ನವದೆಹಲಿ: ಕರೊನಾ ಎರಡನೇ ಅಲೆ, ಮೂರನೇ ಅಲೆ ಜತೆಗೆ ಈಗ ಕರೊನಾ ಡೆಲ್ಟಾ ಪ್ಲಸ್ ಎಂಬ ಹೊಸ ಆತಂಕವೂ ಕಾಡುತ್ತಿದೆ. ಇದು ಅಧಿಕ ಸೋಂಕುಕಾರಕ ಎನ್ನಲಾಗುತ್ತಿದ್ದರೂ ಈ ಒಂದು ವರ್ಗದವರಂತೂ ಇದಕ್ಕೆ ಅಷ್ಟೇನೂ ಹೆದರಬೇಕಾಗಿಲ್ಲ. ಏಕೆಂದರೆ ಈಗಾಗಲೇ ಲಸಿಕೆ ಪಡೆದವರಿಗಿಂತಲೂ ಇವರಲ್ಲಿ ಡೆಲ್ಟಾ ಪ್ಲಸ್ ಸೋಂಕನ್ನು ಎದುರಿಸುವ ನಿಟ್ಟಿನಲ್ಲಿ ಹೆಚ್ಚಿನ ರೋಗನಿರೋಧಕ ಶಕ್ತಿ ಇರುತ್ತದೆ.
ಹೌದು.. ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್ (ಐಸಿಎಂಆರ್) ನಡೆಸಿದ ಅಧ್ಯಯನವೊಂದು ಈ ಅಂಶವನ್ನು ಕಂಡುಕೊಂಡಿದೆ. ಡೆಲ್ಟಾ ಪ್ಲಸ್ ಈಗಾಗಲೇ ಆಗಿರುವ ಕೋವಿಡ್ನ ಇತರ ರೂಪಾಂತರಗಳಿಗಿಂತಲೂ ಹೆಚ್ಚು ಹಾಗೂ ತೀವ್ರ ಸೋಂಕುಕಾರಕ. ಆದರೆ ಇದೊಂದು ಅಂಶ ಡೆಲ್ಟಾ ಪ್ಲಸ್ ವಿರುದ್ಧ ಹೆಚ್ಚಿನ ಸುರಕ್ಷೆ ನೀಡಲಿದೆ ಎಂದು ಅಧ್ಯಯನ ಹೇಳಿದೆ.
ಈ ಅಧ್ಯಯನದ ಫಲಿತಾಂಶ ಈಗಾಗಲೇ ಸೋಂಕಿಗೀಡಾಗಿ ಗುಣಮುಖರಾಗಿರುವವರಿಗೆ ಖುಷಿಯನ್ನು ನೀಡಲಿದೆ. ಏಕೆಂದರೆ ಒಂದು ಅಥವಾ ಎರಡೂ ಡೋಸ್ ಕೋವಿಶೀಲ್ಡ್ ಲಸಿಕೆ ಪಡೆದವರಿಗಿಂತಲೂ ಬರೀ ಒಂದು ಡೋಸ್ ಲಸಿಕೆ ಪಡೆದಿದ್ದರೂ ಈಗಾಗಲೇ ಒಮ್ಮೆ ಕೋವಿಡ್ನಿಂದ ಬಳಸಿ ಗುಣಮುಖರಾದವರು ಡೆಲ್ಟಾ ಪ್ಲಸ್ ಸೋಂಕನ್ನು ಹೆಚ್ಚು ಸಮರ್ಥವಾಗಿ ಎದುರಿಸಬಲ್ಲರು ಎಂಬುದನ್ನು ಈ ಅಧ್ಯಯನ ಕಂಡುಕೊಂಡಿದೆ. (ಏಜೆನ್ಸೀಸ್)