ಮೇಲ್ಸೇತುವೆ ಆಸರೆ ಮನೆ ತೆರಿಗೆ ಹೊರೆ?

ನಗರದ ಸಂಚಾರ ದಟ್ಟಣೆ ನಿವಾರಣೆಗೆ ಸರ್ಕಾರ ರೂಪಿಸಿರುವ ಎತ್ತರಿಸಿದ ಕಾರಿಡಾರ್​ ಯೋಜನೆ ಇದೀಗ ರಿಯಲ್​ ಎಸ್ಟೇಟ್​ ವಲಯದಲ್ಲಿ ಹೊಸ ಚರ್ಚೆಗೆ ಕಾರಣವಾಗಿದೆ. ಯೋಜನೆಗೆ ಹಣಕಾಸು ಒದಗಿಸುವ ಮಾರ್ಗವಾಗಿ ಕಾರಿಡಾರ್​ ಸುತ್ತಮುತ್ತಲಿನ ಆಸ್ತಿ ಮಾಲೀಕರಿಂದ ಹೆಚ್ಚುವರಿ ಆಸ್ತಿ ತೆರಿಗೆ ಸಂಗ್ರಹಿಸುವ ಪ್ರಸ್ತಾವನೆ ಡಿಪಿಆರ್​ನಲ್ಲಿ ಉಲ್ಲೇಖವಾಗಿರುವುದು ಗಮನ ಸೆಳೆದಿದೆ.

ಆದರೆ ಇದೇ ವೇಳೆ, ಯೋಜನೆ ಜಾರಿಯಾದರೆ ಸಂಪರ್ಕ ವ್ಯವಸ್ಥೆ ಸುಧಾರಿಸಿ ಆ ಪ್ರದೇಶಗಳಲ್ಲಿನ ಮನೆ ಹಾಗೂ ಜಮೀನುಗಳ ಮೌಲ್ಯ ಇನ್ನಷ್ಟು ಏರಿಕೆಯಾಗುವ ಸಾಧ್ಯತೆಯೂ ಇದೆ. ನಗರದ ಪ್ರಮುಖ ರಸ್ತೆಗಳನ್ನು ಸಂಪರ್ಕಿಸುವ ಎಲಿವೇಟೆಡ್​ ಕಾರಿಡಾರ್​ಗಳು ಪೂರ್ಣಗೊಂಡರೆ, ಪ್ರಯಾಣದ ಸಮಯ ಗಣನೀಯವಾಗಿ ಕಡಿಮೆಯಾಗಲಿದೆ. ಉದ್ಯೋಗ ಕೇಂದ್ರಗಳು, ವಾಣಿಜ್ಯ ವಲಯಗಳು ಹಾಗೂ ಐಟಿ ಕಾರಿಡಾರ್​ಗಳಿಗೆ ವೇಗವಾಗಿ ತಲುಪುವ ಅವಕಾಶ ಸಿಗುವುದರಿಂದ ಹೂಡಿಕೆದಾರರು ಮತ್ತು ಮನೆ ಖರೀದಿದಾರರ ಗಮನ ಆ ಮಾರ್ಗಗಳತ್ತ ಸೆಳೆಯುವ ಸಾಧ್ಯತೆ ಇದೆ. ಈಗಾಗಲೇ ಮೆಟ್ರೋ ಸಂಪರ್ಕದಿಂದ ಆಸ್ತಿ ಬೆಲೆ ಏರಿಕೆ ಕಂಡಿರುವ ಹಲವು ಪ್ರದೇಶಗಳಂತೆ, ಹೊಸ ಕಾರಿಡಾರ್​ ವ್ಯಾಪ್ತಿಯಲ್ಲೂ ಬೇಡಿಕೆ ಹೆಚ್ಚುವ ನಿರೀಕ್ಷೆ ವ್ಯಕ್ತವಾಗಿದೆ.

ಮತ್ತೊಂದೆಡೆ, ಆಸ್ತಿ ತೆರಿಗೆ ಹೆಚ್ಚಳದ ಪ್ರಸ್ತಾವ ಮಧ್ಯಮ ವರ್ಗದ ಮನೆ ಮಾಲೀಕರಲ್ಲಿ ಆತಂಕವನ್ನೂ ಮೂಡಿಸಿದೆ. ಈಗಾಗಲೇ ನಿರ್ವಹಣಾ ವೆಚ್ಚ, ವಿದ್ಯುತ್​, ನೀರಿನ ಶುಲ್ಕ ಸೇರಿ ವಿವಿಧ ಖರ್ಚುಗಳು ಏರಿಕೆಯಾಗಿರುವ ಸಂದರ್ಭದಲ್ಲಿ ಹೆಚ್ಚುವರಿ ತೆರಿಗೆ ಭಾರವು ಮನೆ ಮಾಲೀಕರ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ. ಹೊಸ ಮನೆ ಖರೀದಿಸಲು ಮುಂದಾಗುವವರೂ ವಾರ್ಷಿಕ ತೆರಿಗೆ ವೆಚ್ಚವನ್ನು ಲೆಕ್ಕಹಾಕಿಯೇ ನಿರ್ಧಾರ ಕೈಗೊಳ್ಳಬೇಕಾದ ಪರಿಸ್ಥಿತಿ ನಿಮಾರ್ಣವಾಗಬಹುದು.

ಎಲಿವೇಟೆಡ್​ ಕಾರಿಡಾರ್​ ಯೋಜನೆಗೆ ಆಸ್ತಿ ತೆರಿಗೆ ಹೆಚ್ಚಳವೇ ಅಂತಿಮ ಹಣಕಾಸು ಮಾದರಿ ಅಲ್ಲ ಎಂದು ಸಂಬಂಧಿತ ಸಂಸ್ಥೆ ಸ್ಪಷ್ಟನೆ ನೀಡಿದೆ. ವಿವಿಧ ಹಣಕಾಸು ಆಯ್ಕೆಗಳ ಬಗ್ಗೆ ಸರ್ಕಾರ ಇನ್ನೂ ಪರಿಶೀಲನೆ ನಡೆಸುತ್ತಿದ್ದು, ಅಂತಿಮ ನಿರ್ಧಾರ ಕೈಗೊಳ್ಳಬೇಕಿದೆ.

ಎಲಿವೇಟೆಡ್​ ಕಾರಿಡಾರ್​ ನಿರ್ಮಾಣವಾಗುವ ಎರಡು ಬದಿ ವಾಣಿಜ್ಯ ಕಟ್ಟಡಗಳು, ಕಚೇರಿ ಸಂಕೀರ್ಣಗಳು, ಸಮೂಹ ವಸತಿ ಯೋಜನೆಗಳು ಹಾಗೂ ಬಾಡಿಗೆ ಮನೆಗಳಿಗೆ ಬೇಡಿಕೆ ಹೆಚ್ಚುವ ಸಾಧ್ಯತೆ ಇದೆ ಎಂದು ತಜ್ಞರು ವಿಶ್ಲೇಷಿಸುತ್ತಿದ್ದಾರೆ. ಆದರೆ, ಮೂಲಸೌಕರ್ಯ ಅಭಿವೃದ್ಧಿಯ ಲಾಭ ಪಡೆಯುವ ಆಸ್ತಿ ಮಾಲೀಕರಿಂದಲೇ ಹೆಚ್ಚುವರಿ ತೆರಿಗೆ ಸಂಗ್ರಹಿಸುವ ಮಾದರಿ ಜಾರಿಗೆ ಬಂದರೆ, ಆಸ್ತಿ ಖರೀದಿಸುವವರು ಭವಿಷ್ಯದ ತೆರಿಗೆ ಹೊರೆ, ನಿರ್ವಹಣಾ ವೆಚ್ಚ ಹಾಗೂ ಹೂಡಿಕೆಯ ಮೇಲಿನ ಲಾಭದ ಲೆಕ್ಕಾಚಾರವನ್ನು ಹೆಚ್ಚು ಸೂಕ್ಷ್ಮವಾಗಿ ಪರಿಶೀಲಿಸುವ ಅನಿವಾರ್ಯತೆ ಎದುರಾಗಲಿದೆ. ಹೀಗಾಗಿ, ಈ ಯೋಜನೆ ರಿಯಲ್​ ಎಸ್ಟೇಟ್​ ಮಾರುಕಟ್ಟೆಗೆ ಹೊಸ ಅವಕಾಶಗಳನ್ನು ತೆರೆದರೂ, ತೆರಿಗೆ ನೀತಿಯೇ ಅಂತಿಮವಾಗಿ ಮಾರುಕಟ್ಟೆಯ ದಿಕ್ಕನ್ನು ನಿರ್ಧರಿಸುವ ಪ್ರಮುಖ ಅಂಶವಾಗಲಿದೆ.