ವೆಟರ್ನರಿ ಕಾಲೇಜು ಮೆಟ್ರೋ ನಿಲ್ದಾಣಕ್ಕೆ ಗುಡ್​ಬೈ| metro

ರಾಜಧಾನಿಯ ಬಹುನಿರೀಕ್ಷಿತ ಹೆಬ್ಬಾಳ-&ಸರ್ಜಾಪುರ ಮೆಟ್ರೋ ಕಾರಿಡಾರ್​ನಲ್ಲಿ ವೆಚ್ಚ ಕಡಿತದ ಹೆಸರಿನಲ್ಲಿ ಸುರಂಗ ಮಾರ್ಗದ ನಿಲ್ದಾಣಗಳ ಉದ್ದವನ್ನು ಈಗಾಗಲೇ ಕಡಿಮೆ ಮಾಡಿದ್ದ ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್​ಸಿಎಲ್​), ಇದೀಗ ವೆರ್ಟನರಿ ಕಾಲೇಜು ಮೆಟ್ರೋ ನಿಲ್ದಾಣ ನಿಮಾರ್ಣವನ್ನೇ ಕೈಬಿಡಲು ಮುಂದಾಗಿದೆ.

ಮೇಖ್ರಿ ವೃತ್ತ ಮತ್ತು ಹೆಬ್ಬಾಳದ ಸಮೀಪದ ಗಂಗಾನಗರ ನಡುವಿನ ಪ್ರದೇಶಕ್ಕೆ ಸೇವೆ ಒದಗಿಸಬೇಕಿದ್ದ ಪಶುವೈದ್ಯಕಿಯ ಕಾಲೇಜು ನಿಲ್ದಾಣ ಮೂಲ ಯೋಜನೆಯಲ್ಲಿ ಸ್ಥಾನ ಪಡೆದಿತ್ತು. ಆದರೆ, ಪರಿಷತ ಪ್ರಸ್ತಾವನೆಯಲ್ಲಿ ಈ ನಿಲ್ದಾಣಕ್ಕೆ ಗುಡ್​ಬೈ ಹೇಳಲಾಗಿದೆ. ಇದರಿಂದ ಸ್ಥಳಿಯ ನಿವಾಸಿಗಳು ಹಾಗೂ ಸಾವಿರಾರು ಪ್ರಯಾಣಿಕರಿಗೆ ಭವಿಷ್ಯದಲ್ಲಿ ಮೆಟ್ರೋ ಸಂಪರ್ಕದ ಅನುಕೂಲ ತಪ್ಪುವ ಆತಂಕ ಎದುರಾಗಿದೆ.

ತಜ್ಞರ ಪ್ರಕಾರ, ಕೇಂದ್ರ ಸರ್ಕಾರದ ಅನುಮೋದನೆ ಸುಲಭವಾಗಿ ದೊರಕಿಸಲು ಯೋಜನಾ ವೆಚ್ಚ ತಗ್ಗಿಸುವ ಉದ್ದೇಶದಿಂದಲೇ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಆದರೆ, ಬಿಎಂಆರ್​ಸಿಎಲ್​ ಅಧಿಕಾರಿಗಳು ಮಾತ್ರ, ಯೋಜನೆಯ ಆರ್ಥಿಕ ಹೊರೆ ಕಡಿಮೆ ಮಾಡುವ ದೃಷ್ಟಿಯಿಂದ ಈ ಬದಲಾವಣೆ ಅನಿವಾರ್ಯವಾಯಿತು ಎಂದು ಸಮರ್ಥಿಸಿಕೊಂಡಿದ್ದಾರೆ.

36.59 ಕಿಲೋಮೀಟರ್​ ಉದ್ದದ ಕೆಂಪು ಮಾರ್ಗವು ಉತ್ತರ ಬೆಂಗಳೂರಿನ ಹೆಬ್ಬಾಳವನ್ನು ಆಗ್ನೇಯ ಭಾಗದ ಸರ್ಜಾಪುರಕ್ಕೆ ಸಂಪರ್ಕಿಸಲಿದೆ. ಈ ಮಾರ್ಗವು ಕೋರಮಂಗಲ, ಕೇಂದ್ರ ವಾಣಿಜ್ಯ ಪ್ರದೇಶ ಸೇರಿ ಹಲವು ಪ್ರಮುಖ ಭಾಗಗಳ ಮೂಲಕ ಹಾದುಹೋಗಲಿದ್ದು, ಐಟಿ ಉದ್ಯೋಗಿಗಳ ಬಹುದಿನಗಳ ಬೇಡಿಕೆಯಾಗಿದೆ.

ಆರಂಭದಲ್ಲಿ ಸುಮಾರು 28,400 ಕೋಟಿ ರೂ. ವೆಚ್ಚದಲ್ಲಿ ಯೋಜನೆ ರೂಪಿಸಲಾಗಿತ್ತು. ಕೇಂದ್ರ ಸಚಿವಾಲಯದ ಸೂಚನೆಯಂತೆ ಫ್ರೆಂಚ್​ ಮೂಲದ "ಸಿಸ್ಟ್ರಾ' ಸಂಸ್ಥೆ ಮರುಪರಿಶೀಲನೆ ನಡೆಸಿ ಸುರಂಗ ನಿಲ್ದಾಣಗಳ ಉದ್ದ ಕಡಿತ ಸೇರಿ ಹಲವು ಬದಲಾವಣೆಗಳನ್ನು ಶಿಫಾರಸು ಮಾಡಿತ್ತು. ಇದರ ಪರಿಣಾಮ ಯೋಜನಾ ವೆಚ್ಚ ಸುಮಾರು 2,920 ಕೋಟಿ ರೂ. ಇಳಿಕೆಯಾಗಿ 25,485 ಕೋಟಿ ರೂ.ಗೆ ಪರಿಷತಗೊಂಡಿದೆ.

ಸಂಪೂರ್ಣ ಡಬಲ್​ ಡೆಕ್ಕರ್​ ವಿನ್ಯಾಸಕ್ಕೆ ಕೇಂದ್ರ ಸರ್ಕಾರ ಗ್ರೀನ್​ ಸಿಗ್ನಲ್​ ನೀಡುವ ಸಾಧ್ಯತೆ ಇದ್ದು, ಆ ಮಾದರಿಯ ಕಾರ್ಯಸಾಧ್ಯತೆ ಕುರಿತು ಅಧ್ಯಯನ ನಡೆಸುವಂತೆ ಐಐಟಿ ರೂರ್ಕಿಗೆ ಬಿಎಂಆರ್​ಸಿಎಲ್​ ಮನವಿ ಮಾಡಿದೆ. ಮೆಟ್ರೋ ಯೋಜನೆಗಳ ಉದ್ದೇಶ ನಗರ ಸಂಚಾರಕ್ಕೆ ಶಾಶ್ವತ ಪರಿಹಾರ ಕಲ್ಪಿಸುವುದಾಗಿದ್ದರೂ, ವೆಚ್ಚ ಕಡಿತದ ನೆಪದಲ್ಲಿ ನಿಲ್ದಾಣಗಳನ್ನೇ ಕೈಬಿಡುವ ಪ್ರವೃತ್ತಿ ಭವಿಷ್ಯದಲ್ಲಿ ಸಾರ್ವಜನಿಕರ ಅನುಕೂಲಕ್ಕೆ ಧಕ್ಕೆಯಾಗಬಹುದೇ ಎಂಬ ಪ್ರಶ್ನೆ ಇದೀಗ ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿದೆ.