ಸಹಜ ಸ್ಥಿತಿಗೆ ಮರಳಿದ ನೇರಳೆ ಮಾರ್ಗ ಮೆಟ್ರೋ ಸಂಚಾರ|metro

ಬೆಂಗಳೂರು: ನಮ್ಮ ಮೆಟ್ರೋ ನೇರಳೆ ಮಾರ್ಗದ -ಕಬ್ಬನ್​ ಪಾರ್ಕ್​ ನಿಲ್ದಾಣದ ಸಂಚಾರದಲ್ಲಿ ಉಂಟಾಗಿದ್ದ ತಾಂತ್ರಿಕ ಸಮಸ್ಯೆಯನ್ನು ಸರಿಪಡಿಸಲಾಗಿದ್ದು, ನೇರಳೆ ಮಾರ್ಗ ಮೆಟ್ರೋ ರೈಲು ಸೇವೆಗಳು ಬುಧವಾರ ಬೆಳಗ್ಗೆ 5 ಗಂಟೆಯಿಂದ ನಿಯಮಿತ ವೇಳಾಪಟ್ಟಿಯ ಪ್ರಕಾರ ಪುನರಾರಂಭಗೊಂಡಿದೆ.

ನೇರಳೆ ಮಾರ್ಗದಲ್ಲಿ ಆಗಿದ್ದ ತಾಂತ್ರಿಕ ದೋಷವನ್ನು ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್​ಸಿಎಲ್​) ಕಾರ್ಯಾಚರಣೆ ಮತ್ತು ನಿರ್ವಹಣಾತಂಡಗಳು ಯಶಸ್ವಿಯಾಗಿ ಸರಿಪಡಿಸಿವೆ.

ಮಂಗಳವಾರ ಸಂಜೆ 6.30ಕ್ಕೆ ನೇರಳೆ ಮಾರ್ಗದಲ್ಲಿನ ಕಬ್ಬನ್​ ಪಾರ್ಕ್​ ನಿಲ್ದಾಣದ ಬಳಿ ಮೆಟ್ರೋದ ಮೂರನೇ ರೈಲು ವ್ಯವಸ್ಥೆಯ ಪ್ರಸ್ತುತ ಕಲೆಕ್ಟರ್​ ಶೂನಲ್ಲಿ ತಾಂತ್ರಿಕ ದೋಷ ಸಂಭವಿಸಿದೆ. ಇದು ನಾಡಪ್ರಭು ಕೆಂಪೇಗೌಡ ನಿಲ್ದಾಣ ಮೆಜೆಸ್ಟಿಕ್​ ಮತ್ತು ಎಂ.ಜಿ. ರಸ್ತೆಯ ನಡುವಿನ ಪ್ರಮುಖ ನಿಲ್ದಾಣಗಳಲ್ಲಿ ರೈಲುಸೇವೆಗಳನ್ನು ಅಡ್ಡಿಪಡಿಸಿದೆ.

ಪೀಕ್​ ಅವಧಿಯಲ್ಲಿ ಸಮಸ್ಯೆ ಸಂಭವಿಸಿದ್ದರಿಂದ ಸಾವಿರಾರು ಪ್ರಯಾಣಿಕರು ಪರದಾಡಿದ್ದಾರೆ. ಆಟೋ, ಕ್ಯಾಬ್​ಗಳು ದುಬಾರಿಯಾಗಿ ಕೆಲವರು ಟ್ರಕ್​ಗಳು ಮತ್ತು ಸರಕು ವಾಹನಗಳನ್ನು ಏರಿ ಪ್ರಯಾಣ ಬೆಳೆಸಿದ್ದರು. ರೈಲಿನಲ್ಲಿ ಸಿಲುಕಿಕೊಂಡಿದ್ದ ಜನರನ್ನು ಅರ್ಧ ಗಂಟೆಯ ಬಳಿಕ ಸ್ಥಳಾಂತರಿಸಲಾಯಿತು. ರಾತ್ರಿಯ ಕೊನೆಯ ರೈಲಿನ ನಂತರವೂ ದುರಸ್ತಿ ಕಾರ್ಯವನ್ನು ಮುಂದುವರಿಸಿದ್ದ ಬಿಎಂಆರ್​ಸಿಎಲ್​ನ ತಂಡಗಳು ಬೆಳಗಿನ ಜಾವ 3.30ರ ಸುಮಾರಿಗೆ ಸಮಸ್ಯೆಯನ್ನು ಬಗೆಹರಿಸಿದೆ.