ರಾಜ್ಯದಲ್ಲಿನ ಕರೊನಾ ಸ್ಥಿತಿಗತಿ ಕುರಿತು ನಡೆಸಿದ ಸಭೆ ಬಳಿಕ ಸುದ್ದಿಗೋಷ್ಠಿ ಕರೆದ ಮುಖ್ಯಮಂತ್ರಿ ಯಡಿಯೂರಪ್ಪ, ಸಿಎಂ ಬಾಲಸೇವಾ ಯೋಜನೆ ಕುರಿತ ಮಾಹಿತಿ ನೀಡಿದರು. ಕೋವಿಡ್ನಿಂದ ತಂದೆ-ತಾಯಿಯನ್ನು ಕಳೆದುಕೊಂಡ ಮಕ್ಕಳು ಹಲವರಿದ್ದಾರೆ. ರಾಜ್ಯದಲ್ಲಿ ಅಂಥ 13 ಹಾಗೂ ದೇಶದಲ್ಲಿ 577 ಪ್ರಕರಣಗಳು ದಾಖಲಾಗಿವೆ. ಸದ್ಯ ರಾಜ್ಯದ ಆ 13 ಮಕ್ಕಳಿಗೆ ಮುಂದಿನ 21 ವರ್ಷ ಪೂರೈಸುವವರೆಗೂ ಮಾಸಿಕ 3,500 ರೂ. ಲೆಕ್ಕದಲ್ಲಿ ಸಹಾಯಧನ ನೀಡಲಾಗುವುದು. ಇನ್ನು ಈ ಮಕ್ಕಳು ಹತ್ತು ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಾಗಿದ್ದು ನೋಡಿಕೊಳ್ಳಲು ಯಾರೂ ಇರದಿದ್ದರೆ ಸರ್ಕಾರದ ಪಾಲನ ಕೇಂದ್ರದ ಮೂಲಕ ಆರೈಕೆ ಮಾಡಲಾಗುವುದು. ಅಲ್ಲದೆ ಹತ್ತನೇ ತರಗತಿವರೆಗೆ ಮಾದರಿ ವಸತಿ ಶಾಲೆಗಳಲ್ಲಿ ಉಚಿತವಾಗಿ ಶಿಕ್ಷಣ ಒದಗಿಸಲಾಗುವುದು. ಕೇಂದ್ರ ಸರ್ಕಾರ ಪಿಎಂ ಕೇರ್ಸ್ ಫಂಡ್ ಮೂಲಕ ಈ ನೆರವು ನೀಡಲಾಗುತ್ತಿದೆ ಎಂದು ಸಿಎಂ ತಿಳಿಸಿದರು.
