ಮೇಲ್ಮನೆ ಕಾದಾಟ, ಜಗಜಟ್ಟಿಗಳ ಮೇಲಾಟ!; ಬೆಂಬಲಿಗರನ್ನು ಗೆಲುವಿನ ದಡ ಸೇರಿಸಲು ಹೋರಾಟ; ವಿಧಾನಪರಿಷತ್ ಚುನಾವಣೆ ಪರೀಕ್ಷೆ

ಬೆಂಗಳೂರು: ಹಿರಿಯರ ಮನೆ ಎನಿಸಿಕೊಂಡ ವಿಧಾನಪರಿಷತ್​ನ ಶೇ.33 ಸ್ಥಾನಗಳಿಗೆ ನಡೆಯುತ್ತಿರುವ ಚುನಾವಣೆ ರಾಜಕೀಯ ಪಕ್ಷಗಳ ಮಹಾ ಕಾದಾಟಕ್ಕೆ ಸಾಕ್ಷಿಯಾಗುವ ಎಲ್ಲ ಲಕ್ಷಣ ಗೋಚರಿಸುತ್ತಿದೆ. ಚುನಾವಣೆ ಪ್ರಕ್ರಿಯೆಯ ಒಂದು ಹಂತ ಮುಗಿದಿದ್ದು, ನಾಮಪತ್ರ ಸಲ್ಲಿಸಿರುವ ಅಭ್ಯರ್ಥಿಗಳು ಈಗ ತಮ್ಮ ವ್ಯಾಪ್ತಿಯ ನಿರ್ದಿಷ್ಟ ಮತದಾರರನ್ನು ಓಲೈಸಿಕೊಳ್ಳುವ ಕಸರತ್ತಿಗೆ ಕೈಹಾಕಿದ್ದಾರೆ. ಈ ಚುನಾವಣೆ ಜಾತಿ ಲೆಕ್ಕಾಚಾರ, ಪ್ರಭಾವ, ಹಿರಿತನಕ್ಕಿಂತ ಮುಖ್ಯವಾಗಿ ಹಣಬಲದ ಮೇಲೆ ನಡೆಯುತ್ತಿರುವುದೆಂಬುದು ಸರ್ವವಿಧಿತ. ಈ ನಡುವೆಯೂ ಪ್ರಭಾವಿ ಎನಿಸಿಕೊಂಡು ಪ್ರಮುಖ ನಾಯಕರು ಕಣಕ್ಕೆ ಧುಮುಕಿದ್ದು, ಜಿಲ್ಲಾವಾರು ಪ್ರಚಾರದಲ್ಲಿ ತೊಡಗಿದ್ದಾರೆ. ಡಿ.10ರಂದು ಮತದಾನ ನಡೆಯುತ್ತಿದ್ದು, ಇನ್ನುಳಿದ 16 ದಿನಗಳಲ್ಲಿ ಮತದಾರರೆನಿಸಿಕೊಂಡ ಜನಪ್ರತಿನಿಧಿಗಳನ್ನು ಸೆಳೆಯಲು ಮೂರೂ ಪಕ್ಷಗಳಲ್ಲಿ ರೂಪುರೇಷೆ ಸಿದ್ಧವಾಗಿದೆ.

ಮಾಜಿ ಸಿಎಂಗಳ ಮೇಲುಗೈ: ಇನ್ನೊಂದು ಪ್ರಮುಖ ಸಂಗತಿಯೆಂದರೆ, ಮಾಜಿ ಮುಖ್ಯಮಂತ್ರಿಗಳಿಬ್ಬರು ತಮ್ಮವರನ್ನು ಗೆಲ್ಲಿಸಿಕೊಳ್ಳಲು ಕಾಲಿಗೆ ಚಕ್ರ ಕಟ್ಟಿಕೊಂಡವರಂತೆ ರಾಜ್ಯ ತಿರುಗುತ್ತಿದ್ದಾರೆ. ಬಿ.ಎಸ್.ಯಡಿಯೂರಪ್ಪ ತಮ್ಮ ಆಪ್ತರೆನಿಸಿಕೊಂಡ ಏಳು ಮಂದಿಗೆ ಟಿಕೆಟ್ ಕೊಡಿಸಿದ್ದಾರೆ. ಅವರನ್ನು ಗೆಲ್ಲಿಸಿಕೊಂಡು ಬರುವ ಹೊಣೆಗಾರಿಕೆ ಇದೆ. ಆದೇ ರೀತಿ ಕಾಂಗ್ರೆಸ್ ಪಾಳಯದಲ್ಲೂ ಇದೇ ಪರಿಸ್ಥಿತಿ ಇದ್ದು, ವಿಧಾನಸಭೆ ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ತಮ್ಮ ಎಂಟು ಬೆಂಬಲಿಗರಿಗೆ ಟಿಕೆಟ್ ಕೊಡಿಸುವಲ್ಲಿ ಸಫಲರಾಗಿದ್ದಾರೆ. ಟಿಕೆಟ್ ಕೊಡಿಸಿದ್ದಷ್ಟೇ ಅಲ್ಲದೆ, ಅವರನ್ನು ಗೆಲ್ಲಿಸಿಕೊಂಡು ಬರುವ ಮೂಲಕ ಪಕ್ಷದ ಹೈಕಮಾಂಡ್ ಮುಂದೆ ಈಗಲೂ ತಾವೆಷ್ಟು ಪರಿಣಾಮಕಾರಿ ಎಂದು ತೋರಿಸುವ ಅನಿವಾರ್ಯತೆ ಇದೆ. ಇದೇ ರೀತಿಯಲ್ಲಿ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್, ಮಲ್ಲಿಕಾರ್ಜುನ ಖರ್ಗೆ, ಜಗದೀಶ ಶೆಟ್ಟರ್ ಸೇರಿ ಇನ್ನೂ 3-4 ಮಂದಿ ತಮ್ಮವರಿಗಾಗಿ ಟಿಕೆಟ್ ತಂದಿದ್ದು, ಮರ್ಯಾದೆ ಉಳಿಸಿಕೊಳ್ಳಲು ಅವರನ್ನು ಗೆಲ್ಲಿಸಿಕೊಂಡುವ ಬರುವ ಹೊಣೆಗಾರಿಕೆ ಅವರ ಹೆಗಲೇರಿದೆ. ಪರಿಷತ್ ಚುನಾವಣೆ ಮತದಾರರು ಸ್ಥಳೀಯ ಸಂಸ್ಥೆ ಜನಪ್ರತಿನಿಧಿಗಳು ಎಂದು ಸ್ಪಷ್ಟ ಅರಿವಿದ್ದರೂ, ಬಿಎಸ್​ವೈ ಆಗಲಿ ಸಿದ್ದರಾಮಯ್ಯ ಅವರಾಗಲಿ ಅತಿ ಹೆಚ್ಚಿನ ಗಮನ ಕೊಟ್ಟಿರುವುದು ಕಂಡುಬರುತ್ತಿದೆ. ರಾಜಕೀಯ ಅನುಭವದಲ್ಲಿ ಕಲಿತ ಪಟ್ಟುಗಳನ್ನು ಇಲ್ಲಿ ಪ್ರಯೋಗಿಸಲು ಆರಂಭಿಸಿರುವುದು ವಿಶೇಷ.

ಜಾತಿಯಾಧಾರಿತ ಹಂಚಿಕೆ: ಕಾಂಗ್ರೆಸ್​ನಲ್ಲಿ ಕುಟುಂಬದವರಿಗೆ ಹೆಚ್ಚು ಮಣೆ ಹಾಕಿದ್ದು ಮತ್ತು ಜಾತಿ ಆಧಾರಿತವಾಗಿ ಟಿಕೆಟ್ ಹಂಚಿಕೆಗೆ ಒತ್ತು ಕೊಟ್ಟಿರು ವಂತೆ ಬಿಜೆಪಿಯಲ್ಲೂ ಒಂದಷ್ಟು ಸರ್ಕಸ್ ಮಾಡಿರುವುದು ಕಂಡುಬಂದಿದೆ. 8 ಮಂದಿ ಲಿಂಗಾಯತ ಸಮುದಾಯಕ್ಕೆ ಟಿಕೆಟ್ ನೀಡಿ ಪ್ರಾಧಾನ್ಯತೆ ನೀಡಿದೆ.ಹಾಗೆಯೇ ನಾಲ್ವರು ಒಕ್ಕಲಿಗ, ಮೂವರು ಒಬಿಸಿ ವರ್ಗಕ್ಕೆ ಸೇರಿದವರಿಗೆ ಟಿಕೆಟ್ ನೀಡುವ ಮೂಲಕ ಸಮೀಕರಣ ಮಾಡಲಾಗಿದೆ.

ಲೆಕ್ಕಾಚಾರ ಶುರು: ಬಿಜೆಪಿಯವರು ಜಿಲ್ಲಾವಾರು ಎಷ್ಟು ಮತ ಹೊಂದಿದ್ದಾರೆಂದು ಕಾಂಗ್ರೆಸ್ ದುರ್ಬಿನ್ ಹಾಕಿ ಹುಡುಕುತ್ತಿದೆ. ಅದೇ ರೀತಿ ಗ್ರಾಪಂ ಚುನಾವಣೆಯಲ್ಲಿ ತಮ್ಮ ಪರವಾದವರೆಷ್ಟು, ಅವರನ್ನು ಹೇಗೆ ಹಿಡಿದಿಟ್ಟುಕೊಳ್ಳುವುದು ಎಂಬ ತಂತ್ರಗಾರಿಕೆಯಲ್ಲಿ ಬಿಜೆಪಿ ಇದೆ. ಬಿಜೆಪಿ ಲೆಕ್ಕಾಚಾರದ ಪ್ರಕಾರ, ತನ್ನ ಪರವಾಗಿ 36 ಸಾವಿರದಷ್ಟು ಸದಸ್ಯರಿದ್ದರೆ, ಕಾಂಗ್ರೆಸ್ ಪರ 32 ಸಾವಿರ ಇರಬಹುದು. ಹತ್ತು ಸಾವಿರ ಜೆಡಿಎಸ್ ಬೆಂಬಲಿತರಿರಬಹುದು. ಈ ಲೆಕ್ಕದಲ್ಲಿ ನಿರ್ದಿಷ್ಟವಾಗಿ ಬಿಜೆಪಿಯವರೇ ಇಂತಿಷ್ಟು ಎಂದು ಲೆಕ್ಕ ಹಾಕುವುದು ಕಷ್ಟ ಎಂದು ಬಿಜೆಪಿ ಮೂಲಗಳು ತಿಳಿಸಿವೆ. ಕಾಂಗ್ರೆಸ್ ಛಾವಡಿಯಲ್ಲಿನ ಚರ್ಚೆ ಪ್ರಕಾರ, 12ರಿಂದ 14 ಸ್ಥಾನ ಗೆಲ್ಲಬಹುದು. ಅದಕ್ಕಿಂತ ಹೆಚ್ಚಿನ ಪ್ರಯತ್ನ ಇರಲಿದೆಯಾದರೂ ಕನಿಷ್ಠ 12 ಸ್ಥಾನವಂತೂ ಗೆದ್ದೇ ಗೆಲ್ಲಬಹುದೆಂದು ಆತ್ಮವಿಶ್ವಾಸದಿಂದ ಹೇಳಿಕೊಳ್ಳುತ್ತಾರೆ.

• ಪ್ರಭಾವ ಬಳಸಿ ಆಪ್ತರಿಗೆ ಟಿಕೆಟ್ ತಂದರೆ ಸಾಲದು, ಅವರನ್ನು ಗೆಲ್ಲಿಸಿಕೊಂಡು ಬರಬೇಕಾದ ಅನಿವಾರ್ಯತೆ
• ಈಗ ಉತ್ತಮ ಪರಿಶ್ರಮಕ್ಕೆ ತಕ್ಕ ಫಲ ಬಂದರೆ 2023ರ ವಿಧಾನಸಭೆ ಚುನಾವಣೆಯಲ್ಲಿ ಪ್ರಾಮುಖ್ಯತೆ ಹೆಚ್ಚು
• ಅಧಿಕ ಸ್ಥಾನ ಗೆಲ್ಲಿಸಿಕೊಂಡು ಬಂದರೆ ಪಕ್ಷದಲ್ಲಿ ಉತ್ಸಾಹ ಹೆಚ್ಚಲಿದೆ. ಮುಂದಿನ ಹೋರಾಟಕ್ಕೆ ಶಕ್ತಿ ವೃದ್ಧಿ
• ಕಳೆದ ಬಾರಿ ಗೆದ್ದ ಕ್ಷೇತ್ರ ಉಳಿಸಿಕೊಂಡು ಹೆಚ್ಚು ಗೆದ್ದರೆ ಮಾತ್ರ ಪ್ರಾಮು ಖ್ಯತೆ ಹೆಚ್ಚಲಿದೆ. ಇಲ್ಲವಾದರೆ ದೆಹಲಿಯಿಂದ ಒತ್ತಡ ಬರಲಿದೆ.

ಈ ಹೊತ್ತಿನ ಒಳಾತಂಕಗಳು

• ಬೆಳಗಾವಿಯಲ್ಲಿ ರಮೇಶ್- ಬಾಲಚಂದ್ರ ಜಾರಕಿಹೊಳಿ ತಂತ್ರಗಾರಿಕೆ ಬಿಜೆಪಿಯನ್ನು ಗಲಿಬಿಲಿಗೊಳಿಸಿದೆ. ಕಾಂಗ್ರೆಸ್ ಹಾಗೂ ಲಖನ್ ಪೈಪೋಟಿಯಿಂದ ಬಿಜೆಪಿಗೆ ಆತಂಕ ಸೃಷ್ಟಿ.
• ಹುಬ್ಬಳ್ಳಿ-ಧಾರವಾಡದಲ್ಲಿ ಕಾಂಗ್ರೆಸ್ ಅಭ್ಯರ್ಥಿಗೆ ಪಕ್ಷದ ಒಳ ಹೊಡೆತದ್ದೇ ಭೀತಿ. ಪಕ್ಷದಿಂದ ಟಿಕೆಟ್ ಬಯಸಿದ್ದರವೇ ಸೋಲಿಸುವ ಆಟ ಆಡಿದರೆ ಕಷ್ಟ.
• ಚಿಕ್ಕಮಗಳೂರಿನಲ್ಲಿ ಅಹಿಂದ ಮತಗಳ ಒಟ್ಟುಗೂಡಿಸುವ ಕೈ ತಂತ್ರ ಬಿಜೆಪಿಯ ಬೆವರು ಕಿತ್ತುಕೊಳ್ಳುವಂತೆ ಮಾಡುತ್ತಿದೆ.
• ಮಂಡ್ಯದಲ್ಲಿ ಸೇಡು ತೀರಿಸಿಕೊಳ್ಳುವ ಲೆಕ್ಕ ಹಾಕಿದ್ದ ದಳಪತಿ ಗಳಿಗೆ ಕಾಂಗ್ರೆಸ್ ಅನಿರೀಕ್ಷಿತ ಅಭ್ಯರ್ಥಿಯ ಹಿಂದಿನ ಶಕ್ತಿ ಯೋಚಿಸುವಂತೆ ಮಾಡಿದೆ.
• ಬೆಂಗಳೂರು ಗ್ರಾಮಾಂತರ ಕ್ಷೇತ್ರ ಸೆೆಳೆಯಲು ಕೆಪಿಸಿಸಿ ಅಧ್ಯಕ್ಷರೇ ಮುತುವರ್ಜಿ ವಹಿಸಿರುವುದು ಜೆಡಿಎಸ್ ಅನ್ನು ಕಂಗಾಲಾಗಿಸಿದೆ.
• ವಿಜಯಪುರ ಕ್ಷೇತ್ರದಲ್ಲಿ ಕಾಂಗ್ರೆಸ್ ಮುನಿಸು ಮುಗಿದಂತೆ ಕಾಣಿಸು ತ್ತಿಲ್ಲ. ಅಸಮಾಧಾನಿತರು ಕೆರಳಿ ನಿಂತರ ಕೈಗೆ ದೊಡ್ಡ ಪೆಟ್ಟು ಕೊಡಲು ಎದು ರಾಳಿ ಪ್ರಯತ್ನ ಬೇಕಿಲ್ಲ ಎಂಬಂತಹ ಸ್ಥಿತಿ ಇದೆ.
• ತುಮಕೂರಿನಲ್ಲಿ ದೇವೇಗೌಡರ ಸೋಲಿನ ಸೇಡನ್ನು ತೀರಿಸಿಕೊಳ್ಳಲು ಜೆಡಿಎಸ್ ಹಾತೊರೆಯುತ್ತಿರುವುದು ಕಾಂಗ್ರೆಸ್​ನಲ್ಲಿ ಆತಂಕ ಸೃಷ್ಠಿಸಿದೆ.
• ಜೆಡಿಎಸ್ ಅಭ್ಯರ್ಥಿಗಳು ಇಲ್ಲದ ಕಡೆಗಳಲ್ಲಿ ಅವರ ಮತಗಳನ್ನು ಸೆಳೆಯಲು ಕಾಂಗ್ರೆಸ್ -ಬಿಜೆಪಿ ನಡುವೆ ಪೈಪೋಟಿ ಇದೆ.

25 ಸ್ಥಾನಗಳಿಗೆ 215 ನಾಮಪತ್ರ

ಸ್ಥಳೀಯ ಸಂಸ್ಥೆಗಳಿಂದ ವಿಧಾನ ಪರಿಷತ್​ನ 25 ಸ್ಥಾನಗಳಿಗೆ ನಡೆಯುವ ಚುನಾವಣೆಗೆ ನಾಮಪತ್ರ ಸಲ್ಲಿಕೆ ಅವಧಿ ಮಂಗಳವಾರ ಕೊನೆಗೊಂಡಿದ್ದು, 215 ನಾಮಪತ್ರ ಸಲ್ಲಿಕೆಯಾಗಿವೆ. 119 ಪುರುಷ, 2 ಮಹಿಳೆಯರು ಸೇರಿ ಒಟ್ಟು 121 ಅಭ್ಯರ್ಥಿಗಳು ಉಮೇದುವಾರಿಕೆ ಸಲ್ಲಿಸಿದ್ದಾರೆ. ಬಿಜೆಪಿಯಿಂದ 57, ಕಾಂಗ್ರೆಸ್​ನಿಂದ 56, ಜೆಡಿಎಸ್​ನಿಂದ 17, ಇತರ ಪಕ್ಷಗಳಿಂದ 17, ಪಕ್ಷೇತರರು 68 ಮಂದಿ ನಾಮಪತ್ರ ಹಾಕಿದ್ದಾರೆ. ಧಾರವಾಡದಲ್ಲಿ ಗರಿಷ್ಠ 24, ಕೊಡಗಿನಲ್ಲಿ ಕನಿಷ್ಠ 5 ನಾಮಪತ್ರ ಸಲ್ಲಿಕೆಯಾಗಿವೆ. ನ.24ರಂದು ನಾಮಪತ್ರಗಳ ಪರಿಶೀಲನೆ ನಡೆಯಲಿದೆ. ಉಮೇದುವಾರಿಕೆ ಹಿಂಪಡೆಯಲು ನ.26ರ ಕೊನೆಯ ದಿನ. ಡಿ.10ರಂದು ಮತದಾನ ನಡೆಯಲಿದ್ದು, ಡಿ.14ರಂದು ಮತ ಎಣಿಕೆ ನಡೆಯಲಿದೆ.

ವೆಚ್ಚಕ್ಕೆ ಮಿತಿ ಇಲ್ಲ, ಲೆಕ್ಕ ಕೇಳುವವರೇ ಇಲ್ಲ!

ವಿಧಾನಪರಿಷತ್ ಚುನಾವಣೆ ಸಾಮಾನ್ಯರಿಗೆ ಎಟುಕುವುದಿಲ್ಲ. ಕೋಟಿ ಕೋಟಿ ಖರ್ಚು ಮಾಡುವುದು ಸುಳ್ಳೇನಲ್ಲ. ವೆಚ್ಚದ ಭಯದಿಂದಲೇ ಅನೇಕರು ಚುನಾವಣಾ ಕಣದಿಂದ ದೂರ ಉಳಿದಿರುವುದು ಗುಟ್ಟಾಗೇನೂ ಉಳಿದಿಲ್ಲ. ಆದರೆ, ಚುನಾವಣಾ ಆಯೋಗ ಈ ಪರಿಷತ್ ಚುನಾವಣೆಗೆ ಸ್ಪರ್ಧಿಸುವ ಅಭ್ಯರ್ಥಿಗೆ ವೆಚ್ಚದ ಮಿತಿಯನ್ನೇ ಹಾಕಿಲ್ಲ! ವೆಚ್ಚದ ಮಿತಿ ಇಲ್ಲದೆ ಇರುವುದರಿಂದ ಬೇಕಾಬಿಟ್ಟಿ ಹಣ ಚಲಾವಣೆ ನಡೆಯುತ್ತದೆ. ಒಂದು ಮೂಲದ ಪ್ರಕಾರ, ಒಬ್ಬ ಅಭ್ಯರ್ಥಿ 10ರಿಂದ 15 ಕೋಟಿ ರೂ. ವೆಚ್ಚ ಮಾಡುತ್ತಾರೆ ಎಂದು ಹೇಳಲಾಗುತ್ತಿದೆ!

ಎಂಪಿ, ಎಂಎಲ್​ಎಗೆ ಉಂಟು: ಲೋಕಸಭೆ ಚುನಾವಣೆ ವೆಚ್ಚಕ್ಕೆ 77.8 ಲಕ್ಷ ರೂ. ಮತ್ತು ವಿಧಾನಸಭೆ ಚುನಾವಣೆಗೆ ಪ್ರತಿ ಅಭ್ಯರ್ಥಿಗೆ 30.8 ಲಕ್ಷ ರೂ. ಮಿತಿ ನಿಗದಿಪಡಿಸಲಾಗಿದೆ. ತಾಲೂಕು ಪಂಚಾಯತ್ ಚುನಾವಣೆಗೆ 50 ಸಾವಿರ ರೂ. ಮತ್ತು ಜಿಲ್ಲಾ ಪಂಚಾಯತ್ ಚುನಾವಣೆಗಳಿಗೆ 1 ಲಕ್ಷ ರೂ. ಮಿತಿ ಇದೆ. ಗ್ರಾಮ ಪಂಚಾಯತ್ ಚುನಾವಣೆಗೆ ಯಾವುದೇ ಮಿತಿಯಿಲ್ಲ. ಅದೇ ರೀತಿ ವಿಧಾನಪರಿಷತ್ ಚುನಾವಣೆಗೆ ಸ್ಪರ್ಧಿಸುವ ಅಭ್ಯರ್ಥಿಗಳಿಗೂ ಚುನಾವಣಾ ಆಯೋಗ ವೆಚ್ಚಕ್ಕೆ ಮಿತಿ ಹಾಕಿಲ್ಲ. ಇದು ಸಾರ್ವಜನಿಕ ಮತ್ತು ರಾಜಕೀಯ ವಲಯದಲ್ಲಿ ಕುತೂಹಲ ಕೆರಳಿಸಿದೆ.

ಸೂರಜ್ ವಿರುದ್ಧ ಎಚ್.ಡಿ.ರೇವಣ್ಣ ಕಣಕ್ಕೆ!

ಹಾಸನ ಕ್ಷೇತ್ರದಿಂದ ಸ್ಪರ್ಧಿಸಿರುವ ಜೆಡಿಎಸ್ ಅಭ್ಯರ್ಥಿ ಸೂರಜ್ ರೇವಣ್ಣ ವಿರುದ್ಧ ಎಚ್.ಡಿ.ರೇವಣ್ಣ ಕಣಕ್ಕಿಳಿದಿದ್ದಾರೆ! ಮಗನ ವಿರುದ್ಧವೇ ತಂದೆಯ ಸ್ಪರ್ಧೆಯೇ ಎಂದು ಹುಬ್ಬೇರಿಸಬೇಡಿ. ಈ ಎಚ್.ಡಿ.ರೇವಣ್ಣ ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರ ಪುತ್ರ ಅಲ್ಲ. ಬದಲಿಗೆ ಗೌಡರ ಕುಟುಂಬದ ಸದಸ್ಯರ ವಿರುದ್ಧ ಚುನಾವಣೆಗಳಲ್ಲಿ ಸ್ಪರ್ಧಿಸುವ ಖಯಾಲಿ ಬೆಳೆಸಿಕೊಂಡಿರುವ ಕೃಷಿಕ. ಚನ್ನರಾಯಪಟ್ಟಣ ತಾಲೂಕು ಕೋಡಿಹಳ್ಳಿ ಗ್ರಾಮದ ನಿವಾಸಿಯಾಗಿರುವ ಇವರು, ಹೊಳೆನರಸೀಪುರ ಕ್ಷೇತ್ರದ ಮತದಾರರ ಪಟ್ಟಿಯಲ್ಲಿ ಇವರ ಹೆಸರಿದೆ ಎಂದು ಅವರೇ ಪ್ರಮಾಣಪತ್ರದಲ್ಲಿ ನಮೂದಿಸಿದ್ದಾರೆ. ಈ ಹಿಂದೆ ಎಚ್.ಡಿ. ದೇವೇಗೌಡ, ಎಚ್.ಡಿ.ರೇವಣ್ಣ, ಪ್ರಜ್ವಲ್ ವಿರುದ್ಧ ವಿವಿಧ ಚುನಾವಣೆಗಳಲ್ಲಿ ಸ್ಪರ್ಧಿಸಿದ್ದರು. ಪ್ರತಿ ಬಾರಿಯೂ ಠೇವಣಿ ಕಳೆದುಕೊಳ್ಳುತ್ತಿದ್ದಾರೆ.

ಜೆಡಿಎಸ್​ನಿಂದ 7 ಅಭ್ಯರ್ಥಿಗಳು ಕಣಕ್ಕೆ: ಸ್ಥಳೀಯ ಸಂಸ್ಥೆಗಳಿಂದ ಮೇಲ್ಮನೆಯ 25 ಸ್ಥಾನಗಳಿಗೆ ನಡೆಯುವ ಚುನಾವಣೆಗೆ ಕೇವಲ ಏಳು ಅಭ್ಯರ್ಥಿಗಳನ್ನು ಜೆಡಿಎಸ್ ಕಣಕ್ಕಿಳಿಸಿದೆ. ಮೈಸೂರು ಕ್ಷೇತ್ರದ ಟಿಕೆಟ್ ಹಂಚಿಕೆಯಲ್ಲಿ ಗೊಂದಲ, ಪೈಪೋಟಿ ಕಾರಣ ನಾಮಪತ್ರ ಸಲ್ಲಿಕೆಯ ಕೊನೆಯ ದಿನವಾದ ಮಂಗಳವಾರ ಬೆಳಗಿನ ಜಾವ ಅಭ್ಯರ್ಥಿಗಳ ಪಟ್ಟಿ ಅಂತಿಮಗೊಳಿಸಲಾಗಿದೆ.

ಇಸಾಕ್​ಖಾನ್ ಎಡವಟ್ಟು!

ಮಡಿಕೇರಿ: ಜೆಡಿಎಸ್ ಅಭ್ಯರ್ಥಿ ಎಚ್.ಯು.ಇಸಾಕ್​ಖಾನ್ ನಾಮಪತ್ರ ಸಲ್ಲಿಸುವ ವೇಳೆ ತಮ್ಮ ಪ್ರಮಾಣಪತ್ರದ ಬದಲಿಗೆ ಡಾ.ಮಂಥರ್​ಗೌಡ ಅವರ ಪ್ರಮಾಣಪತ್ರ ಸಲ್ಲಿಸಿ ಎಡವಟ್ಟು ಮಾಡಿಕೊಂಡರು. ನೀವು ಯಾರ ನಾಮಪತ್ರ ಸಲ್ಲಿಸುತ್ತಿದ್ದೀರಾ ಎಂದು ಜಿಲ್ಲಾಧಿಕಾರಿ ಡಾ.ಬಿ.ಸಿ. ಸತೀಶ್ ಪ್ರಶ್ನಿಸಿದಾಗ ಆಗಿರುವ ತಪ್ಪಿನ ಅರಿವು ಎಲ್ಲರ ಗಮನಕ್ಕೆ ಬಂತು. ಕಾಂಗ್ರೆಸ್ ಹಾಗೂ ಜೆಡಿಎಸ್ ಅಭ್ಯರ್ಥಿಯ ನಾಮಪತ್ರವನ್ನು ಒಬ್ಬರೇ ಸಿದ್ಧಪಡಿಸಿದ್ದರಿಂದ ಈ ಗೊಂದಲಕ್ಕೆ ಕಾರಣವಾಯಿತು. ತಕ್ಷಣ ಹೊಸ ಪ್ರಮಾಣಪತ್ರ ತಂದು ಸಲ್ಲಿಸಲಾಯಿತು. ಇಂಗ್ಲಿಷ್​ನಲ್ಲಿ ಪ್ರಮಾಣ ವಚನ ಸ್ವೀಕರಿಸಲು ಇಸಾಕ್​ಖಾನ್ ಕಷ್ಟಪಡುವಂತಾಯಿತು. ತದನಂತರ ಪ್ರಮಾಣ ವಚನವನ್ನು ಡಿಸಿ ಹೇಳಿದಂತೆ ಇಸಾಕ್ ಹೇಳಿದರು.

ಕೆಳಮನೆ ಮೇಲೆ ಕಣ್ಣು ಕಾಂಗ್ರೆಸ್​ನಲ್ಲಿ ಟಿಕೆಟ್ ದ್ವಂದ್ವ

ಬೆಂಗಳೂರು: ವಿಧಾನಪರಿಷತ್ ಚುನಾವಣೆಗೆ ಸ್ಪರ್ಧಿಸಲು ಒಲ್ಲೆಯೆಂದು ವಿಧಾನಸಭೆ ಚುನಾವಣೆ ಸ್ಪರ್ಧೆ ಮೇಲೆ ಕಣ್ಣಿಟ್ಟಿರುವವರ ವಿಷಯದಲ್ಲಿ ಕಾಂಗ್ರೆಸ್​ನಲ್ಲಿ ಈಗ ಗೊಂದಲದ ವಾತಾವರಣ ಸೃಷ್ಟಿಯಾಗಿದೆ. ಪರಿಷತ್​ನ 25 ಸ್ಥಾನಗಳಿಗೆ ನಡೆಯುವ ಚುನಾವಣೆಯಲ್ಲಿ ಕಾಂಗ್ರೆಸ್​ನ ಆರು ಹಾಲಿ ಸದಸ್ಯರು ಕಣದಿಂದ ಹಿಂದೆ ಸರಿದಿದ್ದಾರೆ. ಇವರಲ್ಲಿ ನಾಲ್ವರು ವಿಧಾನಸಭೆ ಟಿಕೆಟ್ ಬಯಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಚರ್ಚೆ ತೀವ್ರಗೊಂಡಿದೆ. ಪರಿಷತ್ ಟಿಕೆಟ್ ತ್ಯಾಗ ಮಾಡಿದ್ದೇವೆಂಬುದು ವಿಧಾನಸಭೆ ಚುನಾವಣೆಯಲ್ಲಿ ಸ್ಪರ್ಧಿಸಲು ಅವಕಾಶ ಎಂದುಕೊಳ್ಳುವಂತಿಲ್ಲ ಎಂಬ ಸಂದೇಶ ಹೈಕಮಾಂಡ್​ನಿಂದ ಬಂದಿದೆ ಎಂಬ ಮಾಹಿತಿ ಇದೆ. ಪರಿಷತ್ ಪ್ರವೇಶದ ಅವಕಾಶ ತಪ್ಪಿಸಿಕೊಂಡು ವಿಧಾನಸಭೆ ಕ್ಷೇತ್ರದಲ್ಲಿ ಚಟುವಟಿಕೆ ಚುರುಕುಗೊಳಿಸಿದರೆ ಇತರ ಆಕಾಂಕ್ಷಿಗಳ ನಡುವೆ ಪೈಪೋಟಿ ಉಂಟಾಗಿ ಗೊಂದಲ ಆಗಬಹುದು ಎಂಬುದು ದೆಹಲಿ ನಾಯಕರ ಎಚ್ಚರಿಕೆಯಾಗಿದೆ ಎಂದು ತಿಳಿದುಬಂದಿದೆ. ಪ್ರಭಾವಿ ಪರಿಷತ್ ಸದಸ್ಯರಿಗೆ ಈ ಬಾರಿ ಟಿಕೆಟ್ ನೀಡಿಲ್ಲ. ವಿಧಾನಸಭೆ ದೃಷ್ಟಿಯಿಂದ ಅವರನ್ನು ಬಳಸಿಕೊಳ್ಳುತ್ತೇವೆ, ವಿಧಾನಸಭೆಯಲ್ಲಿ ಹೆಚ್ಚಿನ ಸ್ಥಾನ ಗೆಲ್ಲಬೇಕಿದೆ. ಹಾಗಾಗಿ ಪರ್ಯಾಯ ಅಭ್ಯರ್ಥಿಗಳಗೆ ಈಗ ಟಿಕೆಟ್ ನೀಡಿದ್ದೇವೆ. ಪ್ರಭಾವ ಇರುವ ನಾಯಕರಿಗೆ ಮುಂದೆ ವಿಧಾನಸಭೆ ಟಿಕೆಟ್ ನೀಡುತ್ತೇವೆ ಎಂದು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್ ಪ್ರತಿಕ್ರಿಯಿಸಿದ್ದಾರೆ. ಬೆಂ. ನಗರ ಕ್ಷೇತ್ರಕ್ಕೆ ಸಂಬಂಧಪಟ್ಟಂತೆ ಕೆಲವು ಕಾರ್ಯ ಕರ್ತರು ನಾಮಪತ್ರ ಸಲ್ಲಿಸಿದ್ದಾರೆ. ಕಾನೂನು ಸಲಹೆ ಪಡೆದು ಅದನ್ನು ತೆಗೆಸುತ್ತೇವೆ ಎಂದರು.

ನಾವು ಒಬ್ಬ ಅಭ್ಯರ್ಥಿಯನ್ನು ಬೆಳಗಾವಿಯಲ್ಲಿ ಹಾಕಿದ್ದೇವೆ, ಬಿಜೆಪಿಯವರು ಎಷ್ಟೇ ಅಭ್ಯರ್ಥಿ ಬೇಕಾದರೂ ಹಾಕಲಿ. ಅದಕ್ಕೂ ನಮಗೂ ಸಂಬಂಧವಿಲ್ಲ. ವಿವೇಕ್ ರಾವ್ ಪಾಟೀಲ್ ಕಾಂಗ್ರೆಸ್​ನಲ್ಲಿ ಇರಲಿಲ್ಲ. ಕಾಂಗ್ರೆಸ್​ನಲ್ಲಿ ಅರ್ಜಿ ಹಾಕಿದ್ದರು. ನಮ್ಮ ಪಕ್ಷದಿಂದ ಒಬ್ಬ ಅಭ್ಯರ್ಥಿ ಮಾತ್ರ ಇರುತ್ತಾರೆ.| ಡಿ.ಕೆ.ಶಿವಕುಮಾರ್ ಕೆಪಿಸಿಸಿ ಅಧ್ಯಕ್ಷ

ಲಖನ್ ಜಾರಕಿಹೊಳಿಗೆ ಕೈ-ಕಮಲಿಗರ ಜೈಕಾರ

ಬೆಳಗಾವಿ: ನಾಮಪತ್ರ ಸಲ್ಲಿಸಲು ಆಗಮಿಸಿದ್ದ ಕಾಂಗ್ರೆಸ್​ನ ಚನ್ನರಾಜನ ಹಟ್ಟಿಹೊಳಿ, ಬಿಜೆಪಿಯ ಮಹಾಂತೇಶ ಕವಟಗಿಮಠ ಅವರಿಗೆ ಬೆಂಬಲ ನೀಡಲು ಜಿಲ್ಲೆಯ ವಿವಿಧ ಭಾಗಗಳಿಂದ ಸ್ಥಳೀಯ ಸಂಸ್ಥೆಗಳ ಸದಸ್ಯರು, ಬೆಂಬಲಿಗರು ಸಾವಿರಾರು ಸಂಖ್ಯೆಯಲ್ಲಿ ಆಗಮಿಸಿದ್ದರು. ಇದೇ ವೇಳೆ ಪಕ್ಷೇತರ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಸಲು ಬಂದ ಲಖನ್ ಜಾರಕಿಹೊಳಿ ಅವರನ್ನು ಬಿಜೆಪಿ, ಕಾಂಗ್ರೆಸ್ ಬೆಂಬಲಿಗರು ಜೈಕಾರ ಹಾಕಿ ಬೆಂಬಲಿಸಿದರು. ಇದರಿಂದ ಸ್ಥಳದಲ್ಲಿದ್ದ ಕಾಂಗ್ರೆಸ್, ಬಿಜೆಪಿ ಮುಖಂಡರು ಮುಜುಗರ ಎದುರಿಸಬೇಕಾಯಿತು.

ಮಂಜು ಮೇಲೆ ಬಿಜೆಪಿಗೆ ಅನುಮಾನ: ಮಾಜಿ ಸಚಿವ ಎ. ಮಂಜು ಅವರನ್ನು ಮಂಡ್ಯ ಜಿಲ್ಲೆಯ ಪ್ರಭಾರಿ ಹುದ್ದೆ ಸೇರಿ ಎಲ್ಲ ಜವಾಬ್ದಾರಿಗಳಿಂದ ಮುಕ್ತಗೊಳಿಸಿ ಬಿಜೆಪಿ ಶಿಸ್ತು ಸಮಿತಿ ಆದೇಶ ಹೊರಡಿಸಿದೆ. ಇತ್ತೀಚಿನ ಬೆಳವಣಿಗೆಗಳು ಸಂಶಯಕ್ಕೆ ಕಾರಣವಾಗಿರುವುದರಿಂದ ಜವಾಬ್ದಾರಿಗಳಿಂದ ಮುಕ್ತಗೊಳಿಸುತ್ತಿರುವುದಾಗಿ ಸ್ಪಷ್ಟಪಡಿಸಿದೆ. ಮಂಜು ಪುತ್ರ ಮಂಥರ್ ಗೌಡ ಕೊಡಗು ಕ್ಷೇತ್ರದಿಂದ ಕಾಂಗ್ರೆಸ್ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದಾರೆ. ಮಂಜು ಸಹ ಇತ್ತೀಚಿಗೆ ಸಿದ್ದರಾಮಯ್ಯ ಭೇಟಿಯಾಗಿ ರ್ಚಚಿಸಿದ್ದರು. ಇದು ವಾಪಸ್ ಕಾಂಗ್ರೆಸ್​ಗೆ ಬರಲಿದ್ದಾರೆ ಎಂಬ ವದಂತಿಗಳಿಗೆ ಕಾರಣವಾಗಿತ್ತು.

ಒಳರಾಜಕಾರಣ ಮಾಡುವ ವ್ಯಕ್ತಿ ನಾನಲ್ಲ. ನನ್ನ ಮಗ ಎಂದಮಾತ್ರಕ್ಕೆ ಮಂಥರ್ ಪರ ಪ್ರಚಾರಕ್ಕೆ ಹೋಗಲು ಸಾಧ್ಯವಿಲ್ಲ. ವಿಶ್ವಾಸಕ್ಕೆ ಎಲ್ಲ ಪಕ್ಷದವರೊಂದಿಗೆ ಮಾತನಾಡಿದ್ದೇನೆ ಅಷ್ಟೇ. ಆದರೆ, ನನಗೆ ನನ್ನ ಪಕ್ಷ ಮುಖ್ಯ.| ಎ.ಮಂಜು ಮಾಜಿ ಸಚಿವ

https://www.vijayavani.net/most-of-the-mlc-candidates-are-having-crores-together-asset/

https://www.vijayavani.net/this-is-worlds-safest-county-for-night-walk/

https://www.vijayavani.net/cricket-god-sachin-admired-ball-catching-skills-of-the-dog/