ಪೊಲೀಸ್​ ಠಾಣೆಗಳಲ್ಲಿರುವ 11,341 ವಾಹನಗಳ ಸ್ಥಳಾಂತರ

ಗ್ರೇಟರ್​ ಬೆಂಗಳೂರು ಪ್ರಾಧಿಕಾರ (ಜಿಬಿಎ) ವ್ಯಾಪ್ತಿಯ ಎಲ್ಲ ಪೊಲೀಸ್​ ಠಾಣೆಗಳಲ್ಲಿ ಅಪಘಾತ ಇತ್ಯಾದಿ ಪ್ರಕರಣ ಸಂಬಂಧಪಟ್ಟ ಸುಮಾರು 11,341 ವಾಹನಗಳನ್ನು ನಗರದ ವಿವಿಧ ಭಾಗಗಳಲ್ಲಿ ಇರುವ ಜಾಗಕ್ಕೆ ಸ್ಥಳಾಂತರಿಸಲು ಗ್ರೇಟರ್​ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ, ಜಯನಗರ ಪೊಲೀಸ್​ ಠಾಣೆಯಲ್ಲಿ ಬುಧವಾರ ಚಾಲನೆ ನೀಡಿದರು.

ಬಳಿಕ ವರದಿಗಾರರೊಂದಿಗೆ ಮಾತನಾಡಿದ ಸಚಿವರು, ಬೆಂಗಳೂರು ಜನರಿಗೆ ಕಾಡುವ ಹಳೇ ಸಮಸ್ಯೆಗಳಲ್ಲಿ ಇದೂ ಒಂದು. ಈಗಾಗಲೇ ಪಾದಚಾರಿ ಮಾರ್ಗ ತೆರವು, ಖಾಲಿ ನಿವೇಶನಗಳ ಸ್ವಚ್ಛತೆ ಹಾಗೂ ಇತರ ನಗರ ಸೌಂದರೀಕರಣ ಕೆಲಸಗಳು ನಡೆಯುತ್ತಿದೆ. ಪೊಲೀಸ್​ ಹಾಗೂ ಕಂದಾಯ ಇಲಾಖೆಗಳ ಸಹಕಾರದಿಂದ ನಗರದ ಪೊಲೀಸ್​ ಠಾಣೆಯ ಸುತ್ತಮುತ್ತ ಹತ್ತಾರು ವರ್ಷಗಳಿಂದ ನಿಂತಿರುವ ಪ್ರಕರಣಗಳ ಸಂಬಂಧ ಜಪ್ತಿ ಮಾಡಿರುವ ವಾಹನಗಳು, ಅಪಘಾತಕ್ಕೆ ಒಳಪಟ್ಟು ವಶಪಡಿಸಿಕೊಂಡಿರುವ ವಾಹನಗಳನ್ನು ಸ್ಥಳಾಂತರಿಸಲು ಯೋಜನೆ ರೂಪಿಸಲಾಗಿದೆ ಎಂದರು.

ಪೊಲೀಸ್​ ಠಾಣೆಗಳಲ್ಲಿರುವ ವಾಹನಗಳು ತುಕ್ಕು ಹಿಡಿದಿದ್ದು, ರಾತ್ರಿ ವೇಳೆ ಬಿಡಿಭಾಗಗಳ ಕಳವು ಇತ್ಯಾದಿ ಅಕ್ರಮ ಚಟುವಟಿಕೆಗಳಿಗೂ ತುತ್ತಾಗುತ್ತಿದ್ದು, ಜನರು ರಸ್ತೆಗಳಲ್ಲಿ ಓಡಾಡಲು ಅಡ್ಡಿಯಾಗುತ್ತಿದೆ ಎಂದು ಜನಪ್ರತಿನಿಧಿಗಳ ಆದಿಯಾಗಿ ಹಲವರಿಂದ ದೂರು ಬರುತ್ತಿರುವ ಹಿನ್ನೆಲೆ ಕ್ರಮ ಕೈಗೊಳ್ಳಲಾಗುತ್ತಿದೆ. ರಾಗಿಗುಡ್ಡ ಸೇರಿ ಜಿಬಿಎ ವ್ಯಾಪ್ತಿಯ ವಿವಿಧ 7 ಭಾಗಗಳಲ್ಲಿ ಸ್ಥಳಾಂತರಕ್ಕೆ ಜಾಗ ನಿಗದಿ ಮಾಡಿದ್ದು, ಇದಕ್ಕಾಗಿ ಕಂದಾಯ ಇಲಾಖೆ 26 ಎಕರೆ ಜಾಗವನ್ನು ನೀಡಿದೆ ಎಂದು ತಿಳಿಸಿದರು.

ಕೋರ್ಟ್​ ಪ್ರಕರಣಗಳು ಇತ್ಯರ್ಥ ಆಗುವ ತನಕ ನಗರದ ಪೊಲೀಸ್​ ಠಾಣೆಗಳಲ್ಲಿ ಬಿದ್ದಿರುವ ವಾಹನಗಳನ್ನು ವಿವಿಧ ಜಾಗಗಳಿಗೆ ಸ್ಥಳಾಂತರಿಸಲಾಗುವುದು. ಅಲ್ಲದೆ ಎಲ್ಲ ಸ್ಥಳಗಳಿಗೆ ಬೇಲಿ ಹಾಕಿ ರಕ್ಷಣೆ ನೀಡುವುದರ ಜತೆಗೆ ಸಿಸಿ ಕ್ಯಾಮರಾ ಕಣ್ಗಾವಲಲ್ಲಿ ಇರಿಸಲಾಗುವುದು. ಪೊಲೀಸ್​ ಬಂದೋಬಸ್ತ್​ ಕೂಡ ನೀಡಲಾಗುವುದು ಎಂದು ಹೇಳಿದರು.

ಶಾಸಕ ಸಿ.ಕೆ. ರಾಮಮೂರ್ತಿ, ಜಿಬಿಎ ದಣ ಪಾಲಿಕೆ ಆಯುಕ್ತ ಕೆ.ಎನ್​. ರಮೇಶ್​ ಮತ್ತಿತರರು ಇದ್ದರು. ಸಂಚಾರ ವಿಭಾಗದ ಜಂಟಿ ಪೊಲೀಸ್​ ಆಯುಕ್ತ ಕಾರ್ತಿಕ್​ ರೆಡ್ಡಿ ಹಾಗೂ ಪಶ್ಚಿಮ ವಲಯದ ಜಂಟಿ ಪೊಲೀಸ್​ ಆಯುಕ್ತ ವಂಶಿ ಕೃಷ್ಣ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದರು.

ಪಾದಚಾರಿ ಮಾರ್ಗ ಒತ್ತುವರಿ ತೆರವು ಕಾರ್ಯಾಚರಣೆಯ ಭಾಗವಾಗಿ ಜಯನಗರ ಪೊಲೀಸ್​ ಠಾಣೆ ಮುಂಭಾಗದಲ್ಲಿ ನಿಲುಗಡೆ ಮಾಡಲಾಗಿದ್ದ ಒಟ್ಟು 111 ಹಳೇ ವಾಹನಗಳನ್ನು ರಾಗಿಗುಡ್ಡಕ್ಕೆ ಸ್ಥಳಾಂತರಿಸಲಾಯಿತು.