ಸಸ್ಯಕಾಶಿಯಲ್ಲಿ ಗಂಗ ಸಾಮ್ರಾಜ್ಯ ವೈಭವ

ಸುಮಾರು 1200 ವರ್ಷ ಇತಿಹಾಸವಿರುವ ಬೇಗೂರು ಪಂಚಲಿಂಗೇಶ್ವರ ದೇವಾಲಯದ ಪಷ್ಪಮಾದರಿಯೇ ಲಾಲ್​ಬಾಗ್​ ಗಾಜಿನ ಮನೆಯ ಕೇಂದ್ರ ಬಿಂದು. "ಬೆಂಗಳೂರು' ಎಂಬ ಹೆಸರಿನ ಮೊದಲ ಉಲ್ಲೇಖ ಇದೇ ದೇಗುಲದಲ್ಲಿದ್ದ ಶಾಸನದಿಂದ ಪತ್ತೆಯಾಗಿದ್ದು, ಬೆಂಗಳೂರಿಗರೆಲ್ಲರೂ ತಿಳಿದಿರಬೇಕಾದ ವಿಚಾರ. ಕನ್ನಡ ಸಾಹಿತ್ಯ, ಶಿಕ್ಷಣ, ನೀರಾವರಿ ಹಾಗೂ ಶಿಲ್ಪಕಲೆ ಕೊಡುಗೆ ನೀಡಿದ ಗಂಗರ ಆಳ್ವಿಕೆಯ ವೈಭವವನ್ನು ಬಿಂಬಿಸುವ ಬಣ್ಣಬಣ್ಣದ ಹೂವಿನ ಕಲಾಕೃತಿಗಳು ಈ ಬಾರಿಯ ಪ್ರದರ್ಶನದ ಪ್ರಮುಖ ಆಕರ್ಷಣೆಯಾಗಿವೆ.

ಗಂಗರು ಪೂಜಿಸುತ್ತಿದ್ದ ಭಗವಾನ್​ ಸೂರ್ಯನಾರಾಯಣನ ಮೂರ್ತಿಗೆ ಪುಷ್ಪಗಳನ್ನು ಅರ್ಪಿಸುವ ಮೂಲಕ ಪ್ರದರ್ಶನಕ್ಕೆ ಚಾಲನೆ ನೀಡಿರುವುದು ವಿಶೇಷ. ಗಂಗ ದೊರೆಗಳ ಬಲಿಷ್ಠ ಗಜಸೇನೆ, ಯುದ್ಧದ ಸನ್ನಿವೇಶಗಳು, ಪ್ರದರ್ಶನದ ಒಂದು ಭಾಗವನ್ನು ಸುಂದರ ರಣರಂಗದಂತೆ ಬಿಂಬಿಸಿದರೆ, ಮತ್ತೊಂದು ಭಾಗ ಶ್ರವಣಬೆಳಗೊಳದ ಬಾಹುಬಲಿ ಪ್ರತಿಮೆ ಹಾಗೂ ತಲಕಾಡಿನ ದೇವಾಲಯಗಳ ಪ್ರತಿಕೃತಿಗಳನ್ನು ಹೂಗಳಿಂದ ನಿರ್ಮಿಸಿರುವುದು, ಗಂಗರ ಶಿಲ್ಪಕಲಾ ಪ್ರೌಢಿಮೆಯನ್ನು ಎತ್ತಿ ತೋರಿಸುತ್ತಿದೆ. ಗಂಗರ ಕಾಲದ ನಗರೇಶ್ವರ ದೇವಾಲಯವು ಸರಳ ಹಾಗೂ ಸುಂದರವಾದ ಚೌಕಾಕಾರದ ಗರ್ಭಗುಡಿ ಮತ್ತು ಮುಖಮಂಟಪವನ್ನು ಹೊಂದಿದ್ದು, ದೇವಾಲಯದ ಆವರಣದಲ್ಲಿ ಸುಂದರವಾದ ಕೆತ್ತನೆಗಳುಳ್ಳ ಕಂಬಗಳು, ವೀರಗಲ್ಲುಗಳು ಮತ್ತು ಪ್ರಾಚಿನ ಶಿಲ್ಪಗಳು ಗತವೈಭವವನ್ನು ಸ್ಮರಿಸುತ್ತದೆ. ವೀರನಾಗಿದ್ದ ಗಂಗ ಅರಸರಲ್ಲಿ ಅಗ್ರಗಣ್ಯ ಎನಿಸಿಕೊಂಡಿದ್ದ ಶ್ರೀಪುರುಷ ಆನೆಯೊಂದಿಗಿರುವ ಪ್ರತಿಮೆ ಕಣ್ಮನ ಸೆಳೆಯುತ್ತಿದೆ.

ಗಾಜಿನಮನೆಯ ಒಳಾಂಗಣದ ಹಿಂಬದಿಯ ಪರಿಧಿಯಲ್ಲಿ ಗಂಗವಂಶದ ದುರ್ವಿನೀತ, 1ನೇ ಶಿವಮಾರ, ನೀತಿಮಾರ್ಗ ಎರಡನೆಗಂಗ, 2ನೇ ರಾಚಮಲ್ಲ, 2ನೇ ಬೂತುಗ, 2ನೇ ಮಾರಸಿಂಹ ಮತ್ತು ಕೊನೆಯ ದೊರೆ 4ನೇ ರಾಚಮಲ್ಲ ಇವರ ಎದೆಮಟ್ಟದ ಬೃಹತ್​ ಪ್ರತಿಮೆಗಳನ್ನು ಗಂಗವಂಶದ ರಾಜಲಾಂಛನದ ಕಲಾಕೃತಿಯ ನಡುವೆ, ಅದ್ಭುತವಾಗಿ ಜೋಡಿಸಲಾಗಿದೆ. ಮಧ್ಯೆ ಹೂಜೋಡಣೆ ವರ್ಣರಂಜಿತವಾಗಿದೆ.

ಗಂಗರ ಸಾಮಾಜ್ಯ, ಅರಸರು, ಶಿಲ್ಪಕಲೆ ಹೀಗೆ ಪ್ರತಿಯೊಂದನ್ನು ಅದ್ಭುತವಾಗಿ ಹೂಗಳಿಂದ ಜೋಡಿಸುವ ಮೂಲಕ ಸಮಗ್ರ ಮಾಹಿತಿಯನ್ನು ಈ ಪ್ರದರ್ಶನ ನೀಡುತ್ತಿದೆ. ಕೇವಲ ಲಪುಷ್ಪ ಪ್ರದರ್ಶನ ಮಾತ್ರವಲ್ಲ, ಯವ ಉದ್ಯಮಿಗಳಿಗೆ ತಮ್ಮ ಸ್ಟಾಲ್​ಗಳನ್ನು ಹಾಕಲು ಅವಕಾಶ ಕಲ್ಪಿಸುವ ಮೂಲಕ ಪ್ರೋತ್ಸಾಹ ನೀಡಲಾಗುತ್ತಿದೆ.

— ವರ್ಷಿತಾ, ತಾತುಗುಣಿ

ನಾವು ಪ್ರತಿವರ್ಷ ಲಪುಷ್ಪ ಪ್ರದರ್ಶನಕ್ಕೆ ಬರುತ್ತಿದ್ದೇವೆ. ಈ ಬಾರಿ ಮೊದಲ ದಿನವೇ ತುಂಬಾ ಜನ ಸೇರಿರುವುದು ಖುಷಿಯಾಗಿದೆ. ವಾರದದಿನವೇ ಇಷ್ಟು ಮಂದಿ ಸೇರಿದ್ದಾರೆ. ಇನ್ನೂ ವಾರಾಂತ್ಯಗಳಲ್ಲಿ ಭರ್ಜರಿ ಜನ ಬರುವ ನಿರೀೆ ಇದೆ.

— ಜಾನ್ವಿ, ಕೋಣನಕುಂಟೆ