ಬೆಂಗಳೂರು

ಆಸ್ತಿಯ ಸಂಪೂರ್ಣ ಹಕ್ಕು ಮಾಲೀಕರದ್ದೇ

ಜಿಬಿಎ
ಜಿಬಿಎ
ಪವನ್ ಆಚಾರ್ಯ ನೀರ್ಚಾಲು
Published on: 

ಪ್ರಮುಖ ಮುಖ್ಯಾಂಶಗಳು

  • ಸಿಎಂ ಡಿ.ಕೆ. ಶಿವಕುಮಾರ್​ ಹೇಳಿಕೆ
  • ಅಪಾರ್ಟ್​ಮೆಂಟ್​ ನಿವಾಸಿಗಳ ಹಕ್ಕು ರಕ್ಷಣೆಗೆ ಬರಲಿದೆ ಮಸೂದೆ
  • ಅಭಿಪ್ರಾಯ ಸಲ್ಲಿಸಲು ಆ. 6ರವರೆಗೆ ಅವಕಾಶ
ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಅಪಾರ್ಟ್​ಮೆಂಟ್​ ಮಾಲೀಕರ ಹಕ್ಕುಗಳನ್ನು ಸಂರಕ್ಷಿಸುವ ನಿಟ್ಟಿನಲ್ಲಿ ದಶಕಗಳಿಂದ ಕೂಗು ಕೇಳುತ್ತಲೇ ಇದೆ. ಗೊಂದಲಗಳ ಸುಳಿಯಲ್ಲಿ ಇದ್ದ 50 ವರ್ಷಗಳ ಹಿಂದಿನ ಕಾಯ್ದೆಯನ್ನು ರದ್ದುಗೊಳಿಸಿ, ಸರಳ ಹಾಗೂ ನ್ಯಾಯದ ಚೌಕಟ್ಟಿನೊಳಗೆ "ಕರ್ನಾಟಕ ಅಪಾರ್ಟ್​ಮೆಂಟ್​ (ಮಾಲೀಕತ್ವ ಮತ್ತು ನಿರ್ವಹಣೆ) ಮಸೂದೆ &-2026' ಜಾರಿಗೆ ತರುವ ನಿಟ್ಟಿನಲ್ಲಿ ಸರ್ಕಾರ ಹೆಜ್ಜೆ ಇರಿಸಿದೆ.
ಕರ್ನಾಟಕ ಅಪಾರ್ಟ್​ಮೆಂಟ್​ ಮಾಲೀಕತ್ವ ಕಾಯ್ದೆ-&1972 ಹಾಗೂ ಕರ್ನಾಟಕ ಓನರ್​ಶಿಪ್​ ಫ್ಲ್ಯಾಟ್ಸ್​ ಕಾಯ್ದೆ-&1972 ಕಾಯ್ದೆಯಲ್ಲಿ ಅಪಾರ್ಟ್​ಮೆಂಟ್​ ಸಂಘಗಳ ನೋಂದಣಿ, ನಿರ್ವಹಣೆ, ಮಾಲೀಕತ್ವ, ಪರಭಾರೆ, ಮರು ಅಭಿವೃದ್ಧಿ ಸೇರಿ ಹಲವು ವಿಷಯಗಳಲ್ಲಿ ಸ್ಪಷ್ಟತೆ ಕೊರತೆಯಿಂದ ಹಲವು ಕಾನೂನಾತ್ಮಕ ತೊಡಕುಗಳು ಎದುರಾಗುತ್ತಿತ್ತು. ಇದೀಗ ಹೊಸ ಕಾಯ್ದೆಯ ಕರಡು ರೂಪಿಸಲು ಸರ್ಕಾರ ಮುಂದಾಗಿದೆ. ಈ ನಿಟ್ಟಿನಲ್ಲಿ ನಗರದ ಜವಾಹರಲ್​ ಲಾಲ್​ ನೆಹರು ತಾರಾಲಯ ಸಭಾಂಗಣದಲ್ಲಿ ಬುಧವಾರ ಮಸೂದೆ ಕುರಿತು ಅಪಾರ್ಟ್​ಮೆಂಟ್​ ಸಂಘಗಳ ಪ್ರತಿನಿಧಿಗಳೊಂದಿಗೆ ಸಿಎಂ ಡಿ.ಕೆ. ಶಿವಕುಮಾರ್​ ಹಾಗೂ ಬೆಂಗಳೂರು ನಗರಾಭಿವೃದ್ಧಿ ಸಚಿವ ಕೃಷ್ಣಬೈರೇಗೌಡ ಸಂವಾದ ನಡೆಸಿದರು.
ಹಕ್ಕು ರಕ್ಷಣೆಗೆ ಸರ್ಕಾರ ಬದ್ಧ:
ಅಪಾರ್ಟ್​ಮೆಂಟ್​ ನಿವಾಸಿಗಳ ಹಕ್ಕು ರಕ್ಷಣೆಗೆ ಸರ್ಕಾರ ಬದ್ಧವಾಗಿದೆ. ಆಸ್ತಿಯನ್ನು ನೀವು ಖರೀದಿಸಿದ ಮೇಲೆ ನೀವೇ ಅದರ ಮಾಲೀಕರು. ಈ ವಿಚಾರದಲ್ಲಿ ಅನುಮಾನವಿಲ್ಲ ಎಂದು ಡಿ.ಕೆ. ಶಿವಕುಮಾರ್​ ಸ್ಪಷ್ಟಪಡಿಸಿದರು.
ಅಪಾರ್ಟ್​ಮೆಂಟ್​ಗಳ ನೋಂದಣಿ, ಮಾಲೀಕತ್ವ, ಬ್ಯಾಂಕ್​ ಸಾಲಸೌಲಭ್ಯ ಮೊದಲಾದ ವಿಷಯಗಳಲ್ಲಿ ಗೊಂದಲವಿದೆ. ಈ ನಿಟ್ಟಿನಲ್ಲಿ ಆಸ್ತಿ ಕೊಂಡವರಿಗೆ ಅನುಕೂಲವಾಗುವಂತೆ ಈ ವಿಧೇಯಕ ಜಾರಿಗೆ ತರಲಾಗುತ್ತಿದೆ. ಈ ಸಂಬಂಧ ಸರ್ಕಾರದಿಂದ ಏಕಪಕ್ಷೀಯ ನಿರ್ಧಾರ ಕೈಗೊಳ್ಳದೆ ಸಾರ್ವಜನಿಕರು, ಅಪಾರ್ಟ್​ಮೆಂಟ್​ ಪ್ರತಿನಿಧಿಗಳು, ಶಾಸಕರು ಒಳಗೊಂಡಂತೆ ಮುಕ್ತವಾಗಿ ಸಲಹೆ ಅಭಿಪ್ರಾಯ ಸಲ್ಲಿಸಲು ಆ.6ರವರೆಗೆ ಅವಕಾಶ ನೀಡಲಾಗಿದೆ. ಆನ್​ಲೈನ್​ ಮೂಲಕವೂ ಅಭಿಪ್ರಾಯಗಳನ್ನು ಸಲ್ಲಿಸಬಹುದು ಎಂದರು.
ಸಲಹೆ ಮತ್ತು ಅಭಿಪ್ರಾಯ ಸ್ವೀಕರಿಸಿದ ಬಳಿಕ ವಿಧೇಯಕ ಜಾರಿ ಕುರಿತು ಸಂಪುಟದಲ್ಲಿ ಚರ್ಚಿಸಿ ಜತೆಗೆ ಡೆವಲಪರ್​ಗಳೊಂದಿಗೆ ಕಾನೂನಿನ ಬಗ್ಗೆ ಮನವರಿಕೆ ಮಾಡಿ ಬಳಿಕ ವಿಧಾನಸಭೆಯಲ್ಲಿ ಮಂಡಿಸಲಾಗುವುದು. ಬೆಂಗಳೂರಿನಲ್ಲಿ 40 ಲಕ್ಷ ಆಸ್ತಿಗಳಿದ್ದು, ಈಗಾಗಲೇ 26 ಲಕ್ಷ ಆಸ್ತಿಗಳಿಗೆ ಇ&ಖಾತೆ ನೀಡಲಾಗಿದೆ. ಕೆಲವು ಮಂದಿ ಕಡಿಮೆ ವಿಸ್ತೀರ್ಣದಲ್ಲಿ ಅಥವಾ ಕಂದಾಯ ಜಮೀನಿನಲ್ಲಿ ಯಾವುದೇ ಮೂಲಸೌಕರ್ಯವಿಲ್ಲದೆ ಹೆಚ್ಚು ಅಂತಸ್ತಿನ ಕಟ್ಟಡ ನಿರ್ಮಿಸಿ, ನಿಯಮ ಉಲ್ಲಂಘಿಸಿರುವ ಉದಾಹರಣೆ ಇವೆ. ಈ ಬಗ್ಗೆ ಪಾರದರ್ಶಕತೆ ತರುವ ನಿಟ್ಟಿನಲ್ಲಿ ಕಾಯ್ದೆ ರೂಪಿಸಲಾಗುತ್ತಿದೆ ಎಂದು ಹೇಳಿದರು.
ಕೃಷ್ಣಬೈರೇಗೌಡ ಮಾತನಾಡಿ, 50 ವರ್ಷಗಳಲ್ಲಿ ರಾಜ್ಯದಲ್ಲಿ ಸಾಕಷ್ಟು ಬದಲಾವಣೆಯಾಗಿದ್ದು, ಅಪಾರ್ಟ್​ಮೆಂಟ್​ಗಳು ಹಾಗೂ ನಿವಾಸಿಗಳ ಸಂಖ್ಯೆಯೂ ಹೆಚ್ಚಿದೆ. ಮಾಲೀಕರ ಹಿತ ಕಾಯಲು ಕಾನೂನು ಅಗತ್ಯವಿದ್ದು, ಈ ನಿಟ್ಟಿನಲ್ಲಿ ಇರುವ ಕಾಯ್ದೆಯನ್ನು ಸರಳೀಕರಣಗೊಳಿಸಿ ಸ್ಪಷ್ಟ ಕಾನೂನು ರಚಿಸುವ ಉದ್ದೇಶದಿಂದ ಹೊಸ ಕಾಯ್ದೆ ರೂಪಿಸಲಾಗಿದೆ ಎಂದರು.
ಅಪಾರ್ಟ್​ಮೆಂಟ್​ ಕಾಯ್ದೆಯನ್ನು ಜಾರಿಗೊಳಿಸುವ ಕುರಿತು 2023ರ ಕಾಂಗ್ರೆಸ್​ ಪ್ರಣಾಳಿಕೆಯಲ್ಲಿ ತಿಳಿಸಲಾಗಿತ್ತು. ಅದರಂತೆ ಹಲವು ಬದಲಾಣೆಗಳೊಂದಿಗೆ ಮಸೂದೆ ಕರಡು ಸಿದ್ಧಪಡಿಸಿದ್ದು, ಅಪಾರ್ಟ್​ಮೆಂಟ್​ ಮಾಲೀಕರು, ನಿವಾಸಿಗಳ ಅಭಿಪ್ರಾಯ, ಸಲಹೆ ಪಡೆದು ಸಂಪುಟದಲ್ಲಿ ಚರ್ಚಿಸಿ ಕಾನೂನು ಚೌಕಟ್ಟಿನಲ್ಲಿ ಕಾಯ್ದೆ ಜಾರಿಗೊಳಿಸಲಾಗುವುದು ಎಂದು ತಿಳಿಸಿದರು. 
ಕಾಯ್ದೆಯಲ್ಲಿನ ಪ್ರಮುಖ ಅಂಶಗಳನ್ನು ಸರ್ಕಾರದ ಅಪರ ಮುಖ್ಯ ಕಾರ್ಯದರ್ಶಿ ತುಷಾರ್​ ಗಿರಿನಾಥ್​ ವಿವರಿಸಿದರು. ಬಳಿಕ ಅಪಾರ್ಟ್​ಮೆಂಟ್​ ಪ್ರತಿನಿಧಿಗಳು ಮುಖ್ಯಮಂತ್ರಿ ಹಾಗೂ ಸಚಿವರೊಂದಿಗೆ ಪ್ರಶ್ನೋತ್ತರದ ಮೂಲಕ ಮಸೂದೆ ಕುರಿತು ಸಂವಾದ ನಡೆಸಿದರು. ಸಚಿವರಾದ ಕೆ.ಜೆ. ಜಾರ್ಜ್​, ಬೈರತಿ ಸುರೇಶ್​, ಕೆಪಿಸಿಸಿ ಅಧ್ಯಕ್ಷ ಬಿ.ಕೆ. ಹರಿಪ್ರಸಾದ್​, ಬಿಡಿಎ ಅಧ್ಯಕ್ಷ ಎನ್​.ಎ. ಹ್ಯಾರಿಸ್​, ವಿಧಾನಪರಿಷತ್​ ಸದಸ್ಯ ಡಾ.ಟಿ.ಎ. ಶರವಣ, ರಮೇಶ್​ ಬಾಬು, ರಾಜೀವ್​ ಗೌಡ ಮತ್ತಿತರರಿದ್ದರು.
ಬೋರ್ಡ್​ಲ್ಲಿ ನನ್ನ ಹೆಸರು ಬರೆದಿದ್ದರು!
ಅಪಾರ್ಟ್​ಮೆಂಟ್​ ನಿವಾಸಿಗಳಾದ ಮೇಲೆ ಒಪ್ಪಂದ ಮಾಡಿಕೊಳ್ಳುವಾಗ ಒಂದು ರೀತಿ, ನೋಂದಣಿ ವೇಳೆ ಮತ್ತೊಂದು ರೀತಿ.. ಇದು ಬೇಸರ ತಂದಿದೆ. ಕೆಲವರಿಂದ ತಕರಾರು ಮೂಲಕ ಸಾಕಷ್ಟು ತೊಂದರೆಗಳು ಎದುರಾಗುತ್ತವೆ. ಉದಾಹರಣೆಗೆ, ನನ್ನ ಅಪಾರ್ಟ್​ಮೆಂಟ್​ನಲ್ಲಿ ನನ್ನ ಹೆಸರಿಗೆ ನೋಂದಣಿ ಮಾಡಿಕೊಳ್ಳುವ ಮೊದಲೇ ನನ್ನ ಹೆಸರನ್ನೇ ನೋಟಿಸ್​ ಬೋರ್ಡ್​ನಲ್ಲಿ ಹಾಕಿದ್ದರು. ಬೆನ್ನಿಗಾನಹಳ್ಳಿಯಲ್ಲೂ ಇದೇ ರೀತಿ ಮಾಡಿದ್ದರು. ಒಳಗೆ ನನ್ನನ್ನು ಬಿಡುವುದಿಲ್ಲ ಎಂದಿದ್ದರು ಎಂದು ಡಿಕೆಶಿ ಸ್ಮರಿಸಿದರು.
2ನೇ ಏರ್​ಪೋರ್ಟ್​ಗೆ ಸ್ಥಳ ಹುಡುಕಾಟ
ನಗರದಲ್ಲಿ 1.35 ಕೋಟಿ ರೂ. ವಾಹನಗಳಿದ್ದು, ಗುಂಡಿಗಳನ್ನು ಮುಚ್ಚಲೆಂದೇ 4 ಸಾವಿರ ಕೋಟಿ ರೂ. ವೆಚ್ಚ ಮಾಡಲಾಗಿದೆ. ಹೈ ರೈಸ್​ ಕಟ್ಟಡಗಳ ಬಗ್ಗೆ ಗಮನಹರಿಸಿ, ರಸ್ತೆಗಳನ್ನು ವಿಸ್ತರಿಸುವ ಬಗ್ಗೆ ಒತ್ತು ನೀಡಲಾಗುತ್ತಿದೆ. 132 ಕಿಮೀ ಪೆರಿಫೆರಲ್​ ವರ್ತುಲ ರಸ್ತೆ (ಬೆಂಗಳೂರು ಬಿಜಿನೆಸ್​ ಕಾರಿಡಾರ್​) ನಿಮಾರ್ಣವಾಗುತ್ತಿದೆ. ದೇಶದ ವಿವಿಧ ರಾಜ್ಯಗಳಿಗೆ ಹೋಲಿಸಿದರೆ ಭೂಸ್ವಾಧಿನಕ್ಕೆ ರಾಜ್ಯದಲ್ಲಿ ರೈತರಿಗೆ ಗರಿಷ್ಠ ಮೊತ್ತದ ಪರಿಹಾರ ನೀಡಲಾಗುತ್ತಿದೆ. 2ನೇ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ನಿಮಾರ್ಣಕ್ಕೆ ಸರ್ಕಾರ ಮುಂದಾಗಿದ್ದು, ಸೂಕ್ತ ಸ್ಥಳ ಹುಡುಕಾಟ ನಡೆಯುತ್ತಿದೆ ಎಂದು ಡಿಕೆಶಿ ಮಾಹಿತಿ ನೀಡಿದರು.

ಅಪಾರ್ಟ್​ಮೆಂಟ್​ ಮಾಲೀಕತ್ವ ಮತ್ತು ನಿರ್ವಹಣೆಗೆ ಸಂಬಂಧಿಸಿ ರಾಜ್ಯದಲ್ಲಿ ಸಮಗ್ರ ಕಾನೂನು ರೂಪಿಸಲು ಸರ್ಕಾರ ಕೈಗೊಂಡಿರುವ ಉಪಕ್ರಮ ಸ್ವಾಗತಾರ್ಹ. ಮನೆ ಮಾಲೀಕರ ಹಕ್ಕುಗಳ ರಕ್ಷಣೆ, ಬಿಲ್ಡರ್​ಗಳ ಉತ್ತರದಾಯಿತ್ವ, ಅಪಾರ್ಟ್​ಮೆಂಟ್​ ಸಂಘಗಳ ಅಧಿಕಾರ, ಪಾರದರ್ಶಕ ಹಾಗೂ ಸ್ವಯಂ ಆಡಳಿತಕ್ಕೆ ಬಲ ನೀಡುವ ಸಮಗ್ರ ಕಾನೂನು ರಾಜ್ಯಕ್ಕೆ ಅಗತ್ಯವಾಗಿದೆ.

ನಗರಗಳ ಬೆಳವಣಿಗೆಯೊಂದಿಗೆ ಅಪಾರ್ಟ್​ಮೆಂಟ್​ ವಲಯದ ಸವಾಲುಗಳೂ ಬದಲಾಗುತ್ತಿವೆ. ಮನೆ ಖರೀದಿದಾರರ ಹಕ್ಕುಗಳಿಗೆ ಸ್ಪಷ್ಟ ರಕ್ಷಣೆ, ಪಾರದರ್ಶಕ ಆಡಳಿತ ಹಾಗೂ ಪುನರ್​ ಅಭಿವೃದ್ಧಿಗೆ ಅನುಕೂಲಕರ ಕಾನೂನು ವ್ಯವಸ್ಥೆ ಇಂದಿನ ಅಗತ್ಯವಾಗಿದೆ. ಈ ಕರಡು ಮಸೂದೆ ಉತ್ತಮ ಆರಂಭವಾಗಿದ್ದು, ಎಲ್ಲ ಪಕ್ಷಗಳ ಅಭಿಪ್ರಾಯಗಳನ್ನು ಒಳಗೊಂಡ ಸಮಗ್ರ ಕಾನೂನು ರೂಪುಗೊಳ್ಳಬೇಕು.

Bangalore
gba
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net