ಸ್ವಾಮಿ ನೀವು ದೇವರನ್ನು ನೋಡಿರುವಿರಾ? - ರಾಮಕೃಷ್ಣರು : ಮಗೂ, ಖಂಡಿತಾ ನೋಡಿರುವೆನು ಮತ್ತು ನಿನಗೂ ಪರಮಾತ್ಮನ ದರ್ಶನ ಮಾಡಿಸಬಲ್ಲೆ ಎಂದರು. ಈ ನುಡಿಗಳೇ ವೀರ ನರೇಂದ್ರನನ್ನು ಜಗದ್ವಿಖ್ಯಾತ ಸ್ವಾಮಿ ವಿವೇಕಾನಂದರನ್ನಾಗಿಸಿತು. ಯಾರಲ್ಲಿ ಅಂತಹ ಪವಿತ್ರ ಹೃದಯ, ಮನಸ್ಸು, ಅಂತಃಕರಣವಿದೆಯೋ ಅವರೆಲ್ಲರೂ ಸಹ ಭಗವದ್ ಸಾಕ್ಷಾತ್ಕಾರ ಮಾಡಿಕೊಳ್ಳಬಹುದು ಎಂದು ವೇದಾಂತ, ಉಪನಿಷತ್, ಪುರಾಣಗಳ ಹಿನ್ನೆಲೆಯಲ್ಲಿ ಇಡೀ ಜಗತ್ತಿಗೆ ತಿಳಿಸಿದರು. ಇದೇ ಅಲ್ಲವೇ ಪರಮಗುರುವಿನ ಲಕ್ಷಣ. ಪರಮಹಂಸರ ಪ್ರಕಾರ ಸಿಕ್ಕ ಸಿಕ್ಕವರೆಲ್ಲ ಗುರು ಆಗಲಾರರು. ಮರದ ದಿಮ್ಮಿ ತಾನೂ ತೇಲಿ ಹೋಗಬಹುದು, ಅನೇಕ ಜೀವಜಂತುಗಳನ್ನು ಹೊತ್ತುಕೊಂಡೂ ಹೋಗಬಲ್ಲದು. ಆದರೆ ಬೆಂಡಿನ ಮೇಲೆ ಹತ್ತಿ ಕುಳಿತರೆ, ಬೆಂಡೂ ಮುಳುಗಿ ಹೋಗುತ್ತದೆ, ಜೊತೆಯಲ್ಲಿ ಹತ್ತಿದವನೂ ಮುಳುಗಿಹೋಗುತ್ತಾನೆ. ಸಚ್ಚಿದಾನಂದನೇ ನಿಜವಾದ ಗುರು. ಈ ಮಹಾನ್ ತತ್ವವನ್ನು ಗುರುಪೂರ್ಣಿಮೆಯ ಹಿನ್ನೆಲೆಯಲ್ಲಿ ಅರಿಯಬಹುದಾಗಿದೆ.
