ಕೂಲಿ ಕಾರ್ಮಿಕನಿಂದ ಕೋಟ್ಯಂತರ ರೂಪಾಯಿ ಜಿಎಸ್​ಟಿ ವಂಚನೆ! ಪ್ರಕರಣದ ಹಿಂದಿದೆ ದೊಡ್ಡ ಕಥೆ

ರಾಂಚಿ: ಜಿಎಸ್​ಟಿ ಪರಿಚಯವಾದಾಗಿನಿಂದ ಜಿಎಸ್​ಟಿ ವಂಚಕರ ಸಂಖ್ಯೆಯೂ ಹೆಚ್ಚಾಗಿದೆ. ಅದೇ ರೀತಿ 3.5 ಕೋಟಿ ರೂಪಾಯಿ ಜಿಎಸ್​ಟಿ ವಂಚನೆ ಮಾಡಿದ್ದ ವ್ಯಕ್ತಿಯೊಬ್ಬನನ್ನು ಅರೆಸ್ಟ್​ ಮಾಡಲು ಹೋದ ಪೊಲೀಸರಿಗೆ ಅಚ್ಚರಿ ಕಾದಿತ್ತು. ಆ ಪ್ರಮಾಣದ ಮೋಸ ಮಾಡಿದ್ದು ಒಬ್ಬ ಸಾಮಾನ್ಯ ಕೂಲಿ ಕಾರ್ಮಿಕ!

ಹೌದು, ಇದು ಸತ್ಯವೇ. ಜಾರ್ಖಂಡ್‌ನ ಪೂರ್ವ ಸಿಂಗ್‌ಭೂಮ್ ಜಿಲ್ಲೆಯ ಮೊಸಾಬೊನಿ ಬ್ಲಾಕ್‌ನ ರೈಪಹರಿ ಗ್ರಾಮದ ಒಬ್ಬ ಸಾಮಾನ್ಯ ಕೂಲಿ ಕಾರ್ಮಿಕ, ಪ್ರತಿದಿನ ನರೇಗಾ ಯೋಜನೆಯಲ್ಲಿ ಸರಿ ಸುಮಾರು 200 ರೂಪಾಯಿ ದುಡಿಯವವನೇ ಈ ಮೋಸ ಮಾಡಿದ್ದು. ಈತ ಬಹುಕೋಟಿ ರೂಪಾಯಿ ಮೌಲ್ಯದ ಕಂಪನಿಯೊಂದರ ಮಾಲೀಕ. ಈತನ ಹೆಸರಿನಲ್ಲಿ ಎಂಎಸ್​ ಸ್ಟೀಲ್​ ಹೆಸರಿನ ಸ್ಟೀಲ್​ ಕಂಪನಿಯಿದೆ. ಆ ಕಂಪನಿಯ 5.58 ಕೋಟಿ ವ್ಯವಹಾರ 3.5 ಕೋಟಿ ರೂಪಾಯಿ ಜಿಎಸ್​ಟಿ ವಂಚನೆಯಾಗಿರುವುದಾಗಿ ದೂರು ದಾಖಲಾಗಿದೆ.

ಇದನ್ನೂ ಓದಿ: ಮುಖದ ಮೇಲಿರುವ ಪಿಗ್ಮಂಟೇಷನ್​, ಬಿಳಿಕೂದಲು ಹೋಗಲಾಡಿಸಲು ಏನು ಮಾಡಬೇಕು?

ಕೂಲಿ ಕಾರ್ಮಿಕನ ಸರಿಯಾದ ವಿಚಾರಣೆ ನಡೆಸಿದ ನಂತರ ನಿಜಾಂಶ ಹೊರಬಿದ್ದಿದೆ. ನಿಜಕ್ಕೂ ಆ ಕೂಲಿ ಕಾರ್ಮಿಕನಿಗೂ ಕಂಪನಿಗೂ ಯಾವುದೇ ಸಂಬಂಧವೇ ಇಲ್ಲ. ಯಾರೊ ದುಷ್ಕರ್ಮಿಗಳು ಈತನ ಪಾನ್​ ಕಾರ್ಡ್​ ಮತ್ತು ಆಧಾರ್​ ಕಾರ್ಡ್​ ಬಳಸಿ ಈ ಮೋಸ ಮಾಡಿದ್ದಾರೆ.

2018ರಲ್ಲಿ ಈ ಕೂಲಿಕಾರ್ಮಿಕನಿಗೆ ಪ್ರತಿ ತಿಂಗಳು ಖಾತೆಗೆ ನೇರವಾಗಿ 2 ಸಾವಿರ ರೂಪಾಯಿ ಬರುವಂತೆ ಮಾಡುವುದಾಗಿ ಈತನ ಸೋದರಳಿಯ ಬೈಲಾ ಮುರ್ಮು ಹೇಳಿದ್ದನಂತೆ. ಅದಕ್ಕೆಂದು ಈತನ ಪಾಸ್​ಬುಕ್​, ಪ್ಯಾನ್​ ಕಾರ್ಡ್​ ಮತ್ತು ಆಧಾರ್​ ಕಾರ್ಡ್​ನ್ನು ತೆಗೆದುಕೊಂಡು ಹೋಗಿದ್ದನಂತೆ. ಈ ದಾಖಲೆಗಳನ್ನು ಆತನ ಸಂಬಂಧಿ ಸುನಾರಾಮ್​ ಹೆಂಬ್ರಾಮ್​ ಅವರಿಗೆ ನೀಡಲಾಗಿದೆ. ಅಲ್ಲಿಂದ ದಾಖಲೆಯನ್ನು ಸುಶಾಂತ್​ ಕುಮಾರ್​ ಸಮಂತೊ ಹೆಸರಿನವರಿಗೆ ನೀಡಲಾಗಿದೆ. ನಂತರ ಏನಾಯಿತು ಎನ್ನುವುದರ ಬಗ್ಗೆ ಕಾರ್ಮಿಕನಿಗೂ ಮಾಹಿತಿ ಇಲ್ಲ. ಯಾವುದೇ ಹಣವೂ ನನ್ನ ಖಾತೆಗೆ ಬಂದಿಲ್ಲ ಎಂದು ಆತ ಹೇಳಿದ್ದಾನೆ.

ಇದನ್ನೂ ಓದಿ: ಮದುವೆಗೆ ಮೂರು ದಿನವಿದ್ದಾಗ ಮರ್ಮಾಂಗವೇ ಕಟ್! 1 ಲಕ್ಷಕ್ಕಾಗಿ ಜೀವನವನ್ನೇ ಹಾಳು ಮಾಡಿಕೊಂಡ ಯುವಕ

ಬೆಳಗ್ಗೆ ಕೆಲಸ ಮಾಡುತ್ತಿದ್ದವನನ್ನು ಬಂಧಿಸಿದ ಕಾರಣ ಗ್ರಾಮಸ್ಥರು ಠಾಣೆಯ ಎದುರು ಹೋರಾಟ ನಡೆಸಿದ್ದಾರೆ. ಕಾರ್ಮಿಕನ ತಪ್ಪಿಲ್ಲ ಎನ್ನುವುದು ಅರಿವಿಗೆ ಬಂದ ಹಿನ್ನೆಲೆಯಲ್ಲಿ ಆತನನ್ನು ಬಿಟ್ಟು ಕಳುಹಿಸಲಾಗಿದೆ. ನಿಜವಾದ ವಂಚಕರ ಪತ್ತೆಗಾಗಿ ತನಿಖೆ ನಡೆಸಲಾಗುತ್ತಿದೆ. (ಏಜೆನ್ಸೀಸ್​)

https://www.vijayavani.net/bride-leaves-from-marriage-hall/

https://www.vijayavani.net/man-strangled-his-wife-and-daughter-to-death-with-a-sharp-edged-weapon-in-front-of-his-5-year-old-son/