ಕೇವಲ 15ನೇ ವಯಸ್ಸಿನಲ್ಲಿ ಹೃದಯಸ್ತಂಭನಕ್ಕೆ ಬಲಿಯಾದ ಖ್ಯಾತ ಬಾಲ ಕಲಾವಿದ! Cardiac Arrest

Cardiac Arrest : ಪಾಕಿಸ್ತಾನದ ಮನರಂಜನಾ ಉದ್ಯಮವನ್ನು ಆಘಾತಕ್ಕೆ ದೂಡುವಂತಹ ಹೃದಯವಿದ್ರಾವಕ ಘಟನೆಯೊಂದು ನಡೆದಿದೆ. ಕೇವಲ 15ನೇ ವಯಸ್ಸಿನಲ್ಲಿ ಪ್ರಖ್ಯಾತ ಬಾಲನಟ ಹೃದಯಸ್ತಂಭನದಿಂದ ಕೊನೆಯುಸಿರೆಳೆದಿದ್ದಾನೆ.

ಮೃತ ಬಾಲನಟನನ್ನು ಉಮರ್ ಶಾ ಎಂದು ಗುರುತಿಸಲಾಗಿದೆ. ಹೃದಯಸ್ತಂಭನಕ್ಕೆ ಮೃತಪಟ್ಟಿರುವುದಾಗಿ ಪಾಕ್​ ಮಾಧ್ಯಮ ಡಾನ್ ವರದಿ ಮಾಡಿದೆ. ತನ್ನ ನಗು ಮತ್ತು ಪರದೆಯ ಮೇಲಿನ ಆಕರ್ಷಕ ನಟನೆಯಿಂದಲೇ ಹೆಸರುವಾಸಿಯಾಗಿದ್ದ ಉಮರ್​, ಸೋಮವಾರ (ಸೆ.15) ಮುಂಜಾನೆ ತಮ್ಮ ತವರು ಡೇರಾ ಇಸ್ಮಾಯಿಲ್ ಖಾನ್‌ನಲ್ಲಿ ಕಾರ್ಡಿಯಾಕ್​ ಅರೆಸ್ಟ್​ನಿಂದ ನಿಧನರಾದರು.

ಕುಟುಂಬ ಮತ್ತು ವೈದ್ಯಕೀಯ ವರದಿಗಳ ಪ್ರಕಾರ, ಉಮರ್ ಸಿಕ್ಕಾಪಟ್ಟೆ ವಾಂತಿಯಿಂದ ಬಳಲುತ್ತಿದ್ದರು. ಇದರಿಂದ ಶ್ವಾಸಕೋಶಕ್ಕೆ ದ್ರವದ ಅಂಶ ಪ್ರವೇಶಿಸಿದ ಪರಿಣಾಮ ಹೃದಯ ಸಂಬಂಧಿ ಕಾಯಿಲೆಗೆ ಕಾರಣವಾಯಿತು ಎನ್ನಲಾಗಿದೆ. ಅಲ್ಲದೆ, ಉಮರ್​ ಮನೆಯಲ್ಲಿ ವಿಷಪೂರಿತ ಹಾವು ಪತ್ತೆಯಾದ ಈ ಹಿಂದಿನ ಘಟನೆಯನ್ನು ಸಹ ಡಾನ್​ ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಆದರೆ, ಉಮರ್​ ಸಾವಿಗೂ ಹಾವು ಪತ್ತೆಗೂ ಇರುವ ಸಂಬಂಧ ಇನ್ನೂ ಸ್ಪಷ್ಟವಾಗಿಲ್ಲ.

ಉಮರ್​ ಅವರ ಹಿರಿಯ ಸಹೋದರ ಅಹ್ಮದ್ ಶಾ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಸಾವಿನ ಸುದ್ದಿಯನ್ನು ಹಂಚಿಕೊಂಡಿದ್ದು, ಎಲ್ಲ ಅಭಿಮಾನಿಗಳು ಉಮರ್ ಆತ್ಮಕ್ಕೆ ಶಾಂತಿ ಸಿಗಲೆಂದು ಮತ್ತು ದುಃಖ ಸಮಯದಲ್ಲಿ ಕುಟುಂಬಕ್ಕಾಗಿ ಪ್ರಾರ್ಥಿಸುವಂತೆ ವಿನಂತಿಸಿದ್ದಾರೆ.

ಇದನ್ನೂ ಓದಿ: ರೇಬೀಸ್​… ಸಣ್ಣ ಗಾಯ ಉಸಿರನ್ನೇ ನಿಲ್ಲಿಸಿಬಿಡುತ್ತೆ ಏಕೆ? ನೀವಿದನ್ನು ತಿಳಿದುಕೊಳ್ಳಲೇಬೇಕು? Rabies

ನಮ್ಮ ಕುಟುಂಬದ ಪುಟ್ಟ ಹೊಳೆಯುವ ನಕ್ಷತ್ರ ಉಮರ್ ಶಾ, ಸರ್ವಶಕ್ತನಾದ ಅಲ್ಲಾಹನ ಬಳಿಗೆ ಮರಳಿದ್ದಾರೆ ಎಂದು ನಿಮಗೆ ತಿಳಿಸುತ್ತೇನೆ. ಎಲ್ಲರೂ ನಿಮ್ಮ ಪ್ರಾರ್ಥನೆಯಲ್ಲಿ ಉಮರ್​ ಅವರನ್ನು ಮತ್ತು ನಮ್ಮ ಕುಟುಂಬವನ್ನು ಸ್ಮರಿಸಬೇಕೆಂದು ನಾನು ವಿನಂತಿಸುತ್ತೇನೆ ಎಂದು ಅಹ್ಮದ್​ ಶಾ ಬರೆದಿದ್ದಾರೆ. ಇನ್ನು ಈ ಘಟನೆ​ ಕುಟುಂಬವನ್ನು ಕಾಡಿದ ಎರಡನೇ ದುರಂತವಾಗಿದೆ. ಈ ಹಿಂದೆ ಕಿರಿಯ ಸಹೋದರಿ ಆಯೇಷಾಳನ್ನು 2023ರ ನವೆಂಬರ್ ತಿಂಗಳಲ್ಲಿ ಕುಟುಂಬ ಕಳೆದುಕೊಂಡಿತು.

ಅಂದಹಾಗೆ, ಉಮರ್ ಸಾಮಾಜಿಕ ಜಾಲತಾಣದ ಸೆನ್ಸೇಷನ್ ಮತ್ತು ಕಿರುತೆರೆ ಲೋಕದ ಬಾಲನಟನಾಗಿ ಖ್ಯಾತಿ ಪಡೆದಿದ್ದರು. ಉಮರ್​ ಅವರು ತಮ್ಮ ಅಣ್ಣನ ಜೊತೆಗೆ ಪರದೆ ಹಂಚಿಕೊಂಡು ಮೋಡಿ ಮಾಡುವ ಮೂಲಕ ಪ್ರೇಕ್ಷಕರನ್ನು ಆಕರ್ಷಿಸಿದರು. ಈ ಜೋಡಿ 'ಜೀತೋ ಪಾಕಿಸ್ತಾನ್' ಮತ್ತು 'ಶಾನ್-ಎ-ರಂಜಾನ್' ನಂತಹ ಜನಪ್ರಿಯ ಕಾರ್ಯಕ್ರಮಗಳಲ್ಲಿ ಒಟ್ಟಿಗೆ ಕಾಣಿಸಿಕೊಳ್ಳುವ ಮೂಲಕ ಮನೆಮಾತಾಯಿತು. ಆಗಾಗ್ಗ ವೇಷಭೂಷಣಗಳನ್ನು ಧರಿಸುತ್ತಿದ್ದ ಈ ಜೋಡಿ ಮುಗ್ಧ ಹಾಸ್ಯ, ವೈರಲ್ ಆದ "ಪೀಚೆ ಟೌ ದೇಖೋ" ರೀಲ್ ಸೇರಿದಂತೆ ವಿವಿಧ ಮನರಂಜನೆಗಳ ಮೂಲಕ ಸಾಕಷ್ಟು ಅಭಿಮಾನಿಗಳನ್ನು ಸಂಪಾದಿಸಿದರು. ಇನ್ನು ಉಮರ್​ ಸಾವಿಗೆ ಪಾಕಿಸ್ತಾನದ ಸೆಲೆಬ್ರಿಟಿಗಳು ಸಂತಾಪ ಸೂಚಿಸುತ್ತಿದ್ದಾರೆ. (ಏಜೆನ್ಸೀಸ್​)

https://www.vijayavani.net/google-gemini-saree-trend-baffles-woman-with-mole-detail-internet-explains-it

https://www.vijayavani.net/these-are-the-zodiac-signs-that-absolutely-hate-marriage-do-you-know-why