ಜಪಾನ್​ನಲ್ಲಿ ಕೆಲಸ ಗಿಟ್ಟಿಸಿದ ಕುಗ್ರಾಮದ ಯುವಕ: ಹಿಂದಿನ ಮತ್ತು ಈಗಿನ ಸಂಬಳದ ಅಂತರ ಕೇಳಿದ್ರೆ ಬೆರಗಾಗ್ತೀರಾ!

ಜೈಪುರ: ನೀನು ಮಾಡುವ ಕೆಲಸವನ್ನು ಪ್ರೀತಿಸು ಮತ್ತು ಶ್ರಮ ವಹಿಸು ಪ್ರತಿಫಲ ತಾನಾಗಿಯೇ ನಿನ್ನ ಮುಂದೆ ಬರುತ್ತದೆ ಎಂಬ ಹಿರಿಯರ ಅನುಭವದ ಮಾತಿಗೆ ತಾಜಾ ನಿದರ್ಶನವೊಂದು ರಾಜಸ್ಥಾನದಲ್ಲಿ ಬೆಳಕಿಗೆ ಬಂದಿದೆ. ಇಲ್ಲಿನ ಬರ್ಮರ್​ ಜಿಲ್ಲೆಯ ಕುಗ್ರಾಮವೊಂದರ ನಿವಾಸಿ ಮಹಿಪಾಲ್​ ಸೆಜು ಎಂಬುವರು ಜಪಾನ್​ನ ಪ್ರತಿಷ್ಠಿತ ಕಂಪನಿಯಲ್ಲಿ ವಾರ್ಷಿಕ 1 ಕೋಟಿ ರೂ. ಸಂಬಳದ ಉದ್ಯೋಗ ಗಿಟ್ಟಿಸುವ ಮೂಲಕ ಎಲ್ಲರ ಹುಬ್ಬೇರಿಸಿದ್ದಾರೆ.

ಬರ್ಮರ್​ ಜಿಲ್ಲೆ ಇಂಡೋ-ಪಾಕ್​ ಗಡಿಯಲ್ಲಿ ಬರುತ್ತದೆ. ಬರ್ಮರ್​ನಲ್ಲಿ ಆರಂಭಿಕ ಶಿಕ್ಷಣ ಪಡೆದ ಮಹಿಪಾಲ್​, ದೆಹಲಿಯಲ್ಲಿ ಬಿಟೆಕ್​ ಶಿಕ್ಷಣ ಮುಗಿಸಿ, ಜಪಾನ್​ನ ನಗೋಯಾ ನಗರದಲ್ಲಿ ಆರಂಭದಲ್ಲಿ ವಾರ್ಷಿಕ 30 ಲಕ್ಷ ರೂ. ಸಂಬಳದ ಉದ್ಯೋಗವನ್ನು ಸೇರಿದರು. ಕೆಲಸದ ಮೇಲಿನ ಅವರ ಶ್ರದ್ಧೆ ಹಾಗೂ ಕೌಶಲ ಇಂದು ವೃತ್ತಿ ಜೀವನದ ಯಶಸ್ಸಿನ ಶಿಖರಕ್ಕೇರುವಂತೆ ಮಾಡಿದೆ. ಜಪಾನ್​ ರಾಜಧಾನಿ ಟೋಕಿಯೋದಲ್ಲಿರುವ ಕಂಪನಿಯೊಂದು ಮಹಿಪಾಲ್​ಗೆ ವಾರ್ಷಿಕ 1 ಕೋಟಿ ರೂ. ಸಂಬಳದ ಆಫರ್​ ನೀಡಿ ಅವರನ್ನು ತಮ್ಮ ಕಂಪನಿಗೆ ಸೇರಿಸಿಕೊಂಡಿದೆ.

ಜೋಧ್​ಪುರದಲ್ಲಿ ಎಸ್ಸೆಸ್ಸೆಲ್ಸಿ ಮುಗಿಸಿದ ಮಹಿಪಾಲ್​, ಕೋಟಾದಲ್ಲಿ ಐಐಟಿ ತಯಾರಿಯನ್ನು ಮುಂದುವರಿಸಿದರು. ನಂತರ ದೆಹಲಿಯಿಂದ 4 ವರ್ಷಗಳ ಬಿಟೆಕ್ ಪೂರ್ಣಗೊಳಿಸಿದರು. 2019ರಲ್ಲಿ ಜಾಬ್​ ಏಜೆನ್ಸಿ ಮೂಲಕ ನಗೋಯಾ ನಗರದಲ್ಲಿ 30 ಲಕ್ಷ ರೂ. ಸಂಬಳದ ಉದ್ಯೋಗಕ್ಕೆ ಸೇರಿಕೊಂಡರು. ಪ್ರಸ್ತುತ ಟೋಕಿಯೋದಲ್ಲಿ ಮೆಕ್ಯಾನಿಕಲ್ ಕಾರ್ಪೊರೇಷನ್ ಕಂಪನಿಗೆ ಐಟಿ ಸಲಹೆಗಾರರಾಗಿ ಕೆಲಸ ಮಾಡುತ್ತಿದ್ದಾರೆ.

ಮಹಿಪಾಲ್ ಸೆಜು ಅವರ ತಂದೆ ಗಂಭೀರಂ ಅವರು ಈ ಹಿಂದೆ ಅರಣ್ಯ ಇಲಾಖೆಯಲ್ಲಿ ಕೆಲಸ ಮಾಡಿ ಈಗ ನಿವೃತ್ತರಾಗಿದ್ದಾರೆ. ಅವರ ತಾಯಿ ಮಾತಾ ಕಮಲಾ ದೇವಿ ಅನಕ್ಷರಸ್ಥರು. ಮಹಿಪಾಲ್ ತನ್ನ ನಾಲ್ಕು ಸಹೋದರರಲ್ಲಿ ಕಿರಿಯವರು. ಮಹಿಪಾಲ್ ಅವರ ಈ ಯಶಸ್ಸು ಕುಗ್ರಾಮಗಳಲ್ಲಿ ಜನಿಸಿದ ವ್ಯಕ್ತಿಗಳು ಸಹ ಕಠಿಣ ಪರಿಶ್ರಮ ಮತ್ತು ಕೌಶಲ್ಯದ ಮೂಲಕ ಜಾಗತಿಕ ಮನ್ನಣೆಯನ್ನು ಸಾಧಿಸುವ ಸಾಮರ್ಥ್ಯವನ್ನು ಪ್ರದರ್ಶಿಸುತ್ತದೆ. (ಏಜೆನ್ಸೀಸ್​)

https://www.vijayavani.net/modi-gets-emotional-at-ayodhyas-lata-mangeshwar-chowk-colossal-veena

https://www.vijayavani.net/visit-pakistan-for-their-delicious-cuisines-fans-reply-leaves-ms-dhoni-in-splits

https://www.vijayavani.net/minister-eshwar-kandre-reaction-on-bjp-mp-pratap-simha-brother-vikram-simha-arrest