ನೀಲಿ ಮಾರ್ಗಕ್ಕೆ ಹೆಬ್ಬಾಳದಲ್ಲಿ ಸಂಕೀರ್ಣ ಕಾಮಗಾರಿ

ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ ನಮ್ಮ ಮೆಟ್ರೋ ನೀಲಿ ಮಾರ್ಗ ಪೂರ್ಣ ಪ್ರಮಾಣದ ವಾಣಿಜ್ಯ ಕಾರ್ಯಾಚರಣೆ ಆರಂಭಿಸಲು 2028ರ ಮಾರ್ಚ್​ಗೆ ಹೊಸ ಗುರಿ ನಿಗದಿಯಾಗಿದೆ. ಈ ಹಿಂದೆ 2027ರ ಡಿಸೆಂಬರ್​ ಗಡುವು ನಿಗದಿಯಾಗಿತ್ತು.

ಈ ವಿಳಂಬದ ನಡುವೆ 58.19 ಕಿ.ಮೀ. ಉದ್ದದ ಇಡೀ ಮಾರ್ಗ ಒಮ್ಮೆಗೆ ಸಂಚಾರಕ್ಕೆ ಮುಕ್ತವಾಗುವುದಿಲ್ಲ. ಹಂತ ಹಂತವಾಗಿ  ಯೋಜನೆ ಅನುಷ್ಠಾನಗೊಳ್ಳಲಿದೆ. ಕೆ.ಆರ್​. ಪುರ& ಇಬ್ಬಲೂರು ಭಾಗದಲ್ಲಿ ಅಕ್ಟೋಬರ್​ 2026ರಿಂದ ಪ್ರಾಯೋಗಿಕ ಸಂಚಾರ ಆರಂಭಿಸುವ ಗುರಿ ಇದೆ. ಇಬ್ಬಲೂರು& ಸಿಲ್ಕ್​ಬೋರ್ಡ್​ ಭಾಗದಲ್ಲಿ ಬಾಕಿ ಕಾಮಗಾರಿಗಳಿಂದಾಗಿ ಪರೀಕ್ಷಾರ್ಥ ಸಂಚಾರ ಡಿಸೆಂಬರ್​ 2026 ಅಥವಾ 2027ರ ಜನವರಿವರೆಗೆ ಮುಂದೂಡಿಕೆಯಾಗುವ ಸಾಧ್ಯತೆ ಇದೆ.

ಹೆಬ್ಬಾಳದಲ್ಲಿ ಸಂಕೀರ್ಣ ಕಾಮಗಾರಿ:

ನೀಲಿ ಮಾರ್ಗ ವಿಳಂಬದ ಕೇಂದ್ರಬಿಂದು ಇದೀಗ ಹೆಬ್ಬಾಳ& ಕೆಂಪಾಪುರ ಭಾಗವಾಗಿದೆ. ಇಲ್ಲಿ ಸಾಮಾನ್ಯ ಎತ್ತರಿಸಿದ ಮೆಟ್ರೋ ಮಾರ್ಗ ನಿಮಾರ್ಣಕ್ಕಿಂತ ಹೆಚ್ಚಿನ ಇಂಜಿನಿಯರಿಂಗ್​ ಸವಾಲುಗಳಿವೆ. ಭವಿಷ್ಯದ ಕಿತ್ತಳೆ ಮಾರ್ಗ ಸಂಪರ್ಕವನ್ನೂ ಗಮನದಲ್ಲಿಟ್ಟುಕೊಂಡು ಹೆಬ್ಬಾಳದಲ್ಲಿ ಹೆಚ್ಚುವರಿ ಮೂಲಸೌಕರ್ಯ ಕಲ್ಪಿಸಬೇಕಾಗಿದೆ. ಹೀಗಾಗಿ ಮುಂದಿನ ದಿನಗಳಲ್ಲಿ ಮತ್ತೆ ಕಾಮಗಾರಿ ನಡೆಸಿ ಹಳೆಯ ರಚನೆಗಳನ್ನು ತೆರವುಗೊಳಿಸುವ ಪರಿಸ್ಥಿತಿ ಬರದಂತೆ ಈಗಲೇ ಹೆಚ್ಚುವರಿ ವ್ಯವಸ್ಥೆ ನಿರ್ಮಿಸುವ ಪ್ರಯತ್ನ ನಡೆಯುತ್ತಿದೆ ಎನ್ನಲಾಗಿದೆ. ನಾಲ್ಕು ಎತ್ತರಿಸಿದ ಹಳಿಗಳಿಗೆ ಅವಕಾಶ ಕಲ್ಪಿಸುವ ವಿನ್ಯಾಸವೂ ಈ ಭಾಗದ ಕಾಮಗಾರಿಯನ್ನು ಸಂಕೀರ್ಣಗೊಳಿಸಿದೆ.

ಐಟಿ ಕಾರಿಡಾರ್​ಗೆ ಮೊದಲು ಸಿಗಲಿದೆ ಸಂಪರ್ಕ:

19.75 ಕಿ.ಮೀ. ಉದ್ದದ ಸಿಲ್ಕ್​ಬೋರ್ಡ್​& ಕೆ.ಆರ್​. ಪುರ ಮಾರ್ಗವು ಪೂರ್ಣಗೊಂಡರೆ ನಗರದ ಪ್ರಮುಖ ಐಟಿ ಪ್ರದೇಶಗಳಾದ ಬೆಳ್ಳಂದೂರು, ದೇವರಬೀಸನಹಳ್ಳಿ, ಕಾಡುಬೀಸನಹಳ್ಳಿ, ಮಾರತ್ತಹಳ್ಳಿ ಮತ್ತಿತರ ಭಾಗಗಳಿಗೆ ಸಾರ್ವಜನಿಕ ಸಾರಿಗೆ ಸಂಪರ್ಕ ಮತ್ತಷ್ಟು ಬಲಗೊಳ್ಳಲಿದೆ. ಈ ಮಾರ್ಗವು ಈಗಾಗಲೇ ತೀವ್ರ ವಾಹನ ದಟ್ಟಣೆಯಿಂದ ಬಳಲುತ್ತಿರುವ ಹೊರವರ್ತುಲ ರಸ್ತೆಗೆ ಪರ್ಯಾಯ ಸಾರಿಗೆ ವ್ಯವಸ್ಥೆ ಕಲ್ಪಿಸುವ ಉದ್ದೇಶ ಹೊಂದಿದೆ.

ಆದರೆ, ಮಾರತ್ತಹಳ್ಳಿ ಮತ್ತು ಸಿಲ್ಕ್​ಬೋರ್ಡ್​ ಭಾಗದ ಕೆಲವು ಕಾಮಗಾರಿಗಳು ಇನ್ನೂ ಪೂರ್ಣಗೊಳ್ಳಬೇಕಿರುವುದರಿಂದ ಈ ಭಾಗದ ವೇಳಾಪಟ್ಟಿಯ ಮೇಲೂ ಪರಿಣಾಮ ಬೀರಿದೆ. ಸಿಲ್ಕ್​ಬೋರ್ಡ್​ನಲ್ಲಿ ರೈಲು ಹಿಮ್ಮುಖವಾಗಿ ತಿರುಗಲು ಪ್ರಸ್ತುತ ಮೇಲ್ಸೇತುವೆ ಮೇಲಿನಿಂದ ಸುಮಾರು 413.8 ಮೀಟರ್​ ವಯಾಡಕ್ಟ್​ ವಿಸ್ತರಿಸುವ ಕಾಮಗಾರಿಯೂ ನಡೆಯುತ್ತಿದೆ.