ಅರೆಸ್ಟ್​ ಮಾಡೋದೆ ಮೋದಿಜಿ ಪ್ಲ್ಯಾನ್​: 5ನೇ ಬಾರಿಯೂ ಇಡಿ ವಿಚಾರಣೆ ತಪ್ಪಿಸಿಕೊಂಡ ಕೇಜ್ರಿವಾಲ್​

ನವದೆಹಲಿ: ದೆಹಲಿ ಮುಖ್ಯಮಂತ್ರಿ ಅರವಿಂದ್​ ಕೇಜ್ರಿವಾಲ್​ ಜಾರಿ ನಿರ್ದೇಶನಾಲಯ (ಇಡಿ) ವಿಚಾರಣೆಗೆ ಇಂದು ಕೂಡ ಹಾಜರಾಗದಿರಲು ನಿರ್ಧರಿಸಿದ್ದಾರೆ. ಈ ಮೂಲಕ ಸತತ 5ನೇ ಬಾರಿಗೆ ವಿಚಾರಣೆಯಿಂದ ತಪ್ಪಿಸಿಕೊಂಡಿದ್ದಾರೆ. ದೆಹಲಿಯ ಅಬಕಾರಿ ನೀತಿ ಪ್ರಕರಣದಲ್ಲಿ ಕೇಂದ್ರೀಯ ತನಿಖಾ ಸಂಸ್ಥೆ ಕೇಜ್ರಿವಾಲ್​ಗೆ ಸಮನ್ಸ್​ ನೀಡಿದೆ.

ಪದೇಪದೆ ಸಮನ್ಸ್‌ ನೀಡುತ್ತಿರುವುದು ಕೇಜ್ರಿವಾಲ್​ ಅವರನ್ನು ಬಂಧಿಸುವ ಪ್ರಯತ್ನಗಳಾಗಿವೆ ಎಂದು ಆಮ್ ಆದ್ಮಿ ಪಕ್ಷ (ಎಎಪಿ) ಹೇಳಿದೆ. ಕಳೆದ ನಾಲ್ಕು ತಿಂಗಳುಗಳಲ್ಲಿ ಏಜೆನ್ಸಿ ನೀಡಿದ ನಾಲ್ಕು ಸಮನ್ಸ್‌ಗೆ ಕೇಜ್ರಿವಾಲ್​ ಯಾವುದೇ ಉತ್ತರ ನೀಡಿಲ್ಲ. ಬುಧವಾರ ಐದನೇ ಸಮನ್ಸ್ ನೀಡಲಾಗಿದ್ದು, ಇದು ಕಾನೂನುಬಾಹಿರ ಎಂದು ದೆಹಲಿ ಸಿಎಂ ಸಮರ್ಥನೆ ನೀಡಿದ್ದಾರೆ.

ಇಡಿ ಸಮನ್ಸ್ ಕೇಜ್ರಿಬಾಲ್​ ಅವರನ್ನು ಬಂಧಿಸುವ ಮೋದಿಜಿ ಅವರ ಗುರಿಯಾಗಿದೆ. ಬಂಧಿಸುವ ಮೂಲಕ ದೆಹಲಿ ಸರ್ಕಾರವನ್ನು ಉರುಳಿಸಲು ಮೋದಿ ಬಯಸಿದ್ದಾರೆ. ಆದರೆ, ಈ ರೀತಿ ನಡೆಯುವುದಕ್ಕೆ ಎಂದಿಗೂ ಬಿಡುವುದಿಲ್ಲ ಎಂದು ಎಎಪಿ ಸವಾಲು ಹಾಕಿದೆ.

2023ರಲ್ಲಿ ನವೆಂಬರ್​ 2 ಮತ್ತು ಡಿಸೆಂಬರ್​ 21ರಂದು ವಿಚಾರಣೆಗೆ ಗೈರು ಹಾಜರಾದ ಕೇಜ್ರಿವಾಲ್​, ಈ ವರ್ಷ ಜನವರಿ 3 ಮತ್ತು ಜನವರಿ 18ರಂದು ಇಡಿ ವಿಚಾರಣೆ ತಪ್ಪಿಸಿಕೊಂಡಿದ್ದಾರೆ.

ಜಾರಿ ನಿರ್ದೇಶನಾಲಯದ ಪ್ರಕಾರ, 2021-22ರ ದೆಹಲಿ ಸರ್ಕಾರದ ಅಬಕಾರಿ ನೀತಿಯು ಮದ್ಯದ ವ್ಯಾಪಾರಿಗಳಿಗೆ ಪರವಾನಗಿ ನೀಡಲು ಕಾರ್ಟೆಲೈಸೇಶನ್‌ಗೆ ಅವಕಾಶ ಮಾಡಿಕೊಟ್ಟಿತು ಮತ್ತು ಲಂಚ ನೀಡಿದ ಕೆಲವು ವಿತರಕರಿಗೆ ಅನುಕೂಲವಾಯಿತು ಎಂದು ಆರೋಪಿಸಿದ್ದು, ತನಿಖೆ ಮುಂದುವರಿಸಿದೆ. (ಏಜೆನ್ಸೀಸ್​)

https://www.vijayavani.net/lok-sabha-election-2024-mandya-constituency-political-analysis

https://www.vijayavani.net/these-are-the-worlds-most-powerful-countries-know-where-india-stands