ಯಡಿಯೂರಿನಲ್ಲಿ "ಅನಕೃ ಕನ್ವೆನ್ಷನ್​ ಸೆಂಟರ್​' ಉದ್ಘಾಟನೆ

ಬಡ ಹಾಗೂ ಮಧ್ಯಮ ವರ್ಗದವರಿಗೆ ಕಡಿಮೆ ವೆಚ್ಚದಲ್ಲಿ ಶುಭ ಸಮಾರಂಭಗಳನ್ನು ನಡೆಸಲು ಅನುಕೂಲತೆ ಕಲ್ಪಿಸುವ ಉದ್ದೇಶದಿಂದ ಯಡಿಯೂರು ವಾರ್ಡ್​ನಲ್ಲಿ ನಿರ್ಮಿಸಲಾಗಿರುವ ಅ.ನ. ಕೃಷ್ಣರಾಯ ಕನ್ವೆನ್ಷನ್​ ಸೆಂಟರ್​' ಹಾಗೂ ಡಾ. ಪುನೀತ್​ ರಾಜ್​ಕುಮಾರ್​ ಸಭಾಂಗಣವನ್ನು ವಿಧಾನಸಭೆ ವಿರೋಧ ಪಕ್ಷದ ನಾಯಕ ಆರ್​. ಅಶೋಕ್​ ಉದ್ಘಾಟಿಸಿದರು.

ಬಳಿಕ ಮಾತನಾಡಿದ ಅವರು, ಯಡಿಯೂರು ಕೆರೆಯ ಅಭಿವೃದ್ಧಿಯಿಂದ ಪರಿಸರ ಸಂರಕ್ಷಣೆ ಹಾಗೂ ಅಂತರ್ಜಲ ವೃದ್ಧಿಗೆ ನೆರವಾಗಿದೆ. ಹಿಂದೆ ಇಲ್ಲಿ ಹಳೆಯ ಪಾಲಿಕೆ ಕಟ್ಟಡವಿದ್ದರೆ, ಇದೀಗ ಆಧುನಿಕ ಹಾಗೂ ಸುಸಜ್ಜಿತ ಕಲ್ಯಾಣ ಮಂಟಪ ಮತ್ತು ಸಭಾಂಗಣ ನಿಮಾರ್ಣಗೊಂಡಿರುವುದು ಹೆಮ್ಮೆಯ ಸಂಗತಿ. ಬಡ ಕುಟುಂಬಗಳು ಸಾಲ ಮಾಡಿ ಮದುವೆ ಮಾಡುವ ಪರಿಸ್ಥಿತಿ ಬರಬಾರದು. ಅದಕ್ಕಾಗಿ ಕಡಿಮೆ ಬಾಡಿಗೆಯಲ್ಲಿ ಈ ಸೌಲಭ್ಯ ಕಲ್ಪಿಸಲಾಗಿದೆ ಎಂದರು.

ಸಂಸದ ತೇಜಸ್ವಿ ಸೂರ್ಯ ಮಾತನಾಡಿ, ಕರ್ನಾಟಕ ಏಕೀಕರಣ ಹೋರಾಟದಲ್ಲಿ ಅನಕೃ ಪಾತ್ರ ಸ್ಮರಣೀಯವಾಗಿತ್ತು. ನಟ ಡಾ. ಪುನೀತ್​ ರಾಜ್​ಕುಮಾರ್​ ಜನ& ಮನಗಳಲ್ಲಿ ಶಾಶ್ವತ ಸ್ಥಾನ ಪಡೆದಿದ್ದಾರೆ. ಆಧುನಿಕ ಸೌಲಭ್ಯಗಳಿರುವ ಈ ಕೇಂದ್ರಗಳನ್ನು ಸಾರ್ವಜನಿಕರು ಸದ್ಬಳಕೆ ಮಾಡಿಕೊಳ್ಳಬೇಕು ಎಂದು ಕರೆ ನೀಡಿದರು. ಇದೇ ವೇಳೆ ಜಿಬಿಎ ಚುನಾವಣೆಗಳನ್ನು ಶೀಘ್ರ ನಡೆಸುವಂತೆ ಸರ್ಕಾರಕ್ಕೆ ಆಗ್ರಹಿಸಿದರು.

ನಿಮಾರ್ಪಕಿ ಅಶ್ವಿನಿ ಪುನೀತ್​ ರಾಜ್​ಕುಮಾರ್​ ಮಾತನಾಡಿ, ಸಾರ್ವಜನಿಕರ ಉಪಯೋಗಕ್ಕಾಗಿ ನಿರ್ಮಿಸಿರುವ ಈ ಸಭಾಂಗಣ ಮತ್ತು ಕಲ್ಯಾಣ ಮಂಟಪವನ್ನು ಜನರು ಹೆಚ್ಚಿನ ಪ್ರಮಾಣದಲ್ಲಿ ಬಳಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು.

ಅನಕೃ ಪುತ್ರ ಗೌತಮ್​, ಮಾಜಿ ಬಿಬಿಎಂಪಿ ಆಡಳಿತ ಪಕ್ಷದ ನಾಯಕ ಎನ್​.ಆರ್​. ರಮೇಶ್​, ಮಾಜಿ ಸದಸ್ಯೆ ಪೂರ್ಣಿಮಾ ರಮೇಶ್​ ಇದ್ದರು.

ನಗರದಲ್ಲಿ ಕಲ್ಯಾಣ ಮಂಟಪಗಳ ಬಾಡಿಗೆ ಲಕ್ಷಾಂತರ ರೂ. ಆಗಿರುವ ಸಂದರ್ಭದಲ್ಲಿ ಅನಕೃ ಕನ್ವೆನ್ಷನ್​ ಸೆಂಟರ್​ ಅನ್ನು ಮದುವೆ ಕಾರ್ಯಕ್ರಮಗಳಿಗೆ ಕೇವಲ 70 ಸಾವಿರ ರೂ.ಗೆ ಲಭ್ಯವಾಗುವಂತೆ ಮಾಡಲಾಗಿದೆ. ಎ.ಸಿ. ಸೌಕರ್ಯವುಳ್ಳ ಸಭಾಂಗಣದಲ್ಲಿ 600ರಿಂದ 700 ಆಸನ ವ್ಯವಸ್ಥೆಯಿದೆ. 300ಕ್ಕೂ ಹೆಚ್ಚು ಜನರಿಗೆ ಏಕಕಾಲದಲ್ಲಿ ಊಟ ಮಾಡಬಹುದಾಗಿದೆ. 8 ವಿಶಾಲ ಕೊಠಡಿಗಳಿದ್ದು, ಅತ್ಯಾಧುನಿಕ ಧ್ವನಿ ವ್ಯವಸ್ಥೆ ಹಾಗೂ ಅಂತಾರಾಷ್ಟ್ರೀಯ ಗುಣಮಟ್ಟದ ಸೌಲಭ್ಯಗಳಿವೆ. ಡಾ. ಪುನೀತ್​ ಸಭಾಂಗಣವನ್ನು 25 ಸಾವಿರ ರೂ. ಬಾಡಿಗೆಯಲ್ಲಿ ಬಳಸಿಕೊಳ್ಳಬಹುದಾಗಿದೆ. ಚಲನಚಿತ್ರಗಳ ಆಡಿಯೋ-, ವಿಡಿಯೋ ಬಿಡುಗಡೆ ಕಾರ್ಯಕ್ರಮಗಳು, ನಾಟಕ, ಸಾಂಸತಿಕ ಕಾರ್ಯಕ್ರಮಗಳು, ಶಾಲಾ&-ಕಾಲೇಜುಗಳ ವಾರ್ಷಿಕೋತ್ಸವಗಳಿಗೆ ಇದು ವೇದಿಕೆಯಾಗಲಿದೆ.