ಈ ಬಜೆಟ್ನಲ್ಲಿ ಗಮನಸೆಳೆದ ಅಂಶವೆಂದರೆ, ವಿತ್ತ ಸಚಿವರ ಆತ್ಮವಿಶ್ವಾಸ ಮತ್ತು ಯಾವುದೇ ಗೊಂದಲಗಳಿಲ್ಲದೆ ಸ್ಪಷ್ಟತೆಯಿಂದ ಕೂಡಿದ ನೀತಿಗಳು. ‘ಚುನಾವಣೆ ಬಜೆಟ್’ನ ಮೊರೆ ಹೋಗದೆ, ಅವರು ಹಲವು ಸಂದೇಶ ರವಾನಿಸಿದ್ದಾರೆ. ಹತ್ತು ವರ್ಷಗಳಲ್ಲಿ ಮಾಡಿರುವ ಸುಧಾರಣೆಗಳು, ಆರ್ಥಿಕತೆಯ ಏರುಗತಿ, ಉದ್ಯೋಗ ಸೃಷ್ಟಿ ಸೇರಿದಂತೆ ಮಹತ್ವದ ಕ್ರಮಗಳೇ ಅಭಿವೃದ್ಧಿಯ ಇಂಜಿನ್ ಅನ್ನು ಸರಿಯಾದ ಹಾದಿಯಲ್ಲಿ ತೆಗೆದುಕೊಂಡು ಹೋಗಲಿವೆ ಎಂಬ ವಿಶ್ವಾಸ ವಿತ್ತ ಸಚಿವರದ್ದು. ಮೂಲಸೌಕರ್ಯ ರಂಗಕ್ಕೆ ಶೇಕಡ 11ರಷ್ಟು ಬಜೆಟ್ ಹೆಚ್ಚಿಸುವ ಮೂಲಕ, ರೈಲ್ವೆ, ವಿಮಾನಜಾಲದ ವಿಸ್ತರಣೆಗೆ ಅನುವು ಮಾಡಿಕೊಟ್ಟಿದ್ದಾರೆ. ‘ಉಡಾನ್’ ಯೋಜನೆಯಡಿ ಮತ್ತಷ್ಟು ನಗರಗಳಲ್ಲಿ ವಿಮಾನನಿಲ್ದಾಣಗಳ ಸ್ಥಾಪನೆಯಾಗಲಿದೆ. ನಾಲ್ಕು ಸಾವಿರ ರೈಲ್ವೆ ಬೋಗಿಗಳಿಗೆ ವಂದೇಭಾರತ್ನ ಸೌಲಭ್ಯಗಳು ದೊರೆಯಲಿರುವುದರಿಂದ ಶ್ರೀಸಾಮಾನ್ಯರೂ ಉತ್ತಮ ಪ್ರಯಾಣದ ಅನುಭವ ಪಡೆಯಲು ಸಾಧ್ಯವಾಗಲಿದೆ. ಮೂರು ಕೋಟಿ ಮಹಿಳೆಯರನ್ನು ‘ಲಕ್ಷಾಧಿಪತಿ ದೀದಿ’ಯನ್ನಾಗಿಸಲು ನಿರ್ಧರಿಸಿರುವುದು, ಮಹಿಳಾ ಸಬಲೀಕರಣ ನಿಟ್ಟಿನಲ್ಲಿ ಪೂರಕ ಹೆಜ್ಜೆ.
