ದಶಕಗಳ ಹಿಂದೆ ದೇಶದಲ್ಲೇ ಮೊದಲ ಬಾರಿಗೆ ರಾಷ್ಟ್ರೀಯ ಉದ್ಯಾನವನದಂಚಿನಲ್ಲಿ ಮಾನವ ವನ್ಯಜೀವಿ ಸಂಘರ್ಷ ನಿಯಂತ್ರಿಸಲು ರೈಲ್ವೆ ಬ್ಯಾರಿಕೇಡ್ ಅಳವಡಿಸಿದ ಖ್ಯಾತಿ ನಾಗರಹೊಳೆ ರಾಷ್ಟ್ರೀಯ ಉದ್ಯಾನವನ ಹೊಂದಿದೆ. ದಶಕಗಳಲ್ಲಿ ಒಂದು ನೂರು ಕಿಮೀಗೂ ಅಧಿಕ ಉದ್ದದ ರೈಲ್ವೆ ಬ್ಯಾರಿಕೇಡ್ ಅಳವಡಿಸಲಾಗಿದೆ. ಮಾನವ ವನ್ಯಜೀವಿ ಸಂಘರ್ಷ ನಿಯಂತ್ರಣಕ್ಕೆ ಅರಣ್ಯ ಇಲಾಖೆ ಹೊಸ ಹೊಸ ತಂತ್ರಜ್ಞಾನಗಳ ಬಳಕೆ ಮಾಡುತ್ತಿದೆ. ಆನೆ ಕಂದಕ ನಿರ್ಮಾಣದಿಂದ ಆರಂಭಗೊಂಡು ಇಂದಿನ ಎಐ ತಂತ್ರಜ್ಞಾನಗಳ ಬಳಕೆಯೂ ಆಗುತ್ತಿದೆ. ರೋಪ್ ಬ್ಯಾರಿಕೇಡ್, ಸೋಲಾರ್ ಫೆನ್ಸಿಂಗ್, ಹ್ಯಾಂಗಿಂಗ್ ಫೆನ್ಸಿಂಗ್, ಶಕ್ತಿಶಾಲಿ ಗರುಡ ಕ್ಯಾಮರಾ ಅಳವಡಿಕೆ, ವಿವಿಧ ಶಬ್ದಗಳನ್ನು ಒಳಗೊಂಡ ಫಾರ್ಮ್ಗಾರ್ಡ್ ತಂತ್ರಜ್ಞಾನ ಇವೆಲ್ಲವನ್ನೂ ಅಲ್ಲಲ್ಲಿ ಅಳವಡಿಸಿ ಪರಿಣಾಮಗಳನ್ನು ಇಲಾಖೆ ಗಮನಿಸುತ್ತಿದೆ. ಈಗ ಚೈನ್ಲಿಂಕ್ಡ್ ಮೆಷ್ಗಳ ಅಳವಡಿಕೆ ಪ್ರಾಯೋಗಿಕವಾಗಿ ನಡೆದಿದ್ದು, ಯೋಜನೆ ಪರಿಣಾಮಕಾರಿಯಾಗಿರುವುದು ಇಲಾಖೆಗೆ ಯೋಜನೆಯನ್ನು ಮುಂದುವರಿಸಲು ಹುಮ್ಮಸ್ಸು ನೀಡಿದೆ. ಹಲವು ಯೋಜನೆಗಳನ್ನು ಜಾರಿಗೊಳಿಸಿ ಸಾಲ್ಯ ಕಂಡಿದ್ದು, ವಿಫಲವಾದ ಯೋಜನೆಗಳು ಕೂಡ ಇವೆ. ಆದರೆ ಸಂಘರ್ಷದ ಅಂತ್ಯಕ್ಕಾಗಿ ಇಲಾಖೆ ಕ್ರಮ ವಹಿಸುತ್ತಿರುವುದು ಮುಂದುವರಿದಿದೆ.
