ಯಲಹಂಕ ಪುಟ್ಟೇನಹಳ್ಳಿ ಕೆರೆಗೆ ಕೊಳಚೆ ನೀರು ಹರಿವು ತಡೆಗೆ ಜಲಮಂಡಳಿ ಯೋಜನೆ

ಯಲಹಂಕ ಪುಟ್ಟೇನಹಳ್ಳಿ ಕೆರೆಗೆ ಸೇರುತ್ತಿದ್ದ ಕೊಳಚೆ ನೀರಿನ ಹರಿವನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ (ಬಿಡಬ್ಲ್ಯೂಎಸ್​ಎಸ್​ಬಿ) ಮಹತ್ವದ ಕ್ರಮ ಕೈಗೊಂಡಿದೆ.

ಕೆರೆಯ ವಾಕಿಂಗ್​ ಟ್ರ್ಯಾಕ್​ ಸಮೀಪ 700 ಮಿ.ಮೀ. ವ್ಯಾಸದ ಭೂಗತ ಒಳಚರಂಡಿ ಪೈಪ್​ಲೈನ್​ ಅಳವಡಿಕೆ ಕಾಮಗಾರಿ ಪೂರ್ಣಗೊಂಡಿದ್ದು, ಇದರಿಂದ ಕೆರೆಗೆ ಹರಿದು ಬರುತ್ತಿದ್ದ ಕೊಳಚೆ ನೀರನ್ನು ಸಮೀಪದ ಒಳಚರಂಡಿ ಶುದ್ಧೀಕರಣ ಘಟಕಕ್ಕೆ (ಎಸ್​ಟಿಪಿ) ತಿರುಗಿಸಲಾಗುತ್ತದೆ.

ರಾಷ್ಟ್ರೀಯ ಹಸಿರು ನ್ಯಾಯಮಂಡಳಿ (ಎನ್​ಜಿಟಿ)ಗೆ ಸಲ್ಲಿಸಿರುವ ವರದಿಯಲ್ಲಿ ಈ ಮಾಹಿತಿ ನೀಡಿರುವ ಬಿಡಬ್ಲ್ಯೂಎಸ್​ಎಸ್​ಬಿ, 2051ರ ವರೆಗೆ (ಮುಂದಿನ 25 ವರ್ಷ) ಈ ಪ್ರದೇಶದಲ್ಲಿ ಉತ್ಪತ್ತಿಯಾಗಲಿರುವ ಕೊಳಚೆ ನೀರಿನ ಪ್ರಮಾಣವನ್ನು ನಿರ್ವಹಿಸುವ ಸಾಮರ್ಥ್ಯ ಈ ಪೈಪ್​ಲೈನ್​ಗೆ ಇದೆ ಎಂದು ತಿಳಿಸಿದೆ.

ವಿಶ್ವ ಬ್ಯಾಂಕ್​ ನೆರವಿನ ಯೋಜನೆಯಡಿ ನಿಮಾರ್ಣವಾಗುತ್ತಿರುವ ಲ್ಯಾಟರಲ್​ ಸೀವರ್​ ಜಾಲಕ್ಕೆ ಈ ಪೈಪ್​ಲೈನ್​ ಸಂಪರ್ಕ ಕಲ್ಪಿಸಲಾಗುತ್ತದೆ. ಅಲ್ಲಿಂದ ಕೊಳಚೆ ನೀರು ಯಲಹಂಕ ಒಳಚರಂಡಿ ಶುದ್ಧೀಕರಣ ಘಟಕಕ್ಕೆ ಹರಿಯಲಿದ್ದು, ಘಟಕದ ನಾಗರಿಕ ಕಾಮಗಾರಿ ಅಂತಿಮ ಹಂತದಲ್ಲಿದೆ. 2026ರ ಸೆಪ್ಟೆಂಬರ್​ ಅಂತ್ಯದೊಳಗೆ ಪ್ರಾಯೋಗಿಕ ಕಾರ್ಯಾಚರಣೆ ಆರಂಭಿಸುವ ಗುರಿ ಹೊಂದಲಾಗಿದೆ.

ಪಕ್ಷಿ ಸಂರಕ್ಷಣಾ ಮೀಸಲು ಪ್ರದೇಶವಾಗಿ ಘೋಷಿತವಾಗಿರುವ ಯಲಹಂಕ ಪುಟ್ಟೇನಹಳ್ಳಿ ಕೆರೆ, ಸುತ್ತಮುತ್ತಲಿನ ಪ್ರದೇಶಗಳಿಂದ ಹರಿದು ಬರುತ್ತಿದ್ದ ಕೊಳಚೆ ನೀರಿನಿಂದ ತೀವ್ರ ಮಾಲಿನ್ಯಕ್ಕೆ ಒಳಗಾಗಿತ್ತು. ಇದೀಗ ಕೈಗೊಂಡಿರುವ ಈ ಯೋಜನೆಯಿಂದ ಕೆರೆಯ ಪರಿಸರ ಸಂರಕ್ಷಣೆ ಹಾಗೂ ನೀರಿನ ಗುಣಮಟ್ಟ ಸುಧಾರಣೆಗೆ ನೆರವಾಗುವ ನಿರೀಕ್ಷೆಯಿದೆ.

* 2051ರವರೆಗಿನ ಕೊಳಚೆ ನೀರಿನ ಪ್ರಮಾಣ ನಿರ್ವಹಿಸುವ ಸಾಮರ್ಥ್ಯದ ಒಳಚರಂಡಿ ಪೈಪ್​ಲೈನ್​ ಪೂರ್ಣ

* ಸೆಪ್ಟೆಂಬರ್​ ಅಂತ್ಯದೊಳಗೆ ಎಸ್​ಟಿಪಿ ಪ್ರಾಯೋಗಿಕ ಕಾರ್ಯಾಚರಣೆ