ಮೆಟ್ರೋ 3ನೇ ಹಂತ 2031ಕ್ಕೆ ಮುಗಿವ ನಿರೀಕ್ಷೆ |METRO

ನಮ್ಮ ಮೆಟ್ರೋ 3ನೇ ಹಂತದ ಯೋಜನೆಯಡಿ ಮಂಗಳವಾರ ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್​ಸಿಎಲ್​) 18.581 ಕಿ.ಮೀ. ಉದ್ದದ ಮೂರು ಪ್ಯಾಕೇಜ್​ಗಳಿಗೆ 4,187.41 ಕೋಟಿ ರೂ. ಅಂದಾಜು ವೆಚ್ಚದಲ್ಲಿ ಮುಕ್ತ ಇ&ಟೆಂಡರ್​ಗಳನ್ನು ಆಹ್ವಾನಿಸಿದೆ. ಮೆಟ್ರೋ ವೈಯಾಡಕ್ಟ್​ಗಳು, ರೈಲು& ರಸ್ತೆ ಡಬಲ್​ ಡೆಕ್ಕರ್​ ಮೇಲ್ಸೇತುವೆಗಳು ಹಾಗೂ ನಿಲ್ದಾಣಗಳ ನಿಮಾರ್ಣ ಈ ಪ್ಯಾಕೇಜ್​ಗಳಲ್ಲಿ ಒಳಗೊಂಡಿವೆ. 2031ರ ವೇಳೆಗೆ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ.

ಫೇಸ್​&3ರಲ್ಲಿ ಒಟ್ಟು ಎಂಟು ಪ್ಯಾಕೇಜ್​ಗಳಲ್ಲಿ ಟೆಂಡರ್​ ಆಹ್ವಾನಿಸುವ ಯೋಜನೆ ಬಿಎಂಆರ್​ಸಿಎಲ್​ ಹೊಂದಿದ್ದು, ಇದರಲ್ಲಿ 6 ಪ್ಯಾಕೇಜ್​ಗಳು ಹೊರವಲಯ ರಸ್ತೆ ವಿಭಾಗಕ್ಕೆ ಮತ್ತು ಎರಡು ಮಾಗಡಿ ರಸ್ತೆ ಮಾರ್ಗಕ್ಕೆ ಸೇರಿವೆ. ಉಳಿದ ಐದು ಪ್ಯಾಕೇಜ್​ಗಳಿಗೆ ಜಪಾನ್​ ಇಂಟರ್​ನ್ಯಾಷನಲ್​ ಕೋ& ಆಪರೇಶನ್​ ಏಜೆನ್ಸಿಯೊಂದಿಗೆ (ಜೈಕಾ) ಸಾಲ ಒಪ್ಪಂದಕ್ಕೆ ಸಹಿ ಆದ ಬಳಿಕ ಮಾರ್ಚ್​ ಅಥವಾ ಏಪ್ರಿಲ್​ನಲ್ಲಿ ಟೆಂಡರ್​ ಆಹ್ವಾನಿಸಲಾಗುವುದು ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಜೈಕಾ 6,775 ಕೋಟಿ ರೂ. ಸಾಲ ನೀಡಲಿದ್ದು, ಮೆಟ್ರೋ ಭಾಗಕ್ಕೆ 15,611 ಕೋಟಿ ರೂ. ಹಾಗೂ ಡಬಲ್​ ಡೆಕ್ಕರ್​ಗೆ 9,692.33 ಕೋಟಿ ರೂ. ವೆಚ್ಚವಾಗಲಿದೆ. ಡಬಲ್​ ಡೆಕ್ಕರ್​ ವೆಚ್ಚವನ್ನು ಸಂಪೂರ್ಣವಾಗಿ ರಾಜ್ಯ ಸರ್ಕಾರವೇ ಭರಿಸಲಿದೆ.

ಮೆಟ್ರೋ ಹಂತ&1 ಪ್ರಸ್ತುತ ಕಾರ್ಯಾಚರಣೆಯಲ್ಲಿರುವ ಮಾರ್ಗಗಳನ್ನು ಒಳಗೊಂಡಿದೆ (ನೇರಳೆ ಮತ್ತು ಹಸಿರು). ಹಂತ 1ರ ವಿಸ್ತರಣೆಗಳು ಮತ್ತು ಹೊಸ ಮಾರ್ಗ (ಹಳದಿ ಮತ್ತು ಗುಲಾಬಿ) ಹಂತ 2ರ ಭಾಗವಾಗಿದೆ. ಹಳದಿ ಮಾರ್ಗವು ಕೆ.ಆರ್​.ಪುರದಿಂದ ಸೆಂಟ್ರಲ್​ ಸಿಲ್ಕ್​ಬೋರ್ಡ್​ವರೆಗೆ (ನೀಲಿ ಮಾರ್ಗ&- ಹಂತ 2ಎ) ಮತ್ತು ಬೊಮ್ಮಸಂದ್ರದವರೆಗೆ ವಿಸ್ತರಿಸಿದೆ. ಗುಲಾಬಿ ಮಾರ್ಗವು ಕಾಳೇನ ಅಗ್ರಹಾರದಿಂದ ನಾಗವಾರದವರೆಗೆ ಇರಲಿದೆ. ಹಂತ&3ರಲ್ಲಿ ಎರಡು ಮುಖ್ಯ ಕಾರಿಡಾರ್​ಗಳನ್ನು ಒಳಗೊಂಡಿದ್ದು, ಕಿತ್ತಳೆ ಮಾರ್ಗ ಕಾರಿಡಾರ್​&1 ಜೆ.ಪಿ.ನಗರ 4ನೇ ಹಂತದಿಂದ ಕೆಂಪಾಪುರದವರೆಗೆ (ಹೊರವರ್ತುಲ ರಸ್ತೆ ) 32.15 ಕಿ.ಮೀ. ಉದ್ದದ ಮಾರ್ಗ ಹಾಗೂ ಕಾರಿಡಾರ್​&2 ಮಾಗಡಿ ರಸ್ತೆಯ ಹೊಸಹಳ್ಳಿಯಿಂದ ಕಡಬಗೆರೆಯವರೆಗೆ 12.5 ಕಿ.ಮೀ. ಉದ್ದದ ಮಾರ್ಗವಾಗಿದೆ. 

ಇದಲ್ಲದೆ, ಹಂತ 3ಎ ಹೆಬ್ಬಾಳ ಮತ್ತು ಸರ್ಜಾಪುರ ನಡುವಿನ ಸುಮಾರು 36.6 ಕಿ.ಮೀ. ಉದ್ದದ ಮಾರ್ಗವನ್ನು ಯೋಜಿಸಲಾಗಿದೆ. ಹಂತ 4ರಲ್ಲಿ ಬೆಂಗಳೂರು&-ತುಮಕೂರು (59.60 ಕಿ.ಮೀ.) ಮತ್ತು ಜಿಗಣಿ, ಆನೇಕಲ್​, ಅತ್ತಿಬೆಲೆ, ಸರ್ಜಾಪುರ, ವರ್ತೂರು ಪ್ರದೇಶಗಳನ್ನು ಒಳಗೊಂಡಿರುವ ಅಂತರ ಜಿಲ್ಲಾ ಕಾರಿಡಾರ್​ ನಿರ್ಮಾಣಕ್ಕೆ ಬಿಎಂಆರ್​ಸಿಎಲ್​ ಯೋಜನೆ ರೂಪಿಸುತ್ತಿದೆ.