ಅವರಿಬ್ಬರೂ ಒಂದು ವರ್ಷ ಮಾತಾಡಿರಲಿಲ್ಲ ... ಶ್ರೀದೇವಿ-ಸರೋಜ್​ ಜಗಳಕ್ಕೆ ಕಾರಣವೇನು?

ಶುಕ್ರವಾರವಷ್ಟೇ ನಿಧನರಾದ ಬಾಲಿವುಡ್​ನ ಜನಪ್ರಿಯ ನೃತ್ಯ ನಿರ್ದೇಶಕಿ ಸರೋಜ್​ ಖಾನ್​ ಅವರ ಸಾವಿನ ನೋವಿನಿಂದ ಇನ್ನೂ ಬಾಲಿವುಡ್​ ಚೇತರಿಸಿಕೊಂಡಂತೆ ಕಾಣುತ್ತಿಲ್ಲ. ಸರೋಜ್​ ಖಾನ್​ ನಿಧನರಾಗಿ ಮೂರು ದಿನಗಳಾದರೂ, ಬಾಲಿವುಡ್​ನ ಹಲವು ಸೆಲೆಬ್ರಿಟಿಗಳು ಕಂಬನಿ ಮಿಡಿಯುತ್ತಲೇ ಇದ್ದಾರೆ.

ಈ ಮಧ್ಯೆ, ಸರೋಜ್​ ಖಾನ್​ ಮತ್ತು ಶ್ರೀದೇವಿ ಅವರ ಫೇಮಸ್​ ಜಗಳದ ಬಗ್ಗೆ ಮತ್ತೊಮ್ಮೆ ಬಾಲಿವುಡ್​ನಲ್ಲಿ ಚರ್ಚೆಯಾಗುತ್ತಿದೆ. ಎಲ್ಲರಿಗೂ ಗೊತ್ತಿರುವಂತೆ ಶ್ರೀದೇವಿ ಮತ್ತು ಸರೋಜ್​ ಖಾನ್​ ಅವರು ಒಂದು ಕಾಲದಲ್ಲಿ ಬಹಳ ಆಪ್ತರಾಗಿದ್ದರು. ಆ ನಂತರ ಅವರಿಬ್ಬರ ಮಧ್ಯೆ ವೈಮನಸ್ಯ ಉಂಟಾಗಿ ಇಬ್ಬರೂ ದೂರಾಗಿದ್ದರು. ಮತ್ತೊಮ್ಮೆ ಅವರಿಬ್ಬರೂ ಒಂದಾದರೂ, ಹಿಂದಿನ ವೈಭವವನ್ನು ಸೃಷ್ಟಿಸುವುದಕ್ಕೆ ಇಬ್ಬರೂ ಸಾಧ್ಯವಾಗಲೇ ಇಲ್ಲ.

ಇದನ್ನೂ ಓದಿ: ಗುರುಪೌರ್ಣಮಿಯಂದು ದಿಗ್ಗಜರಿಗೆ ನಮನ ಸಲ್ಲಿಸಿದ ತಮನ್​

ಇಷ್ಟಕ್ಕೂ ಅವರಿಬ್ಬರ ಮಧ್ಯೆ ಜಗಳ ಆಗುವುದಕ್ಕೆ ಕಾರಣವೇನು? ಈ ಪ್ರಶ್ನೆ ಹಲವು ವರ್ಷಗಳಿಂದ ಇದ್ದೇ ಇದೆ. 80ರ ದಶಕದಲ್ಲಿ ಶ್ರೀದೇವಿ ಅವರ ಹಲವು ಚಿತ್ರಗಳಿಗೆ ಸರೋಜ್​ ಖಾನ್​ ನೃತ್ಯ ನಿರ್ದೇಶನ ಮಾಡಿದ್ದರು. ನಿಜ ಹೇಳಬೇಕೆಂದರೆ, ಶ್ರೀದೇವಿ ಅವರ ಯಶಸ್ಸಿನಲ್ಲಿ ಅವರ ಪಾತ್ರವೂ ದೊಡ್ಡದಿದೆ. ಏಕೆಂದರೆ, ಶ್ರೀದೇವಿಗೆ ಸಾಕಷ್ಟು ಜನಪ್ರಿಯತೆ ಮತ್ತು ಯಶಸ್ಸು ತಂದುಕೊಟ್ಟ 'ಮಿಸ್ಟರ್ ಇಂಡಿಯಾ' ಚಿತ್ರದ 'ಹವಾಹವಾಯಿ' ಹಾಡಿಗೆ ನೃತ್ಯ ಸಂಯೋಜಿಸಿದವರು ಅವರೇ.

ಯಾವಾಗ ಈ ಹಾಡು ಹಿಟ್​ ಆಯಿತೋ, ಆ ನಂತರ ಶ್ರೀದೇವಿ ಅಭಿನಯದ 'ಲಮ್ಹೆ', 'ನಗೀನಾ', 'ಚಾಂದಿನಿ' ಸೇರಿದಂತೆ ಹಲವು ಚಿತ್ರಗಳಿಗೆ ನೃತ್ಯ ಸಂಯೋಜಿಸಿದ್ದರು. ಹೀಗೆ ಪೀಕ್​ನಲ್ಲಿದ್ದ ಈ ಜೋಡಿ, ಒಂದು ಹಂತದಲ್ಲಿ ಜಗಳ ಮಾಡಿಕೊಂಡಿತು. ಅದಾಗಿ ಒಂದು ವರ್ಷದವರೆಗೂ ಶ್ರೀದೇವಿ ಆಗಲೀ, ಸರೋಜ್​ ಖಾನ್​ ಆಗಲೀ ಪರಸ್ಪರ ಮಾತಾಡಿರಲಿಲ್ಲವಂತೆ. ಆ ನಂತರ ಇಬ್ಬರೂ ವೈಮನಸ್ಯ ಮರೆತು ಹತ್ತಿರವಾದರಂತೆ.

ಎಲ್ಲಾ ಸರಿ, ಅವರಿಬ್ಬರೂ ಜಗಳವಾಡಿಕೊಂಡಿದ್ದು ಯಾಕೆ? ಈ ಪ್ರಶ್ನೆ ಎಲ್ಲರನ್ನೂ ಕಾಡುವುದು ಸಹಜ. ಸರೋಜ್​ ಖಾನ್​ ಅವರೇ ಸಂದರ್ಶನವೊಂದರಲ್ಲಿ ಹೇಳಿಕೊಂಡಂತೆ, ಅದಕ್ಕೆ ಕಾರಣ ಶ್ರೀದೇವಿ ಅವರ ಹಠವಾಗಿತ್ತಂತೆ. ಶ್ರೀದೇವಿ ಜತೆಜತೆಗೆ, ಬಾಲಿವುಡ್​ನ ಬೇರೆಬೇರೆ ನಾಯಕಿಯರಿಗೂ ಸರೋಜ್​ ಖಾನ್​ ನೃತ್ಯ ನಿರ್ದೇಶನ ಮಾಡುತ್ತಿದ್ದರು. ಅದರಲ್ಲೊಬ್ಬರು ಮಾಧುರಿ ದೀಕ್ಷಿತ್​. ಮಾಧುರಿ ಜನಪ್ರಿಯರಾಗಿದ್ದೇ, ಸರೋಜ್​ ಖಾನ್​ ನಿರ್ದೇಶಿಸಿದ್ದ 'ಏಕ್​ ದೋ ತೀನ್​ ...' ಹಾಡಿನಿಂದ.

ಇದನ್ನೂ ಓದಿ: ಕರೊನಾ ರಣಕೇಕೆ ಹಾಕುತ್ತಿರುವ ನಾಡಲ್ಲೇ ಅಕ್ಷಯ್​ ಕುಮಾರ್ ಸಿನಿಮಾ ಶೂಟಿಂಗ್​

'ತೇಜಾಬ್​' ಚಿತ್ರದ ಈ ಹಾಡು ಯಾವಾಗ ಸೂಪರ್​ ಹಿಟ್​ ಆಗಿ, ಯಾವಾಗಿ ಮಾಧುರಿ ಸಹ ಮುಂಚೂಣಿಗೆ ಬಂದರೋ, ಆಗ ಶ್ರೀದೇವಿಗೆ ಸಹಿಸಲಾಗಲಿಲ್ಲವಂತೆ. ಮಾಧುರಿಗೆ ತನಗಿಂತ ಒಳ್ಳೆಯ ನೃತ್ಯ ಮಾಡಿಸಿದರು ಎಂದು ಶ್ರೀದೇವಿಗೆ ಸರೋಜ್​ ಖಾನ್​ ಮೇಲೆ ಸಿಟ್ಟಿತ್ತಂತೆ. ಈ ವಿಷಯವನ್ನು ಕೇಳಿ ಬಹಳ ಬೇಸರಗೊಂಡಿದ್ದ ಸರೋಜ್​ ಖಾನ್​, ಶ್ರೀದೇವಿ ಜತೆಗೆ ಮಾತನಾಡುವುದೇ ಬಿಟ್ಟರಂತೆ.

ಕೊನೆಗೆ ಒಂದು ಹಂತದಲ್ಲಿ ಶ್ರೀದೇವಿಗೆ ತಾನು ಮಾಡಿದ ತಪ್ಪಿನ ಅರಿವಾಗಿದೆ. ಆ ನಂತರ ಸರೋಜ್​ ಖಾನ್​ ಜತೆಗೆ ಮಾತನಾಡಿ, ಎಲ್ಲವೂ ಸರಿ ಮಾಡಿಕೊಂಡಿದ್ದಾರೆ. ಆ ನಂತರ ಇಬ್ಬರೂ 'ಖುದಾ ಗವಾ', 'ಮಿಸ್ಟರ್​ ಬೇಚಾರಾ', 'ಜುದಾಯಿ' ಮುಂತಾದ ಚಿತ್ರಗಳಲ್ಲಿ ಜತೆಗೆ ಕೆಲಸ ಮಾಡಿದರೂ, ಹಿಂದಿನ ಮ್ಯಾಜಿಗ್​ ಮರುಸೃಷ್ಟಿಸುವುದಕ್ಕೆ ಸಾಧ್ಯವಾಗಲೇ ಇಲ್ಲ ಎನ್ನುವುದು ದುರಂತ.

https://www.vijayavani.net/mouni-roy-decides-to-treat-fans-with-her-stunning-candid-clicks/