗಳು ಆರಂಭದಲ್ಲೇ ಬಿಗಿ ಕ್ರಮಗಳ ಮೂಲಕ ಪರಿಸ್ಥಿತಿ ಕೈಮೀರದಂತೆ ನೋಡಿಕೊಳ್ಳಬೇಕಿದೆ. ಖಲಿಸ್ತಾನ ಹೋರಾಟಗಾರ ಹಾಗೂ ವಾರಿಸ್ ದೇ ಪಂಜಾಬ್ ಸಂಘಟನೆಯ ಮುಖ್ಯಸ್ಥ ಅಮೃತ್ಪಾಲ್ ಸಿಂಗ್ ಎಂಬಾತನ ಸಹಚರನೊಬ್ಬನನ್ನು ಪ್ರಕರಣವೊಂದಕ್ಕೆ ಸಂಬಂಧಿಸಿ ಬಂಧಿಸಲು ಪೊಲೀಸರು ಹೋದಾಗ, ಬೆಂಬಲಿಗರು ಅಡ್ಡಿಪಡಿಸಿದ್ದಲ್ಲದೆ, ಕತ್ತಿ ಹಾಗೂ ಶಸ್ತ್ರಾಸ್ತ್ರಗಳನ್ನೂ ಝುಳಪಿಸಿದ್ದರು. ಆಗ ಪೊಲೀಸರು ಬರಿಗೈಲಿ ವಾಪಸಾಗಿದ್ದರು. ಭಾರತದಲ್ಲಿ ಖಲಿಸ್ತಾನ ಬೆಂಬಲಿಗರ ಮೇಲೆ ಕ್ರಮ ಖಂಡಿಸಿ, ನಂತರದಲ್ಲಿ ಲಂಡನ್ನಲ್ಲಿನ ಭಾರತೀಯ ರಾಯಭಾರ ಕಚೇರಿಯಲ್ಲಿನ ತ್ರಿವರ್ಣಧ್ವಜವನ್ನು ಖಲಿಸ್ತಾನ ಬೆಂಬಲಿಗರು ಕೆಳಗಿಳಿಸಿದ್ದರು. ತರುವಾಯ, ರಾಯಭಾರ ಕಚೇರಿ ಸಿಬ್ಬಂದಿ ಧ್ವಜವನ್ನು ಮರುಹಾರಿಸಿದರು.
