ಜೋಶಿಮಠವನ್ನು ಹಿಂದೂಗಳ ಪವಿತ್ರ ದೇವರು ಬದರಿನಾಥನ ‘ಚಳಿಗಾಲದ ಮನೆ’ ಎಂದೇ ಗುರುತಿಸಲಾಗುತ್ತದೆ. ಪ್ರಸಿದ್ಧ ಯಾತ್ರಾ ಸ್ಥಳಗಳಾದ ಬದರಿನಾಥ, ಔಲಿ, ಸಿಖ್ಖರ ಪವಿತ್ರ ಕ್ಷೇತ್ರ ಹೇಮಕುಂಡ್ ಸಾಹಿಬ್ಗೆ ಜೋಶಿಮಠವು ಹೆಬ್ಬಾಗಿಲು ಕೂಡ ಆಗಿದೆ. ಈ ಪ್ರದೇಶದಲ್ಲಿ ಅಭಿವೃದ್ಧಿ ಯೋಜನೆಗಳನ್ನು ರೂಪಿಸುವಾಗ ಮತ್ತು ಕಾರ್ಯಗತಗೊಳಿಸುವಾಗ ದುರ್ಬಲವಾದ ಹಿಮಾಲಯ ಪರ್ವತ ಶ್ರೇಣಿಗಳ ವ್ಯವಸ್ಥೆಯ ವಿಶಿಷ್ಟ, ನಿರ್ದಿಷ್ಟ ಗುಣಲಕ್ಷಣಗಳು ಮತ್ತು ವಿಲಕ್ಷಣತೆಯನ್ನು ಗುರುತಿಸಿ ಅದಕ್ಕನುಗುಣವಾಗಿ ಚಟುವಟಿಕೆ ಕೈಗೊಳ್ಳದ್ದು ಪ್ರಸ್ತುತ ಬಿಕ್ಕಟ್ಟಿಗೆ ಕಾರಣ ಎನ್ನಲಾಗಿದೆ. ಐದು ದಶಕಗಳ ಹಿಂದೆಯೇ ಸರ್ಕಾರವು ಆಗಿನ ಗರ್ವಾಲ್ ಕಮಿಷನರ್ ಮಹೇಶ್ ಚಂದ್ರ ಮಿಶ್ರಾ ಅಧ್ಯಕ್ಷತೆಯಲ್ಲಿ ಈ ಪ್ರದೇಶದಲ್ಲಿ ಭೂಮಿ ಕುಸಿತದ ಕಾರಣವನ್ನು ತನಿಖೆ ಮಾಡಲು ಸಮಿತಿ ರಚಿಸಿದಾಗಲೇ ಎಚ್ಚರಿಕೆಯ ಗಂಟೆಗಳು ಬಾರಿಸಲಾರಂಭಿಸಿದ್ದವು. ಈ ಸಮಿತಿಯು 1976ರಲ್ಲಿ ಸಲ್ಲಿಸಿದ ವರದಿಯಲ್ಲಿ ಜೋಶಿಮಠದಲ್ಲಿ ಪ್ರಮುಖ ನಿರ್ಮಾಣ ಕಾರ್ಯಗಳನ್ನು ಕೈಗೊಳ್ಳಬಾರದು. ಏಕೆಂದರೆ, ಹಿಮದ ಅವಶೇಷಗಳು ಸಂಗ್ರಹವಾಗುವ ಸ್ಥಳ ಇದಾಗಿದೆ ಎಂದು ಹೇಳಿತ್ತು. ನಂತರದ ಹಲವಾರು ಅಧ್ಯಯನಗಳು ಕೂಡ ಇದೇ ರೀತಿಯ ಕಾಳಜಿ ವ್ಯಕ್ತಪಡಿಸಿದ್ದವು. ಆದರೆ, ಇವುಗಳನ್ನು ಯೋಗ್ಯ ರೀತಿಯಲ್ಲಿ ಗಣನೆಗೆ ತೆಗೆದುಕೊಳ್ಳದೆ ಅಭಿವೃದ್ಧಿ ಕಾಮಗಾರಿ ಕೈಗೊಳ್ಳಲಾಗಿದೆ ಎಂಬ ಆರೋಪ ಈಗ ಕೇಳಿಬಂದಿದೆ.
