ಮೈಸೂರು

ಎನ್ಯೂಮರೇಷನ್ ಫಾರ್ಮ್ ವಿತರಣೆ ಶೇ.91 ಪೂರ್ಣ

ಹುಣಸೂರು ನಗರದ ಉಪವಿಭಾಗಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ಎಸ್‌ಐಆರ್ ಪ್ರಕ್ರಿಯೆ ಕುರಿತಂತೆ ರಾಜಕೀಯ ಪಕ್ಷಗಳ ಬಿಎಲ್‌ಎ1 ಗಳಿಗೆ ಆಯೋಜಿಸಿದ್ದ ಸಭೆಯಲ್ಲಿ ಸಹಾಯಕ ನೋಂದಣಾಧಿಕಾರಿ ಜೆ.ಮಂಜುನಾಥ್ ಮಾತನಾಡಿದರು. ಕೆ.ವಿ.ಕಾವ್ಯಾರಾಣಿ, ಸತೀಶ್ ಪಾಪಣ್ಣ, ಎಚ್.ಪಿ.ಅಮರನಾಥ್, ರವಿಪ್ರಸನ್ನ, ಕಿರಣ್‌ಕುಮಾರ್ ಇತರರು ಇದ್ದರು.
ಹುಣಸೂರು ನಗರದ ಉಪವಿಭಾಗಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ಎಸ್‌ಐಆರ್ ಪ್ರಕ್ರಿಯೆ ಕುರಿತಂತೆ ರಾಜಕೀಯ ಪಕ್ಷಗಳ ಬಿಎಲ್‌ಎ1 ಗಳಿಗೆ ಆಯೋಜಿಸಿದ್ದ ಸಭೆಯಲ್ಲಿ ಸಹಾಯಕ ನೋಂದಣಾಧಿಕಾರಿ ಜೆ.ಮಂಜುನಾಥ್ ಮಾತನಾಡಿದರು. ಕೆ.ವಿ.ಕಾವ್ಯಾರಾಣಿ, ಸತೀಶ್ ಪಾಪಣ್ಣ, ಎಚ್.ಪಿ.ಅಮರನಾಥ್, ರವಿಪ್ರಸನ್ನ, ಕಿರಣ್‌ಕುಮಾರ್ ಇತರರು ಇದ್ದರು.
ರವಿಕುಮಾರ್ ಪಿ. ಕೆ
Published on: 

ಪ್ರಮುಖ ಮುಖ್ಯಾಂಶಗಳು

  • ಹುಣಸೂರು ಉಪವಿಭಾಗಾಧಿಕಾರಿ ಕೆ.ವಿ.ಕಾವ್ಯಾರಾಣಿ ಮಾಹಿತಿ
  • ಬಿಎಲ್‌ಎಗಳ ಜತೆ ಸಭೆ
ಹುಣಸೂರು: ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ(ಎಸ್‌ಐಆರ್)ಕಾರ್ಯದಲ್ಲಿ ಮತದಾರರಿಗೆ ಎನ್ಯೂಮರೇಷನ್ ಫಾರ್ಮ್ (ಮತದಾರರ ಗಣತಿ ನಮೂನೆ) ವಿತರಿಸುವ ಕಾರ್ಯ ಶೇ.91.18ರಷ್ಟು ಪೂರ್ಣಗೊಂಡಿದ್ದು, ಇನ್ನೆರಡು ದಿನಗಳಲ್ಲಿ ಶೇ.100ರ ಸಾಧನೆ ಮಾಡಲಾಗುವುದು ಎಂದು ಚುನಾವಣಾ ನೋಂದಣಾಧಿಕಾರಿ ಹಾಗೂ ಉಪವಿಭಾಗಾಧಿಕಾರಿ ಕೆ.ವಿ.ಕಾವ್ಯಾರಾಣಿ ತಿಳಿಸಿದರು.
ನಗರದ ಉಪವಿಭಾಗಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ಸೋಮವಾರ ಅಯೋಜಿಸಿದ್ದ ವಿವಿಧ ರಾಜಕೀಯ ಪಕ್ಷಗಳ ಬಿಎಲ್‌ಎ ಗಳೊಂದಿಗಿನ ಸಭೆಯಲ್ಲಿ ಮಾತನಾಡಿದರು. ಜೂ.30ರಿಂದ ಬಿಎಲ್‌ಒಗಳು ಮನೆಮನೆಗೆ ತೆರಳಿ ಎನ್ಯೂಮರೇಷನ್ ಫಾರ್ಮ್ ವಿತರಿಸುವ ಕಾರ್ಯ ನಡೆಸಿದ್ದು, ತಾಲೂಕಿನ 274 ಮತಗಟ್ಟೆಗಳ ವ್ಯಾಪ್ತಿಯಲ್ಲಿ 2,30, 900 ಮತದಾರ(ಒಟ್ಟು ಮತದಾರರು 2,53,248)ರಿಗೆ ಫಾರ್ಮ್ ವಿತರಿಸಲಾಗಿದೆ ಎಂದು ಮಾಹಿತಿ ನೀಡಿದರು.
ಪ್ರಮುಖ ಘಟ್ಟ ಮುಂದಿದೆ: ಇನ್ನು ಮುಂದೆ ಎಸ್‌ಐಆರ್ ಪ್ರಕ್ರಿಯೆಯ ಪ್ರಮುಖ ಘಟ್ಟ ನಮ್ಮ ಮುಂದಿದೆ. ಇದೀಗ ಮತದಾರರ ಗಣತಿ ನಮೂನೆ ವಿತರಣೆ ನಂತರ ಮತದಾರರಿಂದ ಭರ್ತಿ ಮಾಡಿದ ನಮೂನೆ ಸ್ವೀಕರಿಸಬೇಕಿದೆ. ಕೆಲವಡೆ ಬಿಎಲ್‌ಒಗಳಿಗೆ ಕಾರಣಾಂತರಗಳಿಂದ ಒಬ್ಬರೇ ಕರ್ತವ್ಯ ನಿರ್ವಹಿಸಲು ಸಾಧ್ಯವಾಗುತ್ತಿಲ್ಲವೆನ್ನುವ ಮಾಹಿತಿಯನ್ನಾಧರಿಸಿ ನಗರ ವ್ಯಾಪ್ತಿಯಲ್ಲಿ 40 ನಗರಸಭೆ ಸಿಬ್ಬಂದಿಯನ್ನು ಸಹಾಯಕರನ್ನಾಗಿ ಒದಗಿಸಲಾಗಿದೆ. ಗ್ರಾಮೀಣ ಭಾಗಗಳಲ್ಲೂ ಇಂತಹ ಸಮಸ್ಯೆ ಎದುರಾದರೆ ಸಹಾಯಕರನ್ನು ನೀಡಲು ಕ್ರಮವಹಿಸಲಾಗುವುದು. ಇದೀಗ ಬೇರೆಡೆ ಸ್ಥಳಾಂತರಗೊಂಡವರು, ವಲಸೆ ಹೋದವರು, ಮರಣ ಹೊಂದಿದವರ ಕುರಿತು ಮಾಹಿತಿ ಅಗತ್ಯವಿದ್ದು, ವಿವಿಧ ರಾಜಕೀಯ ಪಕ್ಷಗಳ ಬಿಎಲ್‌ಎಗಳಿಂದ ಸಹಾಯ ಕೋರುತ್ತಿದ್ದೇವೆ ಎಂದರು.
ಹಾಡಿಗಳ ಪರಿಸ್ಥಿತಿ: ತಾಲೂಕಿನಲ್ಲಿ ಪ್ರಮುಖವಾಗಿ ಗಿರಿಜನ ಹಾಡಿಗಳಲ್ಲಿ ನಿವಾಸಿಗಳು ಬದುಕಿಗಾಗಿ ಕೊಡಗು ಮುಂತಾದ ಬೇರೆ ಜಿಲ್ಲೆ, ತಮಿಳುನಾಡು ಸೇರಿದಂತೆ ಬೇರೆ ರಾಜ್ಯಗಳಿಗೆ ವಲಸೆ ಹೋಗಿದ್ದಾರೆ. ನಗರ ವ್ಯಾಪ್ತಿಯಲ್ಲಿ ಬಾಡಿಗೆ ಮನೆಯಲ್ಲಿದ್ದವರು ಬೇರೆ ಬಡಾವಣೆಗಳಿಗೆ ಹೋಗಿರುತ್ತಾರೆ. ಇಂತಹವರನ್ನು ಗುರುತಿಸಿಕೊಡುವ ಅವರ ಸಂಪರ್ಕಕ್ಕಾಗಿ ಮೊಬೈಲ್ ನಂಬರ್ ದೊರಕಿಸಿಕೊಡುವತ್ತ ಬಿಎಲ್‌ಎಗಳ ಸಹಕಾರ ನಿರೀಕ್ಷಿಸುತ್ತೇವೆ. ಎಲ್ಲರನ್ನೂ ಕರೆಯಿಸಿ ಫಾರ್ಮ್ ನೀಡಿ ಭರ್ತಿ ಮಾಡಿ ಅವರಲ್ಲಿರುವ ದಾಖಲೆಗಳನ್ನು ಪಡೆಯಬೇಕಿದೆ ಎಂದರು.
ಫಾರ್ಮ್ ವಿತರಣೆ ಆಗಿಲ್ಲ: ಶೇ.91ರಷ್ಟು ಎನ್ಯೂಮರೇಷನ್ ಫಾರ್ಮ್ ವಿತರಿಸಲಾಗಿದೆ ಎಂಬ ನೋಂದಣಾಧಿಕಾರಿ ಹೇಳಿಕೆಯನ್ನು ಪ್ರಸ್ತಾಪಿಸಿದ ಜೆಡಿಎಸ್ ಪಕ್ಷದ ಬಿಎಲ್‌ಒ 1 ಸತೀಶ್ ಪಾಪಣ್ಣ, ಕಾಂಗ್ರೆಸ್ ಪಕ್ಷದ ಎಚ್.ಪಿ.ಅಮರನಾಥ್, ಬಿಜೆಪಿಯ ಕಿರಣ್‌ಕುಮಾರ್ ಮುಂತಾದವರು ಈ ಪ್ರಮಾಣದಲ್ಲಿ ಫಾರ್ಮ್ ವಿತರಣೆಯಾಗಿಲ್ಲ. ಬಿಎಲ್‌ಒಗಳು ಸಮರ್ಪಕವಾಗಿ ಕಾರ್ ನಿರ್ವಹಿಸುತ್ತಿಲ್ಲ. ಬಿಎಲ್‌ಒಗಳಾಗಿರುವ ಕೆಲ ಶಿಕ್ಷಕರು ಶಾಲೆಯ ಅವಧಿಯಲ್ಲಿ ಸತತವಾಗಿ ಎಸ್‌ಐಆರ್ ಕಾರ್ಯ ನಿರ್ವಹಿಸಲು ಸಾಧ್ಯವಿಲ್ಲವೆಂದು ತಗಾದೆ ತೆಗೆಯುತ್ತಿದ್ದಾರೆ. ಶನಿವಾರ ಮಧ್ಯಾಹ್ನದ ನಂತರ ವಿತರಣೆ ಮಾಡುತ್ತಿಲ್ಲವೆಂದು ದೂರಿದರು.
ಸಭೆಯಲ್ಲಿ ಸಹಾಯಕ ನೋಂದಣಾಧಿಕಾರಿ ಮತ್ತು ತಹಸೀಲ್ದಾರ್ ಜೆ.ಮಂಜುನಾಥ್, ಚುನಾವಣಾ ಶಿರಸ್ತೇದಾರ್ ಪ್ರಕಾಶ್, ನೌಕರ ಗುರುಮೂರ್ತಿ, ಕ್ಷೇತ್ರ ಶಿಕ್ಷಧಿಕಾರಿ ಕಾಳನಾಯಕ ಸೇರಿದಂತೆ ವಿವಿಧ ರಾಜಕೀಯ ಪಕ್ಷಗಳು ಮುಖಂಡರು ಭಾಗವಹಿಸಿದ್ದರು.
9ರಂದು ತರಬೇತಿ ಕಾರ್ಯಾಗಾರ: ನೋಂದಣಾಧಿಕಾರಿ ಕಾವ್ಯಾರಾಣಿ ಮಾತನಾಡಿ, ಬಿಎಲ್‌ಎಗಳು ಸಭೆಯಲ್ಲಿ ಪ್ರಸ್ತಾಪಿಸಿದ ಎಲ್ಲ ವಿಷಯಗಳನ್ನು ಕೂಲಂಕಷವಾಗಿ ಪರಿಶೀಲಿಸಿ ಮುಂದೆ ಸಮಸ್ಯೆಗಳು ಎದುರಾಗದಂತೆ ಕ್ರಮವಹಿಸಲಾಗುವುದು. ಬಿಎಲ್‌ಒಗಳ ಸಮರ್ಪಕ ಕಾರ್ಯ ನಿರ್ವಹಣೆಗೆ ಸೂಚಿಸಲಾಗುವುದು. ಇದೀಗ ರಾಜಕೀಯ ಪಕ್ಷಗಳ ಒತ್ತಾಸೆಯಂತೆ ತಾಲೂಕಿನಲ್ಲಿ ವಿವಿಧ ಪಕ್ಷಗಳಿಂದ ನೇಮಕಗೊಂಡಿರುವ 800ಕ್ಕೂ ಹೆಚ್ಚು ಬಿಎಲ್‌ಎ- 2ಗಳಿಗೆ ಜು.9ರಂದು ನಗರದ ಅಂಬೇಡ್ಕರ್ ಭವನದಲ್ಲಿ ಒಂದು ದಿನದ ತರಬೇತಿ ಕಾರ್ಯಾಗಾರ ಆಯೋಜಿಸಲಾಗುವುದು ಎಂದು ತಿಳಿಸಿದರು.
ಸಹಾಯವಾಣಿ ಕೇಂದ್ರ ಸ್ಥಾಪನೆ: ನಗರ ಮತ್ತು ಗ್ರಾಮಾಂತರ ಭಾಗಗಳಲ್ಲಿ ಎನ್ಯೂಮರೇಷನ್ ಫಾರ್ಮ್ ಭರ್ತಿ ಮಾಡಲು ತಿಳಿಯದ ಇನ್ನಿತರ ಗೊಂದಲಗಳ ಪರಿಹಾರಕ್ಕಾಗಿ ಪ್ರತಿ ಬೂತ್ ಮಟ್ಟದ ಕೇಂದ್ರದಲ್ಲೂ ಸಹಾಯವಾಣಿ ಕೇಂದ್ರವನ್ನು ತೆರೆಯಲಾಗಿದ್ದು ಸಾರ್ವಜನಿಕರು ಫಾರ್ಮ್ ಭರ್ತಿ ಮಾಡುವಲ್ಲಿ ಅನುಮಾನಗಳಿದ್ದರೆ ಕೇಳಿ ಪರಿಹರಿಸಿಕೊಳ್ಳಬಹುದೆಂದು ನೋಂದಣಾಧಿಕಾರಿ ಕೆ.ವಿ.ಕಾವ್ಯಾರಾಣಿ ತಿಳಿಸಿದರು.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net