ರಸ್ತೆ ಬಳಿ ತುಂಡಾಗಿ ಬಿದ್ದ ವಿದ್ಯುತ್ ತಂತಿ

ವಿದ್ಯುತ್ ತಂತಿ ತುಂಡಾಗಿ ಬಿದ್ದು ಮೂರು ದಿನ ಕಳೆದಿದ್ದು, ಸಂಬಂಧಪಟ್ಟ ಅಧಿಕಾರಿಗಳ ಗಮನಕ್ಕೆ ತಂದರೂ ಅವರು ಇದುವರೆಗೆ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷ ಪ್ರಕಾಶ್ ಆರೋಪಿಸಿದ್ದಾರೆ.

ಗ್ರಾಪಂ ಮಾಜಿ ಅಧ್ಯಕ್ಷ ಪ್ರಕಾಶ್ ಮಾತನಾಡಿ, ತಂತಿ ಹಳೆಯದಾಗಿರುವ ಕಾರಣ ಇದೇ ಜಾಗದಲ್ಲಿ ಆಗಾಗ್ಗೆ ತಂತಿ ತುಂಡಾಗಿ ಬೀಳುತ್ತಲೇ ಇದೆ. ಸೆಸ್ಕ್ ಸಿಬ್ಬಂದಿಯೊಬ್ಬರು ಶನಿವಾರ ಬಂದು ಹಳೆಯ ತಂತಿಯನ್ನೇ ಸರಿಪಡಿಸುವುದಾಗಿ ಹೇಳಿದರು. ಇದು ಸಾರ್ವಜನಿಕರು ಓಡಾಡುವ ರಸ್ತೆ ಪಕ್ಕದಲ್ಲಿ ಇದ್ದು ಮತ್ತೆ ತಂತಿ ತುಂಡಾಗಿ ಬಿದ್ದು ಏನಾದರೂ ಅನಾಹುತವಾದರೆ ಯಾರು ಹೊಣೆ, ಹೊಸ ತಂತಿ ಅಳವಡಿಸಿ ಎಂದು ಕೇಳಿದ್ದಕ್ಕೆ ಈ ವಿಷಯವನ್ನು ಹಿರಿಯ ಅಧಿಕಾರಿಗಳಿಗೆ ತಿಳಿಸಿ ಎಂದು ಹೇಳಿ ಹಳೆಯ ತಂತಿಯನ್ನೂ ದುರಸ್ತಿ ಮಾಡದೆ ತೆರಳಿದರು ಎಂದು ಆರೋಪಿಸಿದರು.

ಸಂಬಂಧಪಟ್ಟ ಹಿರಿಯ ಅಧಿಕಾರಿಗಳು ಕೂಡಲೇ ಸ್ಥಳ ಪರಿಶೀಲಿಸಿ ಹೊಸ ತಂತಿ ಅಳವಡಿಸಲು ಕ್ರಮ ಕೈಗೊಳ್ಳುವಂತೆ ಗ್ರಾಮಸ್ಥರು ಒತ್ತಾಯಿಸಿದ್ದಾರಲ್ಲದೆ, ಇಲ್ಲದಿದ್ದಲ್ಲಿ ಕೊಪ್ಪ ಸೆಸ್ಕ್ ಕಚೇರಿ ಮುಂದೆ ಪ್ರತಿಭಟನೆ ನಡೆಸುವುದಾಗಿ ಎಚ್ಚರಿಸಿದ್ದಾರೆ.