ಕಸದ ಗಾಡಿಗಳಲ್ಲೇ ಭಾರಿ ಅಕ್ರಮ?| bswml

ನಗರದ ಕಸ ಸಂಗ್ರಹಣೆ ವ್ಯವಸ್ಥೆಯಲ್ಲಿ ನಡೆಯುತ್ತಿದ್ದ ಭಾರೀ ಅಕ್ರಮ ಉತ್ತರ ಪಾಲಿಕೆ ನಡೆಸಿದ ದಿಢೀರ್​ ಪರಿಶೀಲನೆಯಲ್ಲಿ ಬಯಲಾಗಿದೆ. ದಾಖಲೆಗಳು ಹಾಗೂ ಮೊಬೈಲ್​ ಆ್ಯಪ್​ನಲ್ಲಿ ಕಾರ್ಯನಿರ್ವಹಿಸುತ್ತಿವೆ ಎಂದು ತೋರಿಸಲಾಗಿದ್ದ ಹಲವು ಆಟೋ ಟಿಪ್ಪರ್​ಗಳು ವಾಸ್ತವದಲ್ಲಿ ಸ್ಥಳದಲ್ಲೇ ಇಲ್ಲದಿರುವುದು ಬೆಳಕಿಗೆ ಬಂದಿದ್ದು, ಕಸ ನಿರ್ವಹಣಾ ವ್ಯವಸ್ಥೆಯ ಮೇಲಿನ ನಿಗಾವ್ಯವಸ್ಥೆಯೇ ಪ್ರಶ್ನಾರ್ಹವಾಗಿದೆ.

ಸಾರ್ವಜನಿಕರಿಂದ ನಿರಂತರವಾಗಿ ದೂರುಗಳು ಬರುತ್ತಿದ್ದ ಹಿನ್ನೆಲೆಯಲ್ಲಿ ಉತ್ತರ ಪಾಲಿಕೆ ಆಯುಕ್ತ ಪಿ.ಸುನೀಲ್​ ಕುಮಾರ್​ ನೇತೃತ್ವದಲ್ಲಿ ನಾಲ್ಕು ವಿಶೇಷ ತಂಡಗಳನ್ನು ರಚಿಸಿ ವಿವಿಧ ವಾರ್ಡ್​ಗಳ ಆಟೋ ಮರ್ಜಿಂಗ್​ ಪಾಯಿಂಟ್​ಗಳಲ್ಲಿ ದಿಢೀರ್​ ತಪಾಸಣೆ ನಡೆಸಲಾಯಿತು.

ತಪಾಸಣೆ ವೇಳೆ ಬೆಚ್ಚೀಬಿಳಿಸುವ ಅಂಶಗಳು ಬೆಳಕಿಗೆ ಬಂದಿವೆ. ವಾರ್ಡ್​ 59ರಲ್ಲಿ ಆ್ಯಪ್​ನಲ್ಲಿ 24 ಆಟೋ ಟಿಪ್ಪರ್​ಗಳು ಕಾರ್ಯನಿರ್ವಹಿಸುತ್ತಿವೆ ಎಂದು ದಾಖಲಾಗಿದ್ದರೂ ಸ್ಥಳದಲ್ಲಿ 21 ವಾಹನಗಳು ಮಾತ್ರ ಕಂಡುಬಂದವು. ವಾರ್ಡ್​ 49ರಲ್ಲಿ 25 ವಾಹನಗಳ ಪೈಕಿ ಕೇವಲ 10 ವಾಹನಗಳು, ವಾರ್ಡ್​ 27ರಲ್ಲಿ 35 ವಾಹನಗಳ ಪೈಕಿ 17 ವಾಹನಗಳು ಹಾಗೂ ವಾರ್ಡ್​ 24ರಲ್ಲಿ 31 ವಾಹನಗಳ ಪೈಕಿ 18 ವಾಹನಗಳು ಮಾತ್ರ ಹಾಜರಿದ್ದವು. ಒಟ್ಟಾರೆ ದಾಖಲೆಗಳಲ್ಲಿ 115 ವಾಹನಗಳು ಕಾರ್ಯನಿರ್ವಹಿಸುತ್ತಿವೆ ಎಂದು ತೋರಿಸಿದ್ದರೆ, ಸ್ಥಳದಲ್ಲಿ ಕೇವಲ 66 ವಾಹನಗಳು ಮಾತ್ರ ಪತ್ತೆಯಾಗಿವೆ.

ವಾಹನಗಳು ಕರ್ತವ್ಯ ನಿರ್ವಹಿಸದಿದ್ದರೂ ಆ್ಯಪ್​ನಲ್ಲಿ ಹಾಜರಾತಿ ತೋರಿಸಿರುವುದು ಕಸ ಸಂಗ್ರಹಣೆ ಗುತ್ತಿಗೆ ವ್ಯವಸ್ಥೆಯಲ್ಲಿ ಅಕ್ರಮ ಹಾಗೂ ನಕಲಿ ಬಿಲ್ಲಿಂಗ್​ ನಡೆಯುತ್ತಿದೆಯೇ ಎಂಬ ಅನುಮಾನಗಳಿಗೆ ಕಾರಣವಾಗಿದೆ. ಇದರಿಂದ ಸಾರ್ವಜನಿಕರ ತೆರಿಗೆ ಹಣದ ದುರ್ಬಳಕೆ ನಡೆದಿರುವ ಸಾಧ್ಯತೆಯೂ ಚರ್ಚೆಗೆ ಗ್ರಾಸವಾಗಿದೆ.

ಇದರ ಜತೆಗೆ ಕೆಲ ಆಟೋ ಟಿಪ್ಪರ್​ಗಳಲ್ಲಿ ಸಹಾಯಕ ಸಿಬ್ಬಂದಿಯೇ ಇಲ್ಲದಿರುವುದು ಮತ್ತು ಹಲವರು ಸುರಕ್ಷತಾ ಕೈಗವಸುಗಳಿಲ್ಲದೆ ಕೆಲಸ ಮಾಡುತ್ತಿರುವುದು ಕೂಡ ಅಧಿಕಾರಿಗಳ ಗಮನಕ್ಕೆ ಬಂದಿದೆ. ಕಾರ್ಮಿಕರ ಸುರಕ್ಷತಾ ನಿಯಮಗಳನ್ನು ಪಾಲಿಸದಿರುವುದು ಮತ್ತೊಂದು ಗಂಭೀರ ಲೋಪವಾಗಿ ಕಂಡುಬಂದಿದೆ.

ಪರಿಶೀಲನೆಯಲ್ಲಿ ಪತ್ತೆಯಾದ ಅಕ್ರಮಗಳ ಬಗ್ಗೆ ಸಂಬಂಧಿತ ಅಧಿಕಾರಿಗಳಿಂದ ಸಷ್ಟನೆ ಪಡೆಯಲು ಸೂಚಿಸಿರುವ ಆಯುಕ್ತರು, ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಆದೇಶಿಸಿದ್ದಾರೆ. ಮುಂದಿನ ದಿನಗಳಲ್ಲೂ ಇಂತಹ ದಿಢೀರ್​ ತಪಾಸಣೆ ನಡೆಸಿ ಕಸ ಸಂಗ್ರಹಣೆ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ಮತ್ತು ಜವಾಬ್ದಾರಿತನ ಹೆಚ್ಚಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.