ಭಾರತವು ವ್ಯಾಪಕವಾಗಿ ತೈಲ ಆಮದು ಮಾಡಿಕೊಳ್ಳುವ ಪ್ರಮುಖ ರಾಷ್ಟ್ರವಾಗಿದೆ. ಭಾರತದಲ್ಲಿ ಒಟ್ಟಾರೆಯಾಗಿ ಬಳಸಲಾಗುವ ಖಾದ್ಯ ತೈಲದ ಪೈಕಿ ಅರ್ಧಕ್ಕಿಂತಲೂ ಹೆಚ್ಚು ಪ್ರಮಾಣ ಆಮದು ಅವಲಂಬಿತ. ಭಾರತವು ಸಾಮಾನ್ಯವಾಗಿ ಮಲೇಷ್ಯಾ ಮತ್ತು ಇಂಡೋನೇಷ್ಯಾಗಳಿಂದ ತಾಳೆ ಎಣ್ಣೆ ಆಮದು ಮಾಡಿಕೊಳ್ಳುತ್ತದೆ. ಅರ್ಜೆಂಟಿನಾ ಮತ್ತು ಬ್ರೆಜಿಲ್ನಿಂದ ಸೋಯಾಬಿನ್ ಎಣ್ಣೆ ಖರೀದಿ ಮಾಡುತ್ತದೆ. ಕಳೆದೆರಡು ತಿಂಗಳುಗಳಲ್ಲಿ ವಿವಿಧ ಖಾದ್ಯ ತೈಲಗಳ ಜಾಗತಿಕ ಬೆಲೆಗಳು ಪ್ರತಿ ಟನ್ಗೆ 200-250 ಡಾಲರ್ನಷ್ಟು (16,356 ರಿಂದ 20,445 ರೂಪಾಯಿ) ಕಡಿಮೆಯಾಗಿದೆ. ಆದರೆ, ದೇಶದ ಚಿಲ್ಲರೆ ಮಾರುಕಟ್ಟೆಗಳಲ್ಲಿ ಈ ದರ ಇಳಿಕೆ ಪ್ರತಿಫಲಿಸಲು ಸ್ವಲ್ಪ ಕಾಲಾವಕಾಶ ಬೇಕಾಗುತ್ತದೆ. ಜಾಗತಿಕ ದರ ಇಳಿಕೆಗೆ ಅನುಗುಣವಾಗಿ ಲೆಕ್ಕಹಾಕಿದರೆ ಚಿಲ್ಲರೆ ಮಾರುಕಟ್ಟೆಯಲ್ಲಿ ಖಾದ್ಯ ತೈಲದ ಬೆಲೆ ಪ್ರತಿ ಲೀಟರ್ಗೆ 15ರಿಂದ 20 ರೂಪಾಯಿ ಇಳಿಕೆಯಾಗುವ ನಿರೀಕ್ಷೆ ಇದೆ. 2021-22 ಮಾರ್ಕೆಟಿಂಗ್ ವರ್ಷದಲ್ಲಿ (ನವೆಂಬರ್ನಿಂದ ಅಕ್ಟೋಬರ್ವರೆಗಿನ ವರ್ಷ) ಭಾರತದ ಖಾದ್ಯ ತೈಲ ಆಮದು ಪಾವತಿ ಮೊತ್ತವು 1.57 ಲಕ್ಷ ಕೋಟಿ ರೂಪಾಯಿಗೆ ತಲುಪಿತ್ತು. ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಶೇ. 6.85 ಪ್ರಮಾಣದಷ್ಟು ತೈಲವನ್ನು ಹೆಚ್ಚಾಗಿ ಖರೀದಿಸಲಾಗಿತ್ತು. ಆದರೆ, ಇದಕ್ಕೆ ಪಾವತಿಸಿದ ಮೊತ್ತವು ಶೇಕಡಾ 34ರಷ್ಟು ಹೆಚ್ಚಳವಾಗಿತ್ತು. ಇದು ಹೆಚ್ಚಿನ ಬೆಲೆ ನೀಡಿ ಖಾದ್ಯ ತೈಲ ಖರೀದಿ ಮಾಡಿರುವುದನ್ನು ಸೂಚಿಸುತ್ತದೆ. ಅಂತಿಮವಾಗಿ, ಗ್ರಾಹಕರೇ ಈ ಹೆಚ್ಚಳದ ಹೊರೆಯನ್ನು ಅನುಭವಿಸುವಂತಾಗಿತ್ತು.
