ಹೆಚ್ಚು ಹರಡುವ ಹೊಸ ರೂಪ ತಾಳುತ್ತಿದೆ ಕರೊನಾ : ವಹಿಸಿರಿ ಕಟ್ಟೆಚ್ಚರ

ನವದೆಹಲಿ: ಕರೊನಾ ಯುಗ ಮುಗಿಯಿತು ಎಂಬಂತೆ ಮಾಸ್ಕ್ ಹಾಕಿಕೊಳ್ಳದೆ, ಮದುವೆ ಮುಂಜಿ ಚಳುವಳಿ ಎಂದೆಲ್ಲಾ ಜನರು ಓಡಾಡುತ್ತಿರುವುದನ್ನು ನಮ್ಮ ಸುತ್ತಲೂ ಕಾಣಬಹುದು. ಆದರೆ, ಈ ಮಹಾಮಾರಿ ತನ್ನನ್ನು ತಾನೇ ಅಪ್ಡೇಟ್ ಮಾಡಿಕೊಳ್ಳುತ್ತಾ ಹೆಚ್ಚಾಗಿ ಸೋಂಕು ಹರಡಲು ಸನ್ನದ್ಧವಾಗುತ್ತಿದೆ. ಅದಕ್ಕೆ ಸಾಕ್ಷಿಯೇ ಮಹಾರಾಷ್ಟ್ರದಲ್ಲಿ ಮೂಡಿಬಂದಿರುವ ಹೊಸ ರೂಪಾಂತರಿ ವೈರಸ್ ಎಂದು ತಜ್ಞರು ಹೇಳಿದ್ದಾರೆ.

ಮಹಾರಾಷ್ಟ್ರದಲ್ಲಿ ಕಂಡುಬಂದಿರುವ ವೈರಸ್​ನ ಹೊಸ ರೂಪಾಂತರ - ಇ484ಕೆ - ಹೆಚ್ಚು ಹರಡುವ ಗುಣ ಹೊಂದಿದ್ದು, ಲಸಿಕೆ ತೆಗೆದುಕೊಂಡವರು ಮತ್ತು ಈ ಮುನ್ನ ಕರೊನಾ ಸೋಂಕಿನಿಂದ ಗುಣಮುಖರಾದವರೂ ಒಳಗೊಂಡಂತೆ ಎಲ್ಲರಿಗೂ ಹರಡುವ ಸಾಮರ್ಥ್ಯ ಹೊಂದಿದೆ ಎಂದು ಏಮ್ಸ್ ನಿರ್ದೇಶಕರಾದ ಡಾ.ರಣದೀಪ್ ಗುಲೇರಿಯಾ ಎಚ್ಚರಿಸಿದ್ದಾರೆ.

ಇದನ್ನೂ ಓದಿ: ಮತ್ತೆ ಹಬ್ಬುತ್ತಿದೆ ಕರೊನಾ… ಮತ್ತೊಬ್ಬ ಸಚಿವರಲ್ಲಿ ಕರೊನಾ ಸೋಂಕು ಪತ್ತೆ !

"ಹೊಸ ಬಗೆಯ ರೂಪಾಂತರಿ ವೈರಸ್​ಗಳು 'ಇಮ್ಯೂನ್ ಎಸ್ಕೇಪ್ ಮೆಕಾನಿಸಂ'ಅನ್ನು ಬೆಳೆಸಿಕೊಂಡಿರುತ್ತವೆ. ಅಂದರೆ ಮನುಷ್ಯರ ದೇಹದಲ್ಲಿ ಈ ಮುನ್ನ ತಗುಲಿದ ಸೋಂಕಿನಿಂದಾಗಿ ಅಥವಾ ಲಸಿಕೆಯಿಂದಾಗಿ ಹುಟ್ಟಿರುವ ರೋಗನಿರೋಧಕ ಆ್ಯಂಟಿಬಾಡಿಗಳನ್ನು ಮೀರಿ ಅವು ಬದುಕಿರುವ ಸಾಮರ್ಥ್ಯ ಹೊಂದಿರುತ್ತವೆ. ಆದ್ದರಿಂದಾಗಿ ಈ ಸಮಯದಲ್ಲಿ ಕರೊನಾ ಬಗ್ಗೆ ಹೆಚ್ಚಿನ ಮುನ್ನೆಚ್ಚರಿಕೆ ವಹಿಸುವುದು ಅವಶ್ಯಕವಾಗಿದೆ" ಎಂದಿದ್ದಾರೆ.

ಭಾರತದಲ್ಲಿ ಸ್ವಲ್ಪ ಸಮಯದ ಮುಂಚೆ ಮಾಡಲಾಗುತ್ತಿದ್ದ ತೀವ್ರ ಪ್ರಮಾಣದ ಟೆಸ್ಟಿಂಗ್, ಕಾಂಟಾಕ್ಟ್ ಟ್ರೇಸಿಂಗ್ ಮತ್ತು ಐಸೋಲೇಷನ್​ನಂಥ ಕ್ರಮಗಳನ್ನು ಮತ್ತೆ ಕೈಗೊಳ್ಳುವುದು ಅವಶ್ಯಕವಾಗಿದೆ. ಸಾರ್ವಜನಿಕರು ಕಡ್ಡಾಯವಾಗಿ ಮಾಸ್ಕ್ ಧರಿಸುವುದು, ಸಾಮಾಜಿಕ ಅಂತರ ಕಾಪಾಡಿಕೊಳ್ಳುವುದು ಸೇರಿದಂತೆ ಎಲ್ಲ ಕರೊನಾ ಸುರಕ್ಷತಾ ಕ್ರಮಗಳನ್ನು ಹೆಚ್ಚಿನ ಮುತುವರ್ಜಿಯಿಂದ ಪಾಲಿಸಬೇಕು ಎಂದು ಡಾ.ಗುಲೇರಿಯ ಸಲಹೆ ನೀಡಿದ್ದಾರೆ.

ಇದನ್ನೂ ಓದಿ: 5 ರಾಜ್ಯಗಳಲ್ಲಿ ಹೆಚ್ಚುತ್ತಿದೆ ಕರೊನಾ ಸೋಂಕು : ಸುರಕ್ಷತಾ ಕ್ರಮಗಳನ್ನು ಪಾಲಿಸಿ ಎಂದ ಕೇಂದ್ರ ಸರ್ಕಾರ

ಮಹಾರಾಷ್ಟ್ರದಲ್ಲಿ ಕಳೆದ ವಾರ ಸೋಂಕು ಹೆಚ್ಚಿರುವುದಕ್ಕೆ ಕರೊನಾ ವೈರಸ್​ನ ಹೊಸ ರೂಪಾಂತರಗಳೇ ಕಾರಣವಾಗಿವೆ. ದೇಶದಾದ್ಯಂತ 240 ಹೊಸ ವೈರಸ್ ಪ್ರಭೇದಗಳು ಕಾಣಿಸಿಕೊಂಡಿವೆ ಎಂದು ಮಹಾರಾಷ್ಟ್ರ ಕೋವಿಡ್ ಟ್ಯಾಸ್ಕ್ ಫೋರ್ಸ್​ ಸದಸ್ಯ ಡಾ.ಶಶಾಂಕ್ ಜೋಶಿ ಹೇಳಿದ್ದಾರೆ. 

ಮಹಾರಾಷ್ಟ್ರ ಅಲ್ಲದೇ, ಇನ್ನೂ ನಾಲ್ಕು ರಾಜ್ಯಗಳಲ್ಲಿ ಕರೊನಾ ಸೋಂಕಿನಲ್ಲಿ ದಿಢೀರ್ ಏರಿಕೆ ಕಂಡುಬಂದಿರುವುದಾಗಿ ಶನಿವಾರ ಕೇಂದ್ರ ಸರ್ಕಾರ ತಿಳಿಸಿತ್ತು. ಕೇರಳ, ಮಧ್ಯಪ್ರದೇಶ, ಛತ್ತೀಸಗಢ ಮತ್ತು ಪಂಜಾಬ್​ಗಳಲ್ಲಿ ನಿತ್ಯ ವರದಿಯಾಗುತ್ತಿರುವ ಪ್ರಕರಣಗಳ ಸಂಖ್ಯೆ ಮತ್ತೆ ಹೆಚ್ಚುತ್ತಿದೆ. ಆದ್ದರಿಂದ ಎಲ್ಲಾ ರಾಜ್ಯಗಳು ಕರೊನಾ ಸುರಕ್ಷತಾ ಕ್ರಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು ಎಂದು ಸೂಚಿಸಿತ್ತು.(ಏಜೆನ್ಸೀಸ್)

ಕ್ಷಣಕ್ಷಣದ ಮಾಹಿತಿಗಾಗಿ ವಿಜಯವಾಣಿ ಫೇಸ್​ಬುಕ್​ ಪೇಜ್​ ಲೈಕ್​ ಮಾಡಿ

https://www.vijayavani.net/german-chancellor-angela-merkel-panics-as-she-forgets-her-face-mask-during-parliament-session/

https://www.vijayavani.net/s-kareena-saif-baby-boy/

https://www.vijayavani.net/again-corona-warning-strict-rules-in-karnataka/