ಆರಂಭದಲ್ಲಿ ಪೂರ್ಣಿಮಾ ಶ್ರೀನಿವಾಸ್ ಅವರಿಗೆ ಸಚಿವೆ ಸ್ಥಾನ ಸಿಗಲಿದೆ, ಜೊಲ್ಲೆಯನ್ನು ಕೈಬಿಡಲಾಗುತ್ತೆ ಎಂಬ ಸುದ್ದಿ ಹರಡಿತ್ತು. ಈ ಹಿನ್ನೆಲೆಯಲ್ಲಿ ಜೊಲ್ಲೆ ದೆಹಲಿಯಲ್ಲಿ ಬೀಡುಬಿಟ್ಟಿದ್ದರು. 'ನೀವು ಸಚಿವರಾಗಿ ಆಯ್ಕೆಯಾಗಿದ್ದೀರಿ' ಎಂದು ಸಿಎಂ ಅವರಿಂದ ಇಂದು ಬೆಳಗ್ಗೆ ಮೊಬೈಲ್ ಕರೆ ಹೋಗುತ್ತಿದ್ದಂತೆ ಜೊಲ್ಲೆ ಬೆಂಗಳೂರಿಗೆ ವಿಮಾನ ಮೂಲಕ ಆಗಮಿಸಿದರು. ಪತಿ ಅಣ್ಣಾಸಾಹೇಬ ಕೂಡ ಜೊಲ್ಲೆ ಜತೆಯಲ್ಲಿದ್ದರು. ಶಶಿಕಲಾ ಜೊಲ್ಲೆ ಆಗಮನಕ್ಕಾಗಿ ಏರ್ಪೋರ್ಟ್ನಿಂದ ರಾಜಭವನದವರೆಗೂ ಝೀರೋ ಟ್ರಾಫಿಕ್ ವ್ಯವಸ್ಥೆ ಮಾಡಲಾಗಿತ್ತು. ಉನ್ನತ ಅಧಿಕಾರಿಗಳ ಆದೇಶದಂತೆ ಸಂಚಾರಿ ಪೊಲೀಸರು ಝೀರೋ ಟ್ರಾಫಿಕ್ ವ್ಯವಸ್ಥೆ ಮಾಡಿದ್ದರು. ಅಂತೂ 25 ನಿಮಿಷ ತಡವಾಗಿ ಆಗಮಿಸಿದ ಜೊಲ್ಲೆ, ಪ್ರಮಾಣವಚನ ಸ್ವೀಕರಿಸಿ ಗೆಲುವಿನ ನಗೆ ಬೀರಿದರು.
