ನಗರದಲ್ಲಿ ತ್ಯಾಜ್ಯನೀರು ನಿರ್ವಹಣೆಗೆ ಬಲ

ವೇಗವಾಗಿ ವಿಸ್ತರಿಸುತ್ತಿರುವ ಬೆಂಗಳೂರಿನಲ್ಲಿ ತ್ಯಾಜ್ಯನಿರು ನಿರ್ವಹಣೆಯನ್ನು ಬಲಪಡಿಸುವ ನಿಟ್ಟಿನಲ್ಲಿ ಬೆಂಗಳೂರು ಜಲಮಂಡಳಿ ನಗರದ ಎರಡು ಪ್ರಮುಖ ಪ್ರದೇಶಗಳಲ್ಲಿ ತ್ಯಾಜ್ಯನಿರು ಶುದ್ಧೀಕರಣ ಘಟಕಗಳ (ಎಸ್​ಟಿಪಿ) ನಿಮಾರ್ಣ ಮತ್ತು ನಿರ್ವಹಣೆಗಾಗಿ ಚೆನ್ನೆ$ ಮೂಲದ ಜಲ ತಂತ್ರಜ್ಞಾನ ಸಂಸ್ಥೆ ವಿಎ ಟೆಕ್​ ವಾಬ್ಯಾಗ್​ ಲಿಮಿಟೆಡ್​ಗೆ 430 ಕೋಟಿ ರೂ. ಮೌಲ್ಯದ ಗುತ್ತಿಗೆ ನೀಡಲಾಗಿದೆ.

ಯೋಜನೆಯಡಿ ಬೈರಮಂಗಲದಲ್ಲಿ ದಿನಕ್ಕೆ 100 ಎಂಎಲ್​ಡಿ ಸಾಮರ್ಥ್ಯದ ಒಳಚರಂಡಿ ನೀರು ಶುದ್ಧೀಕರಣ ಘಟಕ (ಎಸ್​ಟಿಪಿ), 25 ಎಂಎಲ್​ಡಿ ಸಾಮರ್ಥ್ಯದ ತೃತೀಯ ಹಂತದ ಶುದ್ಧೀಕರಣ ಘಟಕಕ್ಕೆ (ಟಿಟಿಪಿ) 259 ಕೋಟಿ ರೂ. ಹಾಗೂ ಬೆಳ್ಳಂದೂರಿನಲ್ಲಿ 60 ಎಂಎಲ್​ಡಿ ಸಾಮರ್ಥ್ಯದ ಮತ್ತೊಂದು ಎಸ್​ಟಿಪಿ ನಿಮಾರ್ಣಕ್ಕೆ 171 ಕೋಟಿ ರೂ. ವೆಚ್ಚದ ಯೋಜನೆ ರೂಪಿಸಲಾಗಿದೆ. ಘಟಕಗಳ ವಿನ್ಯಾಸ, ಇಂಜಿನಿಯರಿಂಗ್​, ಖರೀದಿ, ನಿಮಾರ್ಣ, ಪರೀಕ್ಷೆ ಮತ್ತು ಕಾರ್ಯಾರಂಭ ಸೇರಿ ಸಂಪೂರ್ಣ ಇಪಿಸಿ ಕಾಮಗಾರಿಯನ್ನು ವಾಬ್ಯಾಗ್​ ನಿರ್ವಹಿಸಲಿದೆ.

ಇಂಧನ ದಕ್ಷತೆಗೆ ಕ್ರಮ:

ಯೋಜನೆಯ ವಿಶೇಷತೆ ಏನೆಂದರೆ, ಶುದ್ಧೀಕರಣ ಘಟಕಗಳಲ್ಲಿ ಉತ್ಪತ್ತಿಯಾಗುವ ಜೈವಿಕ ಅನಿಲ (ಬಯೋಗ್ಯಾಸ್​) ಬಳಸಿಕೊಂಡು ವಿದ್ಯುತ್​ ಉತ್ಪಾದನೆಗೆ ವ್ಯವಸ್ಥೆ ಕಲ್ಪಿಸಲಾಗುತ್ತಿದೆ. ಇದರಿಂದ ವಿದ್ಯುತ್​ ಬಳಕೆ ವೆಚ್ಚ ಕಡಿಮೆಯಾಗುವುದರೊಂದಿಗೆ ಹಸಿರುಮನೆ ಅನಿಲಗಳ ಹೊರಸೂಸುವಿಕೆಯೂ ಇಳಿಕೆಯಾಗಲಿದೆ. ಶುದ್ಧೀಕರಣ ಪ್ರಕ್ರಿಯೆಯಲ್ಲಿ ಆಕ್ಟಿವೇಟೆಡ್​ ಸ್ಲಡ್ಜ್​ ಪ್ರೊಸೆಸ್​ ಹಾಗೂ ಬಯೋಲಾಜಿಕಲ್​ ನ್ಯೂಟ್ರಿಯೆಂಟ್​ ರಿಮೂವಲ್​ ತಂತ್ರಜ್ಞಾನ ಅಳವಡಿಸಲಾಗುತ್ತದೆ. ಬೈರಮಂಗಲದ ತೃತೀಯ ಹಂತದ ಘಟಕದಲ್ಲಿ "ಅಲ್ಟ್ರಾ ಫಿಲ್ಟ್ರೆಷನ್​' ತಂತ್ರಜ್ಞಾನ ಬಳಸಿ ಸಂಸ್ಕರಿಸಿದ ನೀರನ್ನು ಕೆರೆ ಹಾಗೂ ಇತರೆ ಜಲಮೂಲಗಳಿಗೆ ಸುರಕ್ಷಿತವಾಗಿ ಹರಿಸುವ ವ್ಯವಸ್ಥೆ ಕಲ್ಪಿಸಲಾಗುತ್ತಿದೆ.

36 ತಿಂಗಳೊಳಗೆ ಕಾಮಗಾರಿ ಪೂರ್ಣಗೊಳಿಸುವ ಗುರಿ ಹೊಂದಲಾಗಿದ್ದು, ನಂತರ ಏಳು ವರ್ಷಗಳ ಕಾಲ ಘಟಕಗಳ ಕಾರ್ಯಾಚರಣೆ ಮತ್ತು ನಿರ್ವಹಣೆಯ ಹೊಣೆಗಾರಿಕೆಯೂ ವಾಬ್ಯಾಗ್​ ಸಂಸ್ಥೆಯದ್ದಾಗಿರಲಿದೆ.

ಈ ಹಿಂದೆ ಬೆಳ್ಳಂದೂರು ಎಸ್​ಟಿಪಿಯ ಮೊದಲ ಹಂತದ ಕಾಮಗಾರಿಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದ ವಾಬ್ಯಾಗ್​ಗೆ ಇದೀಗ ಎರಡನೇ ಹಂತದ ಕಾಮಗಾರಿಯನ್ನೂ ವಹಿಸಲಾಗಿದೆ. ನಗರೀಕರಣದ ಪರಿಣಾಮ ದಿನದಿನಕ್ಕೆ ಹೆಚ್ಚುತ್ತಿರುವ ತ್ಯಾಜ್ಯನಿರಿನ ಸಮಸ್ಯೆಗೆ ಶಾಶ್ವತ ಪರಿಹಾರ ಕಲ್ಪಿಸುವ ಜತೆಗೆ, ಸುಸ್ಥಿರ ನಗರಾಭಿವೃದ್ಧಿ ಮತ್ತು ವಲಯ ಆರ್ಥಿಕತೆ ಗುರಿ ಸಾಧನೆಯಲ್ಲಿ ಈ ಯೋಜನೆ ಮಹತ್ವದ ಪಾತ್ರ ವಹಿಸುವ ನಿರೀಕ್ಷೆ ಇದೆ.

ನಗರದಲ್ಲಿ ತ್ಯಾಜ್ಯನಿರನ್ನು ಸಮರ್ಪಕವಾಗಿ ಸಂಸ್ಕರಿಸಿ ಮರುಬಳಕೆಗೆ ಒತ್ತು ನೀಡುವ ಉದ್ದೇಶದಿಂದ ಈ ಯೋಜನೆ ರೂಪಿಸಲಾಗಿದೆ. ಶುದ್ಧೀಕರಿಸಿದ ನೀರನ್ನು ಕೈಗಾರಿಕೆಗಳು, ಉದ್ಯಾನವನಗಳು, ಕೆರೆಗಳ ಪುನಶ್ಚೇತನ ಹಾಗೂ ಇತರೆ ಕುಡಿಯಲು ಯೋಗ್ಯವಲ್ಲದ ಅಗತ್ಯಗಳಿಗೆ ಬಳಸುವ ಮೂಲಕ ಶುದ್ಧ ಕುಡಿಯುವ ನೀರಿನ ಮೇಲಿನ ಒತ್ತಡ ಕಡಿಮೆ ಮಾಡುವ ಗುರಿ ಹೊಂದಲಾಗಿದೆ. ಜತೆಗೆ, ವೈಜ್ಞಾನಿಕ ತ್ಯಾಜ್ಯನಿರು ನಿರ್ವಹಣೆಯಿಂದ ಕೆರೆಗಳು ಮತ್ತು ರಾಜಕಾಲುವೆಗಳಿಗೆ ಕಲುಷಿತ ನೀರು ಸೇರುವ ಪ್ರಮಾಣ ತಗ್ಗಿ ಪರಿಸರ ಸಂರಕ್ಷಣೆಗೆ ಉತ್ತೇಜನ ಸಿಗಲಿದೆ. ಹೆಚ್ಚುತ್ತಿರುವ ಜನಸಂಖ್ಯೆ ಹಾಗೂ ನಗರ ವಿಸ್ತರಣೆಯನ್ನು ಗಮನದಲ್ಲಿಟ್ಟುಕೊಂಡು ಮುಂದಿನ ಹಲವು ವರ್ಷಗಳ ನೀರು ಮತ್ತು ಒಳಚರಂಡಿ ನಿರ್ವಹಣೆಯ ಅಗತ್ಯಗಳನ್ನು ಪೂರೈಸುವ ಪ್ರಮುಖ ಮೂಲಸೌಕರ್ಯ ಯೋಜನೆಯಾಗಿ ಇದನ್ನು ಪರಿಗಣಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನಗರದಲ್ಲಿ ತ್ಯಾಜ್ಯನಿರಿನ ಪ್ರಮಾಣ ನಿರಂತರವಾಗಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಶುದ್ಧೀಕರಣ ಮೂಲಸೌಕರ್ಯ ವಿಸ್ತರಣೆ ಅತ್ಯಂತ ಅಗತ್ಯವಾಗಿದೆ. ಹೊಸ ಎಸ್​ಟಿಪಿ ಘಟಕಗಳ ಸ್ಥಾಪನೆಯಿಂದ ಒಳಚರಂಡಿ ನೀರನ್ನು ವೈಜ್ಞಾನಿಕವಾಗಿ ಸಂಸ್ಕರಿಸಿ ಪುನರ್ಬಳಕೆಗೆ ತರಲು ಸಾಧ್ಯವಾಗಲಿದೆ. ಜಲಮಂಡಳಿಯ ಈ ಕ್ರಮವು ನೀರಿನ ಸಂಪನ್ಮೂಲಗಳ ಸಂರಕ್ಷಣೆಗೆ ಪೂರಕವಾಗುವುದರ ಜತೆಗೆ, ನಗರ ಪರಿಸರದ ಗುಣಮಟ್ಟ ಸುಧಾರಣೆಯಲ್ಲೂ ಪ್ರಮುಖ ಪಾತ್ರ ವಹಿಸಲಿದೆ. ಆಧುನಿಕ ತಂತ್ರಜ್ಞಾನ ಆಧಾರಿತ ಘಟಕಗಳ ಮೂಲಕ ಕಡಿಮೆ ವೆಚ್ಚದಲ್ಲಿ ಹೆಚ್ಚು ಪರಿಣಾಮಕಾರಿ ಶುದ್ಧೀಕರಣ ಪ್ರಕ್ರಿಯೆ ಜಾರಿಗೊಳ್ಳಲಿದ್ದು, ಭವಿಷ್ಯದಲ್ಲಿ ಬೆಂಗಳೂರಿನ ನೀರು ನಿರ್ವಹಣಾ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುವ ನಿರೀಕ್ಷೆ ಇದೆ. ಸಾರ್ವಜನಿಕ ಆರೋಗ್ಯ ಮತ್ತು ಪರಿಸರ ಸುರಕ್ಷತೆ ದೃಷ್ಟಿಯಿಂದಲೂ ಈ ಯೋಜನೆ ಮಹತ್ವದ ಹೆಜ್ಜೆಯಾಗಿದೆ.