‘ಕಬ್ಜ’ ಚಿತ್ರದ ಕಥೆ ಏನು ಎಂದರೆ ಇಷ್ಟು ಹೇಳಬಹುದು. ಮಿಕ್ಕಂತೆ ‘ಕಬ್ಜ’ ಚಿತ್ರವನ್ನು ಅಷ್ಟು ಸುಲಭಕ್ಕೆ ಹಿಡಿದಿಡುವುದಕ್ಕೆ ಸಾಧ್ಯವಿಲ್ಲ. ಏಕೆಂದರೆ, ಇಲ್ಲಿ ಅಸಂಖ್ಯ ಪಾತ್ರಗಳಿವೆ, ಆ ಪಾತ್ರಗಳಿಗೆ ಚಿತ್ರ-ವಿಚಿತ್ರ ಹೆಸರುಗಳಿವೆ, ಹಲವು ತಿರುವುಗಳಿವೆ, ಬೇರೆಬೇರೆ ಕಾಲಘಟ್ಟಗಳಿವೆ. ಹಾಗಾಗಿ, ಅವೆಲ್ಲವನ್ನೂ ನೆನಪಿನಲ್ಲಿಟ್ಟುಕೊಂಡು ವಿವರಿಸುವುದು ಅಷ್ಟು ಸುಲಭವಲ್ಲ. ಇಷ್ಟಕ್ಕೂ ಚಿತ್ರಮಂದಿರದ ಹೊರಬಂದ ಮೇಲೆ ನೋಡಿದ್ದೆಲ್ಲವೂ ನೆನಪಿನಲ್ಲುಳಿಯುತ್ತದೆ ಎಂದು ಹೇಳುವುದು ಸಹ ಕಷ್ಟ. ಅದಕ್ಕೆ ಕಾರಣಗಳೂ ಇವೆ. ಮೊದಲನೆಯದಾಗಿ ಇದೊಂದು ಜಟಿಲವಾದ ಚಿತ್ರಕಥೆ. ಚಿತ್ರ ಮೊದಲು ಈಗಿನ ಕಾಲಘಟ್ಟದಲ್ಲಿ ಪ್ರಾರಂಭವಾಗಿ, ಸ್ವಾತಂತ್ರ್ಯಪೂರ್ವಕ್ಕೆ ಹೋಗಿ, ಕೊನೆಗೆ 1975ರಲ್ಲಿ ಮುಕ್ತಾಯವಾಗುತ್ತದೆ. ಹೀಗೆ ಕಥೆ ಹಲವು ಕಾಲಘಟ್ಟಗಳಲ್ಲಿ ಮತ್ತು ಅಸಂಖ್ಯ ಪಾತ್ರಗಳ ನಡುವೆ ಸಾಗುವುದರಿಂದ ಅಷ್ಟಾಗಿ ಸ್ಪಷ್ಟತೆ ಸಿಗುವುದಿಲ್ಲ. ಎರಡನೆಯದಾಗಿ, ‘ಕಬ್ಜ’ ಇನ್ನೂ ಮುಗಿದಿಲ್ಲ.
