ಡಸ್ಟಿಂಗ್​ ಚಾಲೆಂಜ್​ ಸ್ವೀಕರಿಸಿ 19ರ ಯುವತಿ ದುರಂತ ಸಾವು: ಈ ಹೊಸ ಟ್ರೆಂಡ್​ ಬಗ್ಗೆ ಇರಲಿ ಎಚ್ಚರ! Dusting challenge

Dusting challenge : ಡಸ್ಟಿಂಗ್​ ಎಂಬ ಮತ್ತೊಂದು ಸಾಮಾಜಿಕ ಜಾಲತಾಣ ರಾಕ್ಷಸ ಅಮಾಯಕ ಯುವಕರಿಗೆ ಮಾರಕವಾಗುತ್ತಿದೆ. ಅಪಾಯಕಾರಿ ಡಸ್ಟಿಂಗ್​ ಚಾಲೆಂಜ್​ ಸ್ವೀಕರಿಸಿ, ಅಮೆರಿಕದಲ್ಲಿ 19 ವರ್ಷದ ಯುವತಿ ದುರಂತ ಸಾವಿಗೀಡಾಗಿದ್ದಾಳೆ. ಈ ಘಟನೆ ಅರಿಜೋನಾದಲ್ಲಿ ನಡೆದಿದ್ದು, ಮೃತಳನ್ನು ರೆನ್ನಾ ಒ ರೂರ್ಕ್ ಎಂದು ಗುರುತಿಸಲಾಗಿದೆ.

ದಿ ಇಂಡಿಪೆಂಡೆಂಟ್ ನ್ಯೂಸ್​ ಪ್ರಕಾರ, 19 ವರ್ಷದ ರೆನ್ನಾ ಒ ರೂರ್ಕ್, ಏರೋಸಾಲ್ ಕೆಮಿಕಲ್​ ಅನ್ನು ಉಸಿರಾಡಿದ ನಂತರ ಹೃದಯಾಘಾತಕ್ಕೆ ಒಳಗಾದಳು. ತಕ್ಷಣ ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಲಾಯಿತು. ತೀವ್ರ ನಿಗಾ ಘಟಕದಲ್ಲಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ನಾಲ್ಕು ದಿನಗಳನ್ನು ಕಳೆದಳು. ಕೊನೆಗೆ ಆಕೆಯ ಮೆದುಳು ಸತ್ತಿದೆ ಎಂದು ವೈದ್ಯರು ಘೋಷಿಸಿದರು.

ರೆನ್ನಾ ಮತ್ತು ಆಕೆಯ ಗೆಳೆಯ ನಮಗೆ ಗೊತ್ತಿಲ್ಲದೇ ಏರೋಸಾಲ್ ಕೀಬೋರ್ಡ್ ಕ್ಲೀನರ್ ಅನ್ನು ಆರ್ಡರ್ ಮಾಡಿದ್ದಾರೆ ಎಂದು ರೆನ್ನಾ ಅವರ ಪಾಲಕರು ಹೇಳಿದ್ದಾರೆ. ಅಪ್ಪಾ ನೋಡ್ತಾ ಇರಿ ನಾನು ಪ್ರಸಿದ್ಧಳಾಗುತ್ತೇನೆ ಎಂದು ಹೇಳುತ್ತಿದ್ದಳು ಅಂತ ಆಕೆಯ ತಂದೆ ಆರನ್ ಒ ರೂರ್ಕ್ ನೀಡಿರುವ ಹೇಳಿಕೆಯನ್ನು ದಿ ಇಂಡಿಪೆಂಡೆಂಟ್​ ವರದಿ ಮಾಡಿದೆ.

ಡಸ್ಟಿಂಗ್​ ಚಾಲೆಂಜ್​ ಎಂದರೇನು?

ಡಸ್ಟಿಂಗ್​, ಕ್ರೋಮಿಂಗ್ ಅಥವಾ ಹಫಿಂಗ್ ಎಂದೂ ಕರೆಯುತ್ತಾರೆ. ಇದು ವೈರಲ್ ಟ್ರೆಂಡ್​ ಆಗಿದೆ. ಈ ಸವಾಲಿನಲ್ಲಿ, ಜನರು ಕೀಬೋರ್ಡ್ ಕ್ಲೀನರ್‌ಗಳಂತಹ ಮನೆಯ ಕೆಮಿಕಲ್​ಗಳನ್ನು ಸಿಂಪಡಿಸುತ್ತಾರೆ. ಮೋಜು ಮತ್ತು ಮಸ್ತಿಗಾಗಿ ತಮ್ಮ ಮೂಗಿನ ಮೂಲಕ ಉಸಿರಾಡುತ್ತಾರೆ. ಇದು ಅಮೆರಿಕದಲ್ಲಿ ಟ್ರೆಂಡಿಂಗ್ ವಿಷಯವಾಗಿದೆ. ಇದು ಅನೇಕ ರೋಗಗಳಿಗೆ ಕಾರಣವಾಗುತ್ತದೆ. ಇದು ಹೃದಯ ವೈಫಲ್ಯ ಮತ್ತು ಸಾವಿಗೂ ಕಾರಣವಾಗಬಹುದು. ಅವರು ಪಡೆಯುವ ಅಲ್ಪಾವಧಿಯ ಸಂತೋಷವು ಅವರಿಗೆ ಜೀವನಪರ್ಯಂತ ದುಃಖವನ್ನುಂಟು ಮಾಡುತ್ತದೆ ಎಂಬುದನ್ನು ಗಮನಿಸುವುದಿಲ್ಲ.

ಇದನ್ನೂ ಓದಿ: ಒಂದು ವೇಳೆ ಹಾವಿನ ಮರಿ ಕಚ್ಚಿದರೆ ಅಪಾಯ ಕಡಿಮೆಯೇ? ಇಲ್ಲಿದೆ ಉರಗ ತಜ್ಞನ ಅಚ್ಚರಿ ಉತ್ತರ! Snake Bite

19 ವರ್ಷದ ರೆನ್ನಾ ಹಾಡಲು ಇಷ್ಟಪಡುತ್ತಿದ್ದಳು ಮತ್ತು ಯಾವಾಗಲೂ ಉತ್ಸಾಹಭರಿತ ಹಾಗೂ ಹರ್ಷಚಿತ್ತದಿಂದ ಇರುತ್ತಿದ್ದಳು ಎಂದು ಅವರ ತಂದೆ ನೆನಪಿಸಿಕೊಂಡರು. ತನ್ನ ಮಗಳಿಗಾದ ಸ್ಥಿತಿ ಬೇರೆ ಯಾರಿಗೂ ಆಗಬಾರದು ಎಂಬ ದೃಢನಿಶ್ಚಯದಿಂದ ಓ'ರೂರ್ಕ್ ಕುಟುಂಬವು ಹದಿಹರೆಯದವರು ಮತ್ತು ಅವರ ಪಾಲಕರಿಗೆ ಡಸ್ಟಿಂಗ್​ ಅಪಾಯಗಳ ಬಗ್ಗೆ ಶಿಕ್ಷಣ ನೀಡುವತ್ತ ಕೆಲಸ ಮಾಡುತ್ತಿದೆ. ಅಲ್ಲದೆ, GoFundMe ಪುಟವನ್ನು ಸಹ ಪ್ರಾರಂಭಿಸಿದ್ದಾರೆ.

ಡಸ್ಟಿಂಗ್​ನಿಂದ ಏನಾಗುತ್ತದೆ?

ಕ್ರೋಮಿಂಗ್ ಮಾಡುವಾಗ, ಜನರು ಲೋಹದ ಬಣ್ಣಗಳು ಮತ್ತು ಇತರ ಉತ್ಪನ್ನಗಳಲ್ಲಿನ ಹೈಡ್ರೋಕಾರ್ಬನ್‌ಗಳನ್ನು ಉಸಿರಾಡಲು ಪ್ರಯತ್ನಿಸುತ್ತಾರೆ ಎಂದು ತಜ್ಞರು ಹೇಳುತ್ತಾರೆ. ಇದು ತುಂಬಾ ಅಪಾಯಕಾರಿ. ಇದು ಗಂಭೀರ ಅಲ್ಪಾವಧಿಯ, ದೀರ್ಘಾವಧಿಯ ಆರೋಗ್ಯ ಪರಿಣಾಮಗಳನ್ನು ಮತ್ತು ಸಾವಿಗೆ ಕಾರಣವಾಗಬಹುದು. ಕ್ರೋಮಿಂಗ್ ಪರಿಕಲ್ಪನೆಯು ಹಲವು ವರ್ಷಗಳಿಂದ ವಿವಿಧ ಹೆಸರುಗಳಲ್ಲಿ ಅಸ್ತಿತ್ವದಲ್ಲಿದೆ. ಡ್ರಗ್ ಯೂಸ್ ಅಂಡ್ ಹೆಲ್ತ್ ಕುರಿತಾದ ರಾಷ್ಟ್ರೀಯ ಸಮೀಕ್ಷೆಯ ಪ್ರಕಾರ, ಪ್ರಪಂಚದಾದ್ಯಂತ ಲಕ್ಷಾಂತರ ಜನರು ವಿಶೇಷವಾಗಿ ಹದಿಹರೆಯದವರು, ಪ್ರತಿ ವರ್ಷ ಇನ್ಹಲೇಂಟ್‌ಗಳನ್ನು ಬಳಸುತ್ತಾರೆ. ಯುನೈಟೆಡ್ ಸ್ಟೇಟ್ಸ್‌ನಲ್ಲಿ, 2015 ರಿಂದ 2022 ರವರೆಗೆ 12-17 ವರ್ಷ ವಯಸ್ಸಿನ ಮಕ್ಕಳು ಅತಿ ಹೆಚ್ಚು ಇನ್ಹಲೇಂಟ್‌ಗಳ ಬಳಕೆದಾರರಾಗಿದ್ದರು. 2024ರ ಮಾರ್ಚ್ ತಿಂಗಳಲ್ಲಿ ಯುಕೆಯಲ್ಲಿ 11 ವರ್ಷದ ಬಾಲಕ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋಓಗಳನ್ನು ವೀಕ್ಷಿಸಿದ ನಂತರ ವಿಷಕಾರಿ ವಸ್ತುಗಳನ್ನು ಉಸಿರಾಡಿ ಮೃತಪಟ್ಟನು.

ವೈದ್ಯರು ಹೇಳುವಂತೆ ಏರೋಸಾಲ್ ಪೇಂಟ್, ಪೇಂಟ್ ಥಿನ್ನರ್, ಎಂಜಿನ್ ಇಂಧನ ಮತ್ತು ಅಂಟು ಮುಂತಾದ ಅನೇಕ ಗೃಹೋಪಯೋಗಿ ಉತ್ಪನ್ನಗಳು ಹೈಡ್ರೋಕಾರ್ಬನ್‌ಗಳನ್ನು ಹೊಂದಿರುತ್ತವೆ. ಇವು ತೀವ್ರ ಮಾದಕತೆಗೆ ಕಾರಣವಾಗಬಹುದು. ಆರಂಭಿಕ ಲಕ್ಷಣಗಳಲ್ಲಿ ಉಸಿರಾಟದ ತೊಂದರೆ, ನಿದ್ರಾಹೀನತೆ, ತಲೆನೋವು, ಆಲಸ್ಯ, ಸ್ನಾಯು ದೌರ್ಬಲ್ಯ, ಸ್ನಾಯು ನಿಯಂತ್ರಣ ಕಳೆದುಕೊಳ್ಳುವುದು, ವಾಕರಿಕೆ ಮತ್ತು ವಾಂತಿ ಸೇರಿವೆ. ಇದು ಅಂತಿಮವಾಗಿ ಸಾವಿಗೆ ಕಾರಣವಾಗಬಹುದು.

ತೀವ್ರ ಲಕ್ಷಣಗಳು

ಉಸಿರಾಟದ ತೊಂದರೆ, ಹೃದಯ ಸ್ತಂಭನ, ಉಸಿರುಗಟ್ಟುವಿಕೆ, ಕೋಮಾ, ರೋಗಗ್ರಸ್ತವಾಗುವಿಕೆಗಳು, ಜೀವಕ್ಕೆ ಅಪಾಯಕಾರಿ ಗಾಯಗಳಾಗಿವೆ. ತಜ್ಞರ ಪ್ರಕಾರ, ಈ ಅಭ್ಯಾಸವು ದೇಹದಿಂದ ಆಮ್ಲಜನಕವನ್ನು ಸಂಪೂರ್ಣವಾಗಿ ತೆಗೆದುಹಾಕುತ್ತದೆ. ಇದು ಉಸಿರುಗಟ್ಟುವಿಕೆ ಮತ್ತು ಸಾವಿಗೆ ಕಾರಣವಾಗಬಹುದು. ಕ್ರೋಮಿಯಂ ದೇಹದಲ್ಲಿನ ಎಲೆಕ್ಟ್ರೋಲೈಟ್‌ಗಳ ಮೇಲೂ ಪರಿಣಾಮ ಬೀರುತ್ತದೆ. ಇದು ಪೊಟ್ಯಾಸಿಯಮ್ ಮಟ್ಟವನ್ನು ಕಡಿಮೆ ಮಾಡುತ್ತದೆ. ಇದು ಹೃದಯ ಬಡಿತದಲ್ಲಿ ಬದಲಾವಣೆ, ಸ್ನಾಯು ದೌರ್ಬಲ್ಯ ಮತ್ತು ಇತರ ಹಾನಿಕಾರಕ ಪರಿಣಾಮಗಳಿಗೆ ಕಾರಣವಾಗಬಹುದು.

https://www.vijayavani.net/meghalaya-honeymoon-case-sonam-offered-20-lakhs-to-the-murderers-another-sensation-in-the-honeymoon-case

https://www.vijayavani.net/pink-coconut-pink-colored-coconut-from-indonesia-to-mangalore-is-this-viral-post-true