ಮುಂಬೈ: ‘ಕಾಂತಾರ’ ಚಿತ್ರವು ದಾಖಲೆ ಮೇಲೆ ದಾಖಲೆ ಮಾಡುತ್ತಿದೆ. ಈಗಾಗಲೇ ಒಂದಿಷ್ಟು ದಾಖಲೆ ಮತ್ತು ಹೆಗ್ಗಳಿಕೆಗಳಿಗೆ ಪಾತ್ರವಾಗಿರುವ ಚಿತ್ರವು, ಈಗ ಇನ್ನೊಂದು ಹೊಸ ದಾಖಲೆ ಮಾಡಿದೆ. ಟಾಮ್ ಕ್ರೂಸ್ ಅಭಿನಯದ ಹಾಲಿವುಡ್ ಚಿತ್ರವನ್ನೂ ಕಲೆಕ್ಷನ್ನಲ್ಲಿ ಹಿಂದಿಕ್ಕಿದೆ.
ಇದನ್ನೂ ಓದಿ: ಕೊಚ್ಚಿನ್ನಿಂದ ಮುಂಬೈವರೆಗೆ; ರಿಷಭ್ ಶೆಟ್ಟಿ ಹೊಸ ಪ್ರಯಾಣ
ಟಾಮ್ ಕ್ರೂಸ್ ಅಭಿನಯದ ‘ಟಾಪ್ ಗನ್: ಮ್ಯಾವರಿಕ್’ ಚಿತ್ರವು ಕೆಲವು ವಾರಗಳ ಹಿಂದೆ ಭಾರತದಲ್ಲಿ ಬಿಡುಗಡೆಯಾಗಿತ್ತು. ಸಾಕಷ್ಟು ನಿರೀಕ್ಷೆಗಳೊಂದಿಗೆ ಚಿತ್ರ ಬಿಡುಗಡೆಯಾದರೂ, ಒಟ್ಟಾರೆ ಇಡೀ ದೇಶದಲ್ಲಿ ಚಿತ್ರ ಗಳಿಸಿದ ಮೊತ್ತ ಬರೀ 35 ಕೋಟಿ ಮಾತ್ರ. ‘ಕಾಂತಾರ’ ಚಿತ್ರದ ಹಿಂದಿ ಅವತರಣಿಕೆಯೊಂದೇ ಉತ್ತರ ಭಾರತದಲ್ಲಿ 36.95 ಕೋಟಿ ರೂ.ಗಳನ್ನು ದುಡಿದು, ಆ ಚಿತ್ರವನ್ನು ಹಿಂದಿಕ್ಕಿದೆ. ಇಲ್ಲಿಂದ ಮುಂದೆ ಇನ್ನಷ್ಟು ಚಿತ್ರಗಳು ಇದ್ದು, ಆ ಚಿತ್ರಗಳ ದಾಖಲೆಗಳನ್ನು ಸಹ ‘ಕಾಂತಾರ’ ಮುರಿಯುತ್ತದಾ ಎಂಬ ಕುತೂಹಲ ಎಲ್ಲರಿಗೂ ಇದೆ.
‘ಕಾಂತಾರ’ ಚಿತ್ರದ ಕಲೆಕ್ಷನ್ ಮೂರನೆಯ ವಾರದಲ್ಲೂ ಅತ್ಯುತ್ತಮವಾಗಿದ್ದು, ಶನಿವಾರ (ಅ.29) ಮೂರು ಕೋಟಿ ಗಳಿಕೆಯಾಗಿದೆ. ಒಂದು ಕಡೆ ಬಿಡುಗಡೆಯಾದ ಹೊಸ ಹಿಂದಿ ಚಿತ್ರಗಳೇ ಮಕಾಡೆ ಮಲಗುತ್ತಿದ್ದರೆ, ಇನ್ನೊಂದು ಕಡೆ ಕನ್ನಡದಿಂದ ಹಿಂದಿಗೆ ಡಬ್ ಆಗುತ್ತಿರುವ ಚಿತ್ರವೊಂದು ಈ ತರಹದ ಕಲೆಕ್ಷನ್ ಮಾಡುತ್ತಿರುವುದು ವಿಶೇಷ. ಕಳೆದ ವಾರ ಬಿಡುಗಡೆಯಾದ ‘ರಾಮ್ ಸೇತು’ ಮತ್ತು ‘ಥ್ಯಾಂಕ್ ಗಾಡ್’ ಚಿತ್ರಗಳಿಗೆ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಇದರಿಂದ ‘ಕಾಂತಾರ’ಕ್ಕೆ ಉತ್ತರ ಭಾರತದಲ್ಲಿ ಚಿತ್ರಕ್ಕೆ ಶೇ. 25ರಷ್ಟು ಪ್ರದರ್ಶನಗಳು ಹೆಚ್ಚಾಗಿವೆ.
ಇದನ್ನೂ ಓದಿ: ಧ್ರುವ ಸರ್ಜಾ ಅಭಿನಯದ ಹೊಸ ಚಿತ್ರ ‘ಕೆಡಿ’ಗೆ ಶ್ರೀಲೀಲಾ ನಾಯಕಿ?
‘ಕಾಂತಾರ’ ಚಿತ್ರದಲ್ಲಿ ರಿಷಭ್ ಶೆಟ್ಟಿ, ಸಪ್ತಮಿ ಗೌಡ, ಅಚ್ಯುತ್ ಕುಮಾರ್, ಕಿಶೋರ್ ಮುಂತಾದವರು ಅಭಿನಯಿಸಿದ್ದಾರೆ. ಹೊಂಬಾಳೆ ಫಿಲಂಸ್ನಡಿ ಈ ಚಿತ್ರವನ್ನು ವಿಜಯ್ ಕುಮಾರ್ ಕಿರಗಂದೂರು ನಿರ್ಮಿಸಿದ್ದಾರೆ.
‘ರಾಮ್ ಸೇತು’, ‘ಥ್ಯಾಂಕ್ ಗಾಡ್’ಗೆ ನೀರಸ ಪ್ರತಿಕ್ರಿಯೆ; ‘ಕಾಂತಾರ’ಗೆ ಹೆಚ್ಚಿದ ಬೇಡಿಕೆ