ಪೇಟಿಎಂ ಕೆವೈಸಿ ಅಪ್​ಡೇಟ್​ ನೆಪದಲ್ಲಿ 1.74 ಲಕ್ಷ ರೂ. ಧೋಖಾ!

ಬೆಂಗಳೂರು: ಪೇಟಿಎಂ ಕೆವೈಸಿ ಅಪ್​ಡೇಟ್​ ಮಾಡ್ತೀವಿ, ಆನ್​ಲೈನ್​ ಚಾರ್ಚ್​ 5 ರೂಪಾಯಿ ಆಗುತ್ತೆ ಎಂಬ ಅಪರಿಚಿತರ ಮಾತಿಗೆ ಮರುಳಾದ ಖಾಸಗಿ ಕಂಪನಿ ಉದ್ಯೋಗಿಯೊಬ್ಬರು ಬರೋಬ್ಬರಿ 1.74 ಲಕ್ಷ ರೂ. ಕಳೆದುಕೊಂಡಿದ್ದಾರೆ.

ಜೆ.ಪಿ.ನಗರದ ನಿವಾಸಿ ಭೀಮಸಿಂಹ (55) ಅವರ ಮೊಬೈಲ್​ಗೆ ಅ.12ರಂದು ಕರೆ ಮಾಡಿದ್ದ ಅಪರಿಚಿತರು, ನಾವು ಪೇಟಿಎಂ ಕೆವೈಸಿ ಅಪ್​ಡೇಟ್​ ಮಾಡಿಕೊಡುತ್ತೇವೆ ಎಂದಿದ್ದರು. ಅಲ್ಲದೆ, ಭೀಮಸಿಂಹರ ಮೊಬೈಲ್​ಗೆ ಲಿಂಕ್ ಕೂಡ ಕಳಿಸಿದ್ದರು. ಈ ಲಿಂಕ್​ ಮೇಲೆ ಕ್ಲಿಕ್​ ಮಾಡುವಂತೆ ಸೂಚಿಸಿ ಅದರಲ್ಲಿ ಬರುವ ಅಪ್ಲಿಕೇಶನ್​ನ್ನು ಡೌನ್​ಲೋಡ್​ ಮಾಡುವಂತೆ ಹೇಳಿದ್ದರು. ಇದಾದ ನಂತರ ಆನ್​ಲೈನ್​ ಚಾರ್ಜ್​ಗಾಗಿ 5 ರೂ.ಗಳನ್ನು ಕಳಿಸುವಂತೆ ತಿಳಿಸಿದ್ದರು.

ಅಪರಿಚಿತರ ಮಾತಿಗೆ ಮರುಳಾದ ಭೀಮಸಿಂಹ 5 ರೂ.ನ್ನು ಅವರು ಹೇಳಿದ ಖಾತೆಗೆ ಆನ್​ಲೈನ್​ ಮೂಲಕ ಕಳಿಸಿದ್ದರು. ಇದಾದ ಕೆಲ ಕ್ಷಣದಲ್ಲೇ ಹಂತ-ಹಂತವಾಗಿ ಭೀಮಸಿಂಹರ ಬ್ಯಾಂಕ್​ ಖಾತೆಯಿಂದ ಒಟ್ಟು 1.74 ಲಕ್ಷ ರೂ. ಮಾಯವಾಗಿದೆ.

ಪೇಟಿಎಂ ಕೆವೈಸಿ ಅಪ್​ಡೇಟ್​ ಮಾಡಿಕೊಡುವ ಸೋಗಿನಲ್ಲಿ ಕರೆ ಮಾಡಿದ್ದ ಸೈಬರ್​ ಕಳ್ಳರು, ಉದ್ಯೋಗಿಯ ಹಣ ಲಪಟಾಯಿಸಿದ್ದಾರೆ. ಈ ಕುರಿತು ದಕ್ಷಿಣ ಸಿಇಎನ್​ ಕ್ರೈಂ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

https://www.vijayavani.net/siddapura-car-rain-death/

https://www.vijayavani.net/rajarajeshwari-nagar-by-election-h-d-kumaraswamy/

https://www.vijayavani.net/darshan-wife-vijayalakshmi-tweet-about-navaratri/