ನಕಲಿ ಉತ್ಪನ್ನಗಳ ಆಟಕ್ಕೆ ಎಐ ಬ್ರೇಕ್​!

ಕೃತಕ ಬುದ್ಧಿಮತ್ತೆ (ಎಐ) ತಂತ್ರಜ್ಞಾನವು ದಿನನಿತ್ಯದ ಬದುಕಿನ ಭಾಗವಾಗುತ್ತಿರುವ ಬೆನ್ನಲ್ಲೇ ಆನ್​ಲೈನ್​ ಖರೀದಿ ಪ್ರಕ್ರಿಯೆಯಲ್ಲಿ ನಡೆಯುತ್ತಿದ್ದ ವಂಚನೆಯ ಪ್ರಕರಣಗಳನ್ನು ಗಣನೀಯವಾಗಿ ಕಡಿಮೆಗೊಳಿಸಿ, ಮಹತ್ತರ ಬದಲಾವಣೆಗೆ ದಾರಿ ಮಾಡಿಕೊಟ್ಟಿದೆ.

ಎಐ ಆಧಾರಿತ ಶಾಪಿಂಗ್​ ಆನ್​ಲೈನ್​ ಖರೀದಿಯನ್ನು ಹೆಚ್ಚು ಸುರಕ್ಷಿತ ಮತ್ತು ವಿಶ್ವಾಸಾರ್ಹವಾಗಿಸುತ್ತಿವೆ. ಉತ್ಪನ್ನದ ವಿವರಗಳು, ಗ್ರಾಹಕರ ವಿಮರ್ಶೆಗಳು, ಮಾರಾಟಗಾರರ ವಿಶ್ವಾಸಾರ್ಹತೆ ಹಾಗೂ ವಿವಿಧ ವೆಬ್​ಸೈಟ್​ಗಳ ಮಾಹಿತಿಯನ್ನು ಕ್ಷಣಾರ್ಧದಲ್ಲಿ ವಿಶ್ಲೇಷಿಸುವ ಸಾಮರ್ಥ್ಯದಿಂದ ನಕಲಿ ಉತ್ಪನ್ನಗಳು, ಡುಪ್ಲಿಕೇಟ್​ ಬ್ರ್ಯಾಂಡ್​ಗಳು ಹಾಗೂ ಅನುಮಾನಾಸ್ಪದ ಮಾರಾಟಗಾರರನ್ನು ಗುರುತಿಸಲು ಎಐ ನೆರವಾಗುತ್ತಿದೆ. ಇದರಿಂದ ಖರೀದಿದಾರರು ತಪ್ಪು ಉತ್ಪನ್ನ ಖರೀದಿಸುವ ಅಪಾಯವನ್ನು ಗಮನಾರ್ಹವಾಗಿ ಕಡಿಮೆ ಮಾಡಿಕೊಳ್ಳುತ್ತಿದ್ದಾರೆ.

ಇದರ ಜೊತೆಗೆ, ಎಐ ಆಧಾರಿತ ಶಿಫಾರಸು ವ್ಯವಸ್ಥೆಗಳು ನೈಜ ಬಳಕೆದಾರರ ವಿಮರ್ಶೆಗಳನ್ನು ವಿಶ್ಲೇಷಿಸಿ ನಕಲಿ ರೇಟಿಂಗ್​ಗಳು, ಕೃತಕ ವಿಮರ್ಶೆಗಳು ಹಾಗೂ ಅಸಾಮಾನ್ಯ ಬೆಲೆ ವ್ಯತ್ಯಾಸಗಳನ್ನು ಪತ್ತೆಹಚ್ಚುವ ಸಾಮರ್ಥ್ಯ ಹೊಂದಿವೆ. ಉತ್ಪನ್ನದ ನೈಜತೆ, ಬೆಲೆ ಮತ್ತು ಗುಣಮಟ್ಟವನ್ನು ವಿವಿಧ ಮೂಲಗಳೊಂದಿಗೆ ಹೋಲಿಕೆ ಮಾಡಿ ಗ್ರಾಹಕರಿಗೆ ಸೂಕ್ತ ಆಯ್ಕೆ ಸೂಚಿಸುವುದರಿಂದ ಆನ್​ಲೈನ್​ ವಂಚನೆ, ನಕಲಿ ವಸ್ತುಗಳ ಖರೀದಿ ಮತ್ತು ಮೋಸದ ಸಾಧ್ಯತೆಗಳನ್ನು ಕಡಿಮೆ ಮಾಡುವಲ್ಲಿ ಎಐ ಪ್ರಮುಖ ಪಾತ್ರ ವಹಿಸುತ್ತಿದೆ.

ಸಮೀಕ್ಷೆಯ ಪ್ರಕಾರ, ಶೇ.64 ಗ್ರಾಹಕರು ಉತ್ಪನ್ನ ಖರೀದಿಗೆ ಸಂಬಂಧಿಸಿದ ಮಾಹಿತಿಗಾಗಿ ಗೂಗಲ್​ನಂತಹ ಸಾಂಪ್ರದಾಯಿಕ ಸರ್ಚ್​ ಎಂಜಿನ್​ಗಳ ಬದಲಿಗೆ ಎಐ ಆಧಾರಿತ ಸಾಧನಗಳನ್ನು ಬಳಸುತ್ತಿದ್ದಾರೆ. ಉತ್ಪನ್ನಗಳ ಹೋಲಿಕೆ, ಕಡಿಮೆ ಬೆಲೆಯ ಹುಡುಕಾಟ ಹಾಗೂ ಖರೀದಿಗೆ ಮುನ್ನ ತಜ್ಞರ ಸಲಹೆ ಪಡೆಯಲು ಎಐ ಹೆಚ್ಚು ಪರಿಣಾಮಕಾರಿ ಎಂದು ಗ್ರಾಹಕರು ಅಭಿಪ್ರಾಯಪಟ್ಟಿದ್ದಾರೆ.

ಉತ್ಪನ್ನ ಸಂಶೋಧನೆ ಕ್ಷೇತ್ರದಲ್ಲಿ ಈಗಾಗಲೇ ಶೇ.58 ಮಂದಿ ಎಐ ಬಳಸುತ್ತಿದ್ದಾರೆ. ಇನ್ನೂ ಶೇ.31 ಮಂದಿ ಮುಂದಿನ ದಿನಗಳಲ್ಲಿ ಬಳಸುವ ಆಸಕ್ತಿ ವ್ಯಕ್ತಪಡಿಸಿದ್ದು, ಕೇವಲ ಶೇ.11 ಮಂದಿ ಮಾತ್ರ ಬಳಸುವ ಉದ್ದೇಶ ಇಲ್ಲ ಎಂದು ಹೇಳಿದ್ದಾರೆ. ಉತ್ಪನ್ನಗಳ ಹೋಲಿಕೆಗೆ ಶೇ.54 ಮಂದಿ ಈಗಾಗಲೇ ಎಐ ಬಳಸುತ್ತಿದ್ದು, ಶೇ.37 ಮಂದಿ ಬಳಸಲು ಸಿದ್ಧರಾಗಿದ್ದಾರೆ. ಅತ್ಯುತ್ತಮ ಬೆಲೆ ಪತ್ತೆಹಚ್ಚುವಲ್ಲಿ ಶೇ.40 ಮಂದಿ ಎಐ ಬಳಸುತ್ತಿದ್ದಾರೆ. ತಜ್ಞರ ಸಲಹೆ ಪಡೆಯಲು ಹಾಗೂ ವೈಯಕ್ತಿಕ ಶಿಫಾರಸುಗಳಿಗಾಗಿ ತಲಾ ಶೇ.37 ಮಂದಿ ಎಐ ಮೊರೆ ಹೋಗುತ್ತಿದ್ದಾರೆ. ಖರೀದಿ ಪಟ್ಟಿಯನ್ನು ಸಿದ್ಧಪಡಿಸುವ ಕೆಲಸದಲ್ಲಿಯೂ ಶೇ.28 ಮಂದಿ ಎಐ ಬಳಕೆ ಆರಂಭಿಸಿದ್ದು, ಮುಂದಿನ ದಿನಗಳಲ್ಲಿ ಈ ಪ್ರಮಾಣ ಮತ್ತಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ಸಮೀೆ ತಿಳಿಸಿದೆ.

ವಿಭಾಗವಾರು ನೋಡಿದರೆ ಗ್ರಾಹಕ ಎಲೆಕ್ಟ್ರಾನಿಕ್ಸ್​ ಕ್ಷೇತ್ರದಲ್ಲಿ ಶೇ.83 ಮಂದಿ ಸಾಂಪ್ರದಾಯಿಕ ಹುಡುಕಾಟಕ್ಕಿಂತ ಎಐಗೆ ಆದ್ಯತೆ ನೀಡಿದ್ದಾರೆ. ಆರೋಗ್ಯ ಮತ್ತು ವೆಲ್​ನೆಸ್​ ವಿಭಾಗದಲ್ಲಿ ಶೇ.67, ವೈಯಕ್ತಿಕ ಆರೈಕೆ ವಿಭಾಗದಲ್ಲಿ ಶೇ.58, ಫ್ಯಾಷನ್​ ಮತ್ತು ಉಡುಪು ವಿಭಾಗದಲ್ಲಿ ಶೇ.48, ಸೌಂದರ್ಯ ಉತ್ಪನ್ನಗಳಲ್ಲಿ ಶೇ.46 ಹಾಗೂ ಆಹಾರ ಮತ್ತು ದಿನಸಿ ಖರೀದಿಯಲ್ಲಿ ಶೇ.42 ಮಂದಿ ಎಐ ಬಳಕೆಯನ್ನು ಮೆಚ್ಚಿಕೊಂಡಿದ್ದಾರೆ.

ವೈಯಕ್ತಿಕ ಅಗತ್ಯಕ್ಕೆ ತಕ್ಕ ಉತ್ತರ, ಕ್ಷಿಪ್ರ ಮಾಹಿತಿ, ವಿವಿಧ ಉತ್ಪನ್ನಗಳ ತ್ವರಿತ ಹೋಲಿಕೆ ಹಾಗೂ ಖರೀದಿ ನಿರ್ಧಾರಕ್ಕೆ ನೆರವಾಗುವ ವಿಶ್ಲೇಷಣಾತ್ಮಕ ಸಲಹೆಗಳನ್ನು ನೀಡುವ ಸಾಮರ್ಥ್ಯವೇ ಎಐ ಸಾಧನಗಳ ಜನಪ್ರಿಯತೆಗೆ ಪ್ರಮುಖ ಕಾರಣವಾಗಿದೆ. ಮುಂದಿನ ವರ್ಷಗಳಲ್ಲಿ ಇ-ಕಾಮರ್ಸ್​ ಕ್ಷೇತ್ರದಲ್ಲಿ ಎಐ ಬಳಕೆ ಇನ್ನಷ್ಟು ವೇಗ ಪಡೆದು, ಡಿಜಿಟಲ್​ ಶಾಪಿಂಗ್​ ಅನುಭವವನ್ನೇ ಸಂಪೂರ್ಣವಾಗಿ ಪರಿವರ್ತಿಸುವ ಸಾಧ್ಯತೆ ಇದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.