ಆರ್ಥಿಕ ಬೆಳವಣಿಗೆ ದರಗಳನ್ನು ಸಾಮಾನ್ಯವಾಗಿ ಎರಡು ರೀತಿಯಲ್ಲಿ ಅಳೆಯಲಾಗುತ್ತದೆ. ಮೊದಲನೆಯದ್ದು ನಾಮಮಾತ್ರದ ಪರಿಭಾಷೆಯಲ್ಲಿ, ಅಂದರೆ ಹಿಂದಿನ ಹಾಗೂ ಪ್ರಸ್ತುತ ದರದ ನೇರ ವ್ಯತ್ಯಾಸವಾಗಿರುತ್ತದೆ. ಎರಡನೆಯದ್ದು ನೈಜ ಮೌಲ್ಯದ್ದಾಗಿರುತ್ತದೆ. ಅಂದರೆ, ಬೆಲೆಯೇರಿಕೆಯ ಅಂಶವನ್ನು ಪರಿಗಣನೆಗೆ ತೆಗೆದುಕೊಂಡು ಬೆಳವಣಿಗೆ ದರವನ್ನು ನೈಜ ಪರಿಭಾಷೆಯಲ್ಲಿ ಲೆಕ್ಕಹಾಕಲಾಗುತ್ತದೆ. ಈ ರೀತಿ ನೈಜ ಮೌಲ್ಯದಲ್ಲಿ ತಲಾದಾಯವು ಕಳೆದ ಎಂಟು ವರ್ಷಗಳಲ್ಲಿ ಶೇ. 35ರಷ್ಟು ಹೆಚ್ಚಳ ಕಂಡಿದೆ. ಇನ್ನು ಭಾರತಕ್ಕೆ ಹೋಲಿಸಿದರೆ ಕರ್ನಾಟಕ ಜನರ ತಲಾದಾಯ ಸಾಕಷ್ಟು ಹೆಚ್ಚು ಇದೆ. 2021-21ನೇ ಸಾಲಿನಲ್ಲಿ 2,65,623 ರೂಪಾಯಿ ಇದ್ದರೆ, 2023-24ನೇ ಸಾಲಿನಲ್ಲಿ 3,01,673ಕ್ಕೆ ಹೆಚ್ಚಳವಾಗುವ ನಿರೀಕ್ಷೆ ಇದೆ. ಕೋವಿಡ್ ಸಾಂಕ್ರಾಮಿಕ ಕಾಡಿದ ಎರಡು ವರ್ಷಗಳಲ್ಲಿ ಆರ್ಥಿಕ ಬೆಳವಣಿಗೆಗೆ ವ್ಯಾಪಕ ಅಡಚಣೆ ಉಂಟಾದ ಪರಿಣಾಮ ತಲಾದಾಯವು ಸಾಕಷ್ಟು ಕುಸಿತ ಕಂಡಿತು. ನಂತರ 2021-22 ಮತ್ತು 2022-23ರಲ್ಲಿ ಆರ್ಥಿಕ ಬೆಳವಣಿಗೆಯು ಚೇತರಿಕೆಯತ್ತ ಸಾಗಿತು. ಈ ಎಲ್ಲ ಸಂಗತಿಗಳನ್ನು ಪರಿಗಣನೆಗೆ ತೆಗೆದುಕೊಂಡರೆ ವಾಸ್ತವ ತಲಾದಾಯದ ಶೇ. 35ರಷ್ಟ ಏರಿಕೆಯು ಸಾಕಷ್ಟು ಸಮಾಧಾನ ಮೂಡಿಸುವಂತಿದೆ.
