ನೂತನ ಕಾವೇರಿ 2.0 ತಂತ್ರಾಂಶವು ಜನಸ್ನೇಹಿ ಅಂಶಗಳನ್ನು ಒಳಗೊಂಡಿರುವುದು ಸ್ವಾಗತಾರ್ಹ ಸಂಗತಿಯಾಗಿದ್ದು, ಇ-ಆಡಳಿತದಲ್ಲಿ ಮಹತ್ವದ ಮೈಲಿಗಲ್ಲು ಆಗಲಿದೆ. ಕರ್ನಾಟಕದಲ್ಲಿ ಭೂದಾಖಲೆಗಳ ಕಂಪ್ಯೂಟರೀಕರಣವು 1991ರಲ್ಲಿ ಆರಂಭಗೊಂಡಿತು. 2000ನೇ ಇಸ್ವಿಯಲ್ಲಿ ಭೂಮಿ ಇ-ಆಡಳಿತ ಯೋಜನೆ ಮೂಲಕ ರಾಜ್ಯದ 177 ತಾಲೂಕುಗಳ 2 ಕೋಟಿಗೂ ಅಧಿಕ ಆಸ್ತಿಗಳ ದಾಖಲೆಗಳನ್ನು ಕಂಪ್ಯೂಟರೀಕರಣ ಮಾಡಲಾಯಿತು. ಕಂಪ್ಯೂಟರ್ ಮೂಲಕ ಕೆಲ ಕ್ಷಣಗಳಲ್ಲಿ ಪಹಣಿ ಪತ್ರಿಕೆ, ಮ್ಯುಟೇಶನ್, ಟಿಪ್ಪನ್ ಎಕ್ಸ್ಟ್ರಾ್ಯಕ್ಟ್, ಆರ್ಆರ್5, ಮ್ಯುಟೇಶನ್ ಸ್ಟೇಟಸ್ ಮುಂತಾದ ಭೂದಾಖಲೆಗಳು ಲಭಿಸುವಂತಾಯಿತು. 2002ರಲ್ಲಿ ನೋಂದಣಿ ಕಚೇರಿಗಳಲ್ಲಿ ನೋಂದಣಿ ಕಾರ್ಯಕ್ಕಾಗಿ ಕಾವೇರಿ ತಂತ್ರಜ್ಞಾನ ಅಳವಡಿಸಲಾಯಿತು. ನೋಂದಣಿದಾರರ ಫೋಟೋ, ಬೆರಳಚ್ಚು ಪಡೆದುಕೊಳ್ಳುವ ಹಾಗೂ ದಾಖಲೆಗಳ ಕಂಪ್ಯೂಟರೀಕರಣ ಮಾಡುವ ಮೂಲಕ ಸಾಕಷ್ಟು ಸುಧಾರಣೆ ಸಾಧಿಸಲಾಯಿತು. ಈ ಸಾಫ್ಟ್ವೇರ್ ತಂತ್ರಜ್ಞಾನ ಬಳಕೆಯೊಂದಿಗೆ ಭೂ ವ್ಯವಹಾರಗಳಲ್ಲಿ ನಡೆಯುತ್ತಿದ್ದ ಅಕ್ರಮಗಳನ್ನು ತಕ್ಕಮಟ್ಟಿಗೆ ನಿಯಂತ್ರಿಸಲಾಯಿತು.
