ಆಫ್ರಿಕಾದ 54 ದೇಶಗಳಲ್ಲಿ 40 ದೇಶಗಳ ಒಂದಲ್ಲ ಒಂದು ಪ್ರಮುಖ ಸರ್ಕಾರಿ ಕಟ್ಟಡಗಳನ್ನು ಚೀನೀಯರು ನಿರ್ವಿುಸಿದ್ದಾರೆ. ಇವುಗಳಲ್ಲಿ 24 ರಾಷ್ಟ್ರಾಧ್ಯಕ್ಷರ ಅಥವಾ ಪ್ರಧಾನಮಂತ್ರಿಗಳ ನಿವಾಸಗಳು ಹಾಗೂ ಕಾರ್ಯಾಲಯಗಳು, 26 ಸಂಸತ್ ಭವನಗಳು ಹಾಗೂ ಸಂಸದೀಯ ಕಾರ್ಯಾಲಯಗಳು, 32 ಮಿಲಿಟರಿ ಅಥವಾ ಪೊಲೀಸ್ ಕಾರ್ಯಾಲಯಗಳು ಸೇರಿವೆ. ಇವುಗಳಲ್ಲಿ ಕಿರೀಟಪ್ರಾಯದ್ದೆಂದರೆ ಇಥಿಯೋಪಿಯಾದ ಅಡಿಸ್ ಅಬಾಬಾದಲ್ಲಿ ಚೀನೀಯರು ‘ಗಿಫ್ಟ್’ ರೂಪದಲ್ಲಿ ಪುಕ್ಕಟೆಯಾಗಿ ಕಟ್ಟಿಕೊಟ್ಟಿರುವ ‘ಆಫ್ರಿಕನ್ ಯೂನಿಯನ್’ ಸಂಘಟನೆಯ ಮುಖ್ಯ ಕಚೇರಿ. ಆದರೆ ಈ ಕಚೇರಿಯಲ್ಲಿ ಚೀನೀಯರು ಬೇಹುಗಾರಿಕಾ ಸಾಧನಗಳನ್ನು ಗುಪ್ತವಾಗಿ ಎಲ್ಲೆಡೆ ಆಳವಡಿಸಿದ್ದುದು ಪತ್ತೆಯಾಗಿದೆ! ಅಂದರೆ ಆಫ್ರಿಕನ್ ನೇತಾರರು ಅಲ್ಲಿ ಸಭೆ ಸೇರಿದಾಗೆಲ್ಲ ಅಲ್ಲೇನು ನಡೆಯುತ್ತದೆಂದು, ಅವರ ನಡುವೆ ಏನು ಮಾತುಕತೆ ಆಗುತ್ತಿದೆಯೆಂದು ಚೀನಾಗೆ ತಕ್ಷಣ ತಿಳಿದುಹೋಗುತ್ತದೆ! ಆಫ್ರಿಕಾದಲ್ಲಿ ತಾನು ನಿರ್ವಿುಸಿರುವ ಪ್ರತಿಯೊಂದು ಸರ್ಕಾರಿ ಹಾಗೂ ಸೇನಾ ಕಟ್ಟಡಗಳನ್ನು ಚೀನಾ ತನ್ನ ಬೇಹುಗಾರಿಕೆಗೆ ಉಪಯೋಗಿಸಿಕೊಳ್ಳುತ್ತಿರುವ ಸಾಧ್ಯತೆ ಇದೆ ಎಂದು ‘ದ ಹೆರಿಟೇಜ್ ಫೌಂಡೇಷನ್’ನ ವರದಿಯೊಂದು ಹೇಳುತ್ತದೆ. ಇದು ಆಫ್ರಿಕಾದ ರಾಜಕೀಯ ವಲಯದಲ್ಲಿ ಚೀನಾದ ಬಗ್ಗೆ ನಿರಾಶೆ, ಅಪನಂಬಿಕೆ ಹಾಗೂ ರೋಷವನ್ನು ಉಂಟುಮಾಡಿದೆ. ಇದು ಸಾಕಾಗದು ಎಂಬಂತೆ ಸರ್ಕಾರಗಳ ಜತೆ ಸಾಮಾನ್ಯ ಆಫ್ರಿಕನ್ನರೂ ಚೀನಾ ಬಗ್ಗೆ ಅಸಹನೆ, ರೋಷದ ಭಾವನೆ ಬೆಳೆಸಿಕೊಳ್ಳಲು ಇತ್ತೀಚಿನ ಚೀನೀಯರ ವರ್ತನೆಗಳೇ ಪ್ರಚೋದಕಗಳಾಗಿವೆ.
