ಗಾಯಾಳುಗಳ ರಕ್ಷಣೆಗೆ ಧಾವಿಸಿದ ಆ್ಯಂಬುಲೆನ್ಸ್​ಗೆ ಮಿನಿಬಸ್​ ಡಿಕ್ಕಿ; ಚಾಲಕ ಸೇರಿದಂತೆ ಮೂವರು ಮೃತ್ಯು

ಚೆನ್ನೈ: ಗಾಯಾಳುಗಳನ್ನು ನೆರವಿಗೆ ಧಾವಿಸಿದ ಆ್ಯಂಬುಲೆನ್ಸ್​ಗೆ ಮಿನಿಬಸ್​ ಡಿಕ್ಕಿ ಹೊಡೆದು​ ಮೂವರು ದಾರುಣವಾಗಿ ಮೃತಪಟ್ಟಿರುವ ಘಟನೆ ತಮಿಳುನಾಡಿನ ಚೆನ್ನೈ-ತಿರುಚಿರಾಪಳ್ಳಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ನಡೆದಿದೆ.

ಅಪಘಾತದಲ್ಲಿ ಆ್ಯಂಬುಲೆನ್ಸ್​ ಚಾಲಕ ಐ. ರಾಜೇಂದ್ರನ್​(45), ದಿಂಡಿಗಲ್​ ನಿವಾಸಿಗಳಾದ ಎ. ಕುಪ್ಪುಸ್ವಾಮಿ(60), ಎಸ್​. ಕವಿಪ್ರಿಯ(22) ಮೃತ ದುರ್ದೈವಿಗಳೆಂದು ತಿಳಿದು ಬಂದಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಪೊಲೀಸ್​ ಅಧಿಕಾರಿ ಒಬ್ಬರು ತಿರುವಣ್ಣಾಮಲೈನಿಂದ ದಿಂಡಿಗಲ್​ಗೆ 10ಮಂದಿ ಪ್ರವಾಸ ಮುಗಿಸಿ ಮಿನಿಬಸ್​ನಲ್ಲಿ ವಾಪಸ್​ ಆಗುತ್ತಿದ್ದ ವೇಳೆ ಚಾಲಕ ಮುಂಬದಿ ಸಾಗುತ್ತಿದ್ದ ಟ್ರ್ಯಾಕ್ಟರ್​ ಓವರ್​ಟೇಕ್​ ಮಾಡಲು ಮುಂದಾಗಿದ್ದಾನೆ. ಈ ವೇಳೆ ನಿಯಂತ್ರಣ ತಪ್ಪಿ ಮಿನಿಬಸ್ ಟ್ರ್ಯಾಕ್ಟರ್​ಗೆ ​ ಡಿಕ್ಕಿ ಹೊಡೆದು ಡಿವೈಡರ್​ ಮೇಲೆ ನಿಂತಿದೆ.

ಇದನ್ನೂ ಓದಿ: ಆನ್​ಲೈನ್​ ಗೇಮಿಂಗ್​ ಮೂಲಕ ಅಪ್ರಾಪ್ತ ವಯಸ್ಕರ ಮತಾಂತರ!

ಕೂಡಲೇ ಸಾರ್ವಜನಿಕರು 108 ಆ್ಯಂಬುಲೆನ್ಸ್​ಗೆ ಕರೆ ಮಾಡಿ ಅಪಘಾತದ ವಿಚಾರ ತಿಳಿಸಿದ್ದಾರೆ. ವಿಷಯ ತಿಳಿದು ಸ್ಥಳಕ್ಕೆ ದೌಡಾಯಿಸಿದ ಸಿಬ್ಬಂದಿ ಗಾಯಾಳುಗಳ ರಕ್ಷಣೆಯಲ್ಲಿ ತೊಡಗಿದ್ದಾರೆ. ಗಾಯಾಳುಗಳನ್ನು ಆಸ್ಪತ್ರೆಗೆ ಸಾಗಿಸಲು ತಯಾರಿ ನಡೆಸುತ್ತಿದ್ದ ವೇಳೆ ಆ್ಯಂಬುಲೆನ್ಸ್​ಗೆ ಚೆನ್ನೈನಿಂದ ತಿರುಚ್ಚಿ ಕಡೆಗೆ ವೇಗವಾಗಿ ಬರುತ್ತಿದ್ದ ಮಿನಿಬಸ್​ ಒಂದು ಡಿಕ್ಕಿ ಹೊಡೆದಿದೆ.

ಮಿನಿಬಸ್​ ಡಿಕ್ಕಿ ಹೊಡೆದ ರಭಸಕ್ಕೆ ಆ್ಯಂಬುಲೆನ್ಸ್​ ಚಾಲಕ ರಾಜೇಂದ್ರನ್​, ಗಾಯಾಳುಗಳ ನೆರವಿಗೆ ಧಾವಿಸಿದ್ದ ಕುಪ್ಪುಸ್ವಾಮಿ, ಕವಿಪ್ರಿಯ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಘಟನೆಯಲ್ಲಿ ಗಾಯಗೊಂಡವರನ್ನು ಪೆರಂಬಲೂರಿನ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಪೊಲೀಸ್​ ಅಧಿಕಾರಿ ಒಬ್ಬರು ತಿಳಿಸಿದ್ಧಾರೆ.

ಮಿನಿಬಸ್​-ಆ್ಯಂಬುಲೆನಸ್​ ನಡುವಿನ ಅಪಘಾತದ ಕುರಿತು ಸಂತಾಪ ಸೂಚಿಸಿರುವ ತಮಿಳುನಾಡು ಮುಖ್ಯಮಂತ್ತಿ ಎಂ.ಕೆ. ಸ್ಟಾಲಿನ್​ ಮೃತರ ಕುಟುಂಬಗಳಿಗೆ ತಲಾ 2 ಲಕ್ಷ ರೂ., ಗಾಯಾಳುಗಳಿಗೆ 50,000 ಸಾವಿರ ರೂ. ಪರಿಹಾರವನ್ನು ಘೋಷಿಸಿದ್ಧಾರೆ.

https://www.vijayavani.net/1-bsf-jawan-killed-2-assam-rifles-personnel-injured-in-manipurs-serou

https://www.vijayavani.net/18-year-old-killed-by-four-friends-over-splitting-rs-10000-food-bill