ನಾಯಿ ಸಾಕಬೇಕಂದ್ರೆ ಈ ನಗರದಲ್ಲಿ ಇನ್ಮುಂದೆ ತೆರಿಗೆ ಪಾವತಿಸಬೇಕಂತೆ!

ಮಧ್ಯಪ್ರದೇಶ: ನಗರದ ಶುಚಿತ್ವವನ್ನು ಕಾಪಾಡುವ ನಿಟ್ಟಿನಲ್ಲಿ ನಾಯಿ ಸಾಕುವ ಮಾಲೀಕರು ಇನ್ನು ಮುಂದೆ ತೆರಿಗೆ ಪಾವತಿಸಬೇಕು ಎಂಬ ಹೊಸ ಕಾನೂನನ್ನು ಇದೀಗ ಸಾಗರ​ ಜಿಲ್ಲೆಯ ನಗರ ಪಾಲಿಕೆ 40 ಮಂದಿ ಸದಸ್ಯರು ಇತ್ತೀಚಿನ ಸಾಮಾನ್ಯ ಸಭೆಯಲ್ಲಿ ಸರ್ವಾನುಮತದ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ ಎಂದು ವರದಿಯಾಗಿದೆ.

ವರದಿಯ ಪ್ರಕಾರ ಈ ಬಗ್ಗೆ ಕಾನೂನು ತಜ್ಞರೊಂದಿಗೆ ಸಮಾಲೋಚನೆ ನಡೆಸಲಾಗಿದ್ದು, ಮುಂದಿನ ಏಪ್ರಿಲ್ ವೇಳೆಗೆ ನೂತನ ಕಾನೂನು ಜಾರಿಯಾಗಬಹುದು ಎನ್ನಲಾಗಿದೆ. ಈಗಾಗಲೇ ದೆಹಲಿ, ಪ್ರಯಾಗ್​ರಾಜ್ ಮುಂತಾದ ಮಹಾನಗರಗಳಲ್ಲಿ ಸಾಕು ಪ್ರಾಣಿಗಳಿಗೆ ತೆರಿಗೆ ಸಂಗ್ರಹ ಮಾಡಲಾಗುತ್ತಿದೆ.

ನಗರದಲ್ಲಿ ಬೀದಿ ನಾಯಿಗಳ ಸಮಸ್ಯೆ ಹೆಚ್ಚಾಗುತ್ತಿದೆ. ಮುಖ್ಯವಾಗಿ ಮಾಲೀಕರು ತಮ್ಮ ನಾಯಿಗಳನ್ನು ರಸ್ತೆ ಬದಿಗೆ ಕರೆತಂದು ಮಲವಿಸರ್ಜನೆ ಮಾಡಿಸುತ್ತಾರೆ. ಇದರಿಂದ ಸಾರ್ವಜನಿಕ ಸ್ಥಳ ಹೆಚ್ಚು ಕೊಳಕಾಗುತ್ತದೆ. ಹೀಗಾಗಿ ಈ ನಿರ್ಧಾರ ತೆಗೆದುಕೊಳ್ಳಲು ಮುಂದಾಗಿದ್ದೇವೆ ಎಂದು ಸಾಗರ್​​ನ ನಗರ ಪಾಲಿಕೆ ಆಯುಕ್ತ ಚಂದ್ರಶೇಖರ ಶುಕ್ಲಾ ಹೇಳಿದ್ದಾರೆ.

ಸಾಗರದ ಎಲ್ಲಾ ನಗರ ಪಾಲಿಕೆ ವಾರ್ಡ್‌ಗಳು ಕಟ್ಟುನಿಟ್ಟಾಗಿ ನಾಯಿಗಳು ಎಷ್ಟಿವೆ ಎಂದು ನೋಂದಣಿ ಮಾಡಿಕೊಂಡು, ರೋಗನಿರೋಧಕ ಚುಚ್ಚುಮದ್ದು ನೀಡಬೇಕು. ನಂತರ ಶುಲ್ಕ ವಿಧಿಸಲು ನಿರ್ಧರಿಸಲಾಗಿದೆ. ಈ ನಿರ್ಧಾರವನ್ನು ಕೆಲವು ನಾಯಿ ಮಾಲೀಕರು ಸರಿಯಲ್ಲ ಎಂದು ವಿರೋಧಿಸಿದ್ದಾರೆ. ನಾಯಿ ಸಾಕಲು ತೆರಿಗೆ ವಿಧಿಸುತ್ತದೆ ಎಂದಾದರೆ, ನಾಯಿಗಳ ಮಲವಿಸರ್ಜನೆ ಇತ್ಯಾದಿ ಜಾಗಗಳಿಗೆ ಪಾಲಿಕೆ ಪ್ರತ್ಯೇಕ ಸ್ಥಳ ಒದಗಿಸಬೇಕು ಎಂದು ಕೆಲವರು ಬೇಡಿಕೆ ಸಲ್ಲಿಸಿದ್ದಾರೆ. (ಏಜೆನ್ಸೀಸ್)

https://www.vijayavani.net/punjab-dear-lohri-makar-sankranti-bumper-lottery/

https://www.vijayavani.net/miss-usa-rbonney-gabriel-crowned-miss-universe/

https://www.vijayavani.net/pune-civic-body-officials-take-action-against-citizens-spitting-on-roads/