ಇಂದು ಟೀಮ್​ ಇಂಡಿಯಾ ಗೆಲ್ಲಬೇಕಾದ್ರೆ ರೋಹಿತ್​ ಶರ್ಮ ಸ್ವಾರ್ಥಿ ಆಗಲೇಬೇಕು! ಅಚ್ಚರಿ ಕಾರಣ ಹೀಗಿದೆ... Rohit Sharma

Rohit Sharma : ರೋಹಿತ್ ಶರ್ಮ ನೇತೃತ್ವದಲ್ಲಿ ಟೀಮ್​ ಇಂಡಿಯಾ ಮತ್ತೊಮ್ಮೆ ಐಸಿಸಿ ಟೂರ್ನಿಯ ಫೈನಲ್‌ ಅಖಾಡಕ್ಕೆ ಇಳಿದಿದೆ. ಇಂದು (ಮಾ.09) ನಡೆಯುತ್ತಿರುವ ಚಾಂಪಿಯನ್ಸ್​ ಟ್ರೋಫಿಯ ಫೈನಲ್​ ಪಂದ್ಯವನ್ನೂ ಸೇರಿ ಟೀಮ್​ ಇಂಡಿಯಾ ನಾಯಕ ರೋಹಿತ್​, 4 ಪ್ರಮುಖ ಐಸಿಸಿ ಫೈನಲ್‌ಗಳಲ್ಲಿ ಭಾಗವಹಿಸಿದ ಹೆಗ್ಗಳಿಕೆಯನ್ನು ಸಾಧಿಸಿದ್ದಾರೆ. ಈ ಪಂದ್ಯಾವಳಿಯಲ್ಲಿ ಅವರ ವೃತ್ತಿಜೀವನದ ಪುನರುಜ್ಜೀವನವು ಕೂಡ ಇದೆ. 2013ರಲ್ಲಿ ಆಗಿನ ನಾಯಕ ಎಂಎಸ್ ಧೋನಿ ಅವರು ರೋಹಿತ್ ಅವರನ್ನು ಆರಂಭಿಕ ಆಟಗಾರನ ಸ್ಥಾನಕ್ಕೆ ತಳ್ಳಿದರು ಮತ್ತು ಉಳಿದದ್ದು ಇತಿಹಾಸ ಎಂಬುದು ನಿಮಗೆ ಗೊತ್ತಿದೆ.

ರೋಹಿತ್ 183 ಇನ್ನಿಂಗ್ಸ್‌ಗಳಲ್ಲಿ ಭಾರತ ಪರ ಆರಂಭಿಕನಾಗಿ 9062 ರನ್ ಗಳಿಸಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ನಾಯಕನಾಗಿ ರೋಹಿತ್​, ತಂಡಕ್ಕಾಗಿ ನಿಸ್ವಾರ್ಥ ಆಟದ ವಿಧಾನವನ್ನು ಅಳವಡಿಸಿಕೊಂಡಿದ್ದಾರೆ. ತಾಳ್ಮೆಯ ಆಟವನ್ನು ಪಕ್ಕಕ್ಕಿಟ್ಟು ಹೊಡಿಬಡಿ ಆಟಕ್ಕೆ ಮುಂದಾಗಿದ್ದಾರೆ. ಆರಂಭದಿಂದಲೇ ಬೌಲರ್‌ಗಳನ್ನು ಆಕ್ರೋಶದಿಂದ ಎದುರಿಸುತ್ತಿದ್ದಾರೆ. 2023ರ ಏಕದಿನ ವಿಶ್ವಕಪ್‌ನಲ್ಲಿ ರೋಹಿತ್ 125.94 ರ ಸ್ಟ್ರೈಕ್​​ರೇಟ್‌ನಲ್ಲಿ 597 ರನ್ ಗಳಿಸುವ ಮೂಲಕ ಅದ್ಭುತ ಯಶಸ್ಸನ್ನು ಕಂಡರು. ಅದೇ ರೀತಿ ಈಗ ಎರಡೂ ದಿಕ್ಕುಗಳಲ್ಲಿ ಹೋಗಬೇಕಾಗಿದೆ. ಇದೇ ವಿಧಾನವನ್ನು ಕೆರಿಬಿಯನ್‌ನಲ್ಲಿ ನಡೆದ ಟಿ20 ವಿಶ್ವಕಪ್ ಮತ್ತು ತವರಿನಲ್ಲಿ ನಡೆದ ಏಕದಿನ ವಿಶ್ವಕಪ್​ನಲ್ಲಿ ಅಳವಡಿಸಿಕೊಂಡಿದ್ದರು.

ರೋಹಿತ್​ ಅವರ ಆಟದ ಸ್ವಭಾವ ಹೇಗಿದೆ ಅಂತ ಸುಲಭವಾಗಿ ಹೇಳಬಹುದು. ಆದರೆ, ಇಂದಿನ ಪಂದ್ಯದಲ್ಲಿ ರೋಹಿತ್​, ಸ್ವಲ್ಪ ಹೆಚ್ಚು 'ಸ್ವಾರ್ಥಿ' ಆಗಿರಬೇಕು ಮತ್ತು ತಮ್ಮದೇ ಆದ ಇನ್ನಿಂಗ್ಸ್ ಮತ್ತು ಸ್ವಲ್ಪ ಆಳವಾಗಿ ಆಡುವ ಬಗ್ಗೆ ಯೋಚಿಸಬೇಕು. ಅಂದರೆ, ಹೆಚ್ಚು ಹೊತ್ತು ಕ್ರೀಸ್​ನಲ್ಲಿ ನಿಲ್ಲುವುದರ ಬಗ್ಗೆ ರೋಹಿತ್ ಚಿಂತಿಸಬೇಕು. ರೋಹಿತ್​ ಅವರು 4 ಪಂದ್ಯಗಳಲ್ಲಿ ಕೇವಲ 104 ರನ್ ಗಳಿಸಿದ್ದಾರೆ. ತಂಡಕ್ಕೆ ಉತ್ತಮ ಆರಂಭ ನೀಡುವ ಹುಡುಕಾಟದಲ್ಲಿ ಬೇಗನೆ ವಿಕೆಟ್​ ಒಪ್ಪಿಸಿದ್ದಾರೆ. ಈ ವಿಧಾನವನ್ನು ಕೋಚ್ ಗೌತಮ್ ಗಂಭೀರ್ ಸಮರ್ಥಿಸಿಕೊಂಡಿದ್ದರೂ ನಾಯಕ ರೋಹಿತ್​, ತಮ್ಮ ವಿಧಾನವನ್ನು ಮರು ವಿಶ್ಲೇಷಿಸುವ ಅಗತ್ಯವಿದೆ ಎಂದು ಸುನಿಲ್ ಗವಾಸ್ಕರ್ ಭಾವಿಸುತ್ತಾರೆ.

ಇದನ್ನೂ ಓದಿ: ಈ ರೀತಿನೂ ಆಮ್ಲೆಟ್​ ಮಾಡ್ತಾರಾ? ನಾನಾ ಪಾಟೇಕರ್​ ಅಡುಗೆ ತಂತ್ರಕ್ಕೆ ಆಶಿಶ್ ವಿದ್ಯಾರ್ಥಿ ಫಿದಾ! Ashish Vidyarthi

ರೋಹಿತ್​ ಅವರು ಸ್ವಲ್ಪ ಯೋಚಿಸಬೇಕು. ಆಕ್ರಮಣಕಾರಿಯಾಗಿ ಆಡುವುದು ಒಂದು ವಿಷಯವೇ ಇರಬಹುದು. ಆದರೆ, 25 ರಿಂದ 30 ಓವರ್‌ಗಳವರೆಗೆ ಬ್ಯಾಟಿಂಗ್ ಮಾಡಲು ಅವಕಾಶ ನೀಡಲು ಎಲ್ಲೋ ಸ್ವಲ್ಪ ವಿವೇಚನೆ ಇರಬೇಕು. ಅವರು ಹಾಗೆ ಮಾಡಿದರೆ, ಅವರು ಎದುರಾಳಿಗಳಿಂದ ಪಂದ್ಯವನ್ನು ಬಹಳ ದೂರ ತೆಗೆದುಕೊಂಡು ಹೋಗುತ್ತಾರೆ. ಅಂದರೆ, ಟೀಮ್​ ಇಂಡಿಯಾಗೆ ಗೆಲುವು ತುಂಬಾ ಸುಲಭವಾಗುತ್ತದೆ ಎಂದು ಸುನೀಲ್​ ಗವಾಸ್ಕರ್​ ಹೇಳಿದ್ದಾರೆ.

ರೋಹಿತ್​ ನೀವೊಬ್ಬ ಬ್ಯಾಟ್ಸ್‌ಮನ್ ಆಗಿ 25 ರಿಂದ 30 ರನ್ ಗಳಿಸಿದ್ದಕ್ಕೆ ಸಂತೋಷವಾಗಿದ್ದೀರಾ? ನೀವು ಹಾಗೆ ಮಾಡಬಾರದು. ಹಾಗಾಗಿ ನಾನು ಅವರಿಗೆ ಹೇಳುವುದೇನೆಂದರೆ, ಕೇವಲ ಏಳು, ಎಂಟು ಅಥವಾ ಒಂಬತ್ತು ಓವರ್‌ಗಳ ಬದಲಿಗೆ 25 ಓವರ್‌ಗಳಿಗೆ ಬ್ಯಾಟಿಂಗ್ ಮಾಡಿದರೆ ತಂಡದ ಮೇಲೆ ನಿಮ್ಮ ಪ್ರಭಾವ ಇನ್ನೂ ಹೆಚ್ಚಾಗುತ್ತದೆ ಎಂದು ಗವಾಸ್ಕರ್​ ಅವರು ರೋಹಿತ್​ಗೆ ಪ್ರಮುಖ ಸಲಹೆ ನೀಡಿದ್ದಾರೆ.

ನೀವು ರೋಹಿತ್ ಶರ್ಮ ಅವರ ಐದು ಏಕದಿನ ಪಂದ್ಯಗಳ ಅತ್ಯುತ್ತಮ ಸ್ಕೋರ್‌ಗಳನ್ನು ನೋಡಿದರೆ, ಅವು 264 (50 ಓವರ್‌ಗಳ ಪಂದ್ಯದಲ್ಲಿ ಇದುವರೆಗಿನ ಅತ್ಯಧಿಕ ಸ್ಕೋರ್), 209, 208, 171 ಮತ್ತು 162 ಇವೆ. ಈ ಎಲ್ಲ ಪಂದ್ಯಗಳಲ್ಲಿ ರೋಹಿತ್​ ಶರ್ಮ ಆರಂಭದಲ್ಲಿ ಎಚ್ಚರಿಕೆಯ ವಿಧಾನವನ್ನು ಅಳವಡಿಸಿಕೊಂಡರು. ನಿಧಾನವಾಗಿ ಇನ್ನಿಂಗ್ಸ್​ ಆರಂಭಿಸಿ, ಕ್ರೀಸ್​ನಲ್ಲಿ ಗಟ್ಟಿಯಾಗಿ ನೆಲೆನಿಂತು ಅಬ್ಬರಿಸಿದರು. ಮತ್ತೊಂದು ಗಮನಾರ್ಹ ವಿಚಾರವೆಂದರೆ, ರೋಹಿತ್​, 40ನೇ ಓವರ್‌ನ ನಂತರ ಮತ್ತು ಕೆಲವೊಮ್ಮೆ ಇನ್ನಿಂಗ್ಸ್ ಮುಗಿಯುವವರೆಗೂ ಕ್ರೀಸ್​ನಲ್ಲೇ ಇದ್ದರು. ಹೀಗಾಗಿ ಇಂದು ರೋಹಿತ್​ ಅವರು ಕ್ರೀಸ್​ನಲ್ಲಿ ಹೆಚ್ಚು ಹೊತ್ತು ನಿಲ್ಲುವ ಕಡೆಗೆ ಗಮನ ಹರಿಸಬೇಕಿದೆ ಎಂದು ಗವಾಸ್ಕರ್​ ಅವರು ಹೇಳಿದ್ದಾರೆ.

ಸದ್ಯ ಟಾಸ್​ ಗೆದ್ದಿರುವ ನ್ಯೂಜಿಲೆಂಡ್​ ತಂಡ ಬ್ಯಾಟಿಂಗ್​ ಅನ್ನು ಆಯ್ದುಕೊಂಡಿದೆ. (ಏಜೆನ್ಸೀಸ್​)

https://www.vijayavani.net/champions-trophy-2025-how-much-prize-money-will-the-winner-of-the-champions-trophy-receive

https://www.vijayavani.net/summer-tips-just-follow-these-precautions-in-summer