ನನಗೆ ಗೊತ್ತು, ನಾನು ಹೆಚ್ಚು ದಿನ ಇರೋಲ್ಲ ... ಹಾಗಂತ ಕಂಗನಾ ಹೇಳಿದ್ದೇಕೆ?

ಸುಶಾಂತ್​ ಸಿಂಗ್​ ರಜಪೂತ್​ ಸಾವಿನ ನಂತರ ಕಂಗನಾ ರಣಾವತ್​ ಬಾಲಿವುಡ್​ ಮಾಫಿಯಾ ಬಗ್ಗೆ ಅಲ್ಲಿನ ಕಳ್ಳಾಟಗಳ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಳ್ಳುತ್ತಲೇ ಇದ್ದಾರೆ. ಸೋಷಿಯಲ್​ ಮೀಡಿಯಾದಲ್ಲಿ ಅವರ ಹೆಸರಿನಲ್ಲಿ ಅಕೌಂಟ್​ ಇಲ್ಲದಿದ್ದರೂ, ಟೀಮ್​ ಕಂಗನಾ ಹೆಸರಿನ ಒಂದು ಖಾತೆ ಇದೆ. ಅದು ಅವರ ಪ್ರಚಾರ ತಂಡದ ಖಾತೆ. ಈ ಖಾತೆಯ ಮೂಲಕ ಕಂಗನಾ ಇತ್ತೀಚೆಗೆ ಹಲವು ವಿಷಯಗಳನ್ನು ಹಂಚಿಕೊಳ್ಳುತ್ತಿದ್ದಾರೆ.

ಇದನ್ನೂ ಓದಿ: ನನಗೆ ರಾಜಕೀಯ ಸೇರುವ ಯೋಚನೆ ಇಲ್ಲ: ಕಂಗನಾ ರಣಾವತ್​

ಇತ್ತೀಚೆಗೆ ಬಾಲಿವುಡ್​ ಮಾಫಿಯಾ ಬಗ್ಗೆ ಸ್ವಲ್ಪ ಜಾಸ್ತಿಯೇ ಮಾತಾಡುತ್ತಿರುವ ಅವರು, ಹಲವರನ್ನು ಎದುರು ಹಾಕಿಕೊಂಡಿದ್ದಾರೆ. ಈಗ ಅದೇ ಕಾರಣಕ್ಕೆ, ತಮ್ಮ ಅಕೌಂಟ್​ ಸಸ್ಪೆಂಡ್​ ಆಗುವ ಸಾಧ್ಯತೆ ಇದೆ ಎಂಬ ಗುಮಾನಿ, ಕಂಗನಾ ಅವರಿಗಿದೆ. ಅಷ್ಟೇ ಅಲ್ಲ, ಬಾಲಿವುಡ್​ನಲ್ಲಿ ಒಂದು ವರ್ಗದ ಜನ ತಮ್ಮ ಖಾತೆ ಸಸ್ಪೆಂಡ್​ ಮಾಡಿಸುವುದಕ್ಕೆ ಸಂಚು ರೂಪಿಸುತ್ತಿದೆ ಎಂದು ಅವರಿಗೆ ಅನಿಸಿದೆ.

ಈ ಕುರಿತು ಅದೇ ಟೀಂ ಕಂಗನಾ ಅಕೌಂಟ್​ನಲ್ಲಿ ತಮ್ಮ ಅನುಮಾನ ವ್ಯಕ್ತಪಡಿಸಿರುವ ಅವರು, ಯಾವುದೇ ಕ್ಷಣದಲ್ಲಿ ಬೇಕಾದರೂ ತಮ್ಮ ಅಕೌಂಟ್​ ಸಸ್ಪೆಂಡ್​ ಆಗಬಹುದು ಎಂದು ಹೇಳಿದ್ದಾರೆ. ಅಲ್ಲಿಯವರೆಗೂ ತಾವು ಬಾಲಿವುಡ್​​ನ ಬಣ್ಣವನ್ನು ಬಯಲು ಮಾಡುತ್ತಲೇ ಇರುವುದಾಗಿ ಅವರು ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ನೀವು ನನ್ನ ಧ್ವನಿಯಾಗಿದ್ದೀರಾ, ನಾನು ನಿಮ್ಮ ಧ್ವನಿಗೆ ಮುಖವಾಗಿದ್ದೇನೆ.. ಬೇಗ ಬನ್ನಿ

ಈ ಕುರಿತು ಟ್ವೀಟ್​ ಮಾಡಿರುವ ಅವರು, 'ಬಾಲಿವುಡ್​ ಮಾಫಿಯಾ ಬಗ್ಗೆ ನಾನು ಮಾತನಾಡುತ್ತಿರುವುದು ನನ್ನ ಅನೇಕ ಸ್ನೇಹಿತರಿಗೆ ಸರಿ ಬರುತ್ತಿಲ್ಲ. ಅವರು ನನ್ನ ಅಕೌಂಟ್​ ಸಸ್ಪೆಂಡ್​ ಮಾಡಿಸುವುದಕ್ಕೆ ಎಲ್ಲಾ ತರಹದ ಪ್ರಯತ್ನಗಳನ್ನು ಮಾಡುತ್ತಿದ್ದಾರೆ. ನನಗೆ ಗೊತ್ತು, ಸೋಷಿಯಲ್​ ಮೀಡಿಯಾದಲ್ಲಿ ನಾನು ಹೆಚ್ಚು ದಿನ ಇರುವುದಿಲ್ಲ ಎಂದು. ಏಕೆಂದರೆ, ನನ್ನ ಅಕೌಂಟ್​ ಯಾವ ಕ್ಷಣ ಬೇಕಾದರೂ ಸಸ್ಪೆಂಡ್​ ಆಗಬಹುದು. ನನ್ನ ಮನಸ್ಸಿನ ಮಾತುಗಳನ್ನು ಹಂಚಿಕೊಳ್ಳುವುದಕ್ಕೆ ಇನ್ನೂ ಸಾಕಷ್ಟಿದೆ. ಎಲ್ಲಿಯವರೆಗೂ ನನ್ನ ಅಕೌಂಟ್​ ಇರುತ್ತದೋ, ಅಲ್ಲಿಯವರೆಗೂ ಅವರ ಬಣ್ಣ ಬಯಲು ಮಾಡುವುದಕ್ಕೆ ಪ್ರಯತ್ನ ಮಾಡುತ್ತೇನೆ' ಎಂದು ಕಂಗನಾ ಹೇಳಿದ್ದಾರೆ.

https://www.vijayavani.net/director-nishikant-kamat-passes-away/