ಪವರ್ ಶೇರಿಂಗ್ ವಿಚಾರದಲ್ಲಿ ಗೊಂದಲ ಆಗಿರುವ ಕಾರಣ ಶಾಸಕಾಂಗ ಪಕ್ಷದ ಸಭೆಯಲ್ಲಿ ಚರ್ಚೆಯಾಗದೇ ಇದ್ದರೂ ಆ ವಿಚಾರದಲ್ಲಿ ಸಂದೇಶವೊಂದು ಬರಬಹುದೆಂದು ನಿರೀಕ್ಷೆ ಮಾಡಿದ್ದೆವು, ಅದು ಆಗಲಿಲ್ಲ. ಎಸ್ಸಿಎಸ್ಟಿ ಸಮಾವೇಶ ನಡೆಸುವ ಬಗ್ಗೆ ಕರೆದು ಮಾತನಾಡುತ್ತಾರೆ, ತಮ್ಮ ನಿಲುವು ಹೊರಹಾಕುತ್ತಾರೆಂದುಕೊಂಡಿದ್ದೆವು, ಅದೂ ಆಗಲಿಲ್ಲ ಎಂದು ಹಿರಿಯ ಶಾಸಕರು ಅಭಿಪ್ರಾಯಪಟ್ಟರು. ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಉಪಸ್ಥಿತಿಯಲ್ಲಿ ನಡೆಯುವ ಶಾಸಕಾಂಗ ಪಕ್ಷದ ಸಭೆಯಲ್ಲಿ ಸಾಕಷ್ಟು ಚರ್ಚೆಯಾಗುವಷ್ಟು ಮಹತ್ವ ಇರುತ್ತದೆ. ಇಲ್ಲಿ ಒಂದೂವರೆಗಂಟೆಗೆ ಮುಗಿಸಿದರೆ ಹೇಗೆ? ಕನಿಷ್ಠ ಅರ್ಧ ದಿನವಾದರೂ ನಡೆಯಬೇಕು. ವೇದಿಕೆಯಲ್ಲಿರುವವರೇ ಮುಕ್ಕಾಲು ತಾಸು ಮಾತನಾಡುತ್ತಾರೆ, ಚರ್ಚೆ ಮಾಡಲು ಶಾಸಕರು ಸಿದ್ಧರಿದ್ದರೂ ನಾಯಕರ ಮಾತು ಸ್ವೀಕರಿಸಲು ತಯಾರಿಲ್ಲ ಎಂದು ಪರಿಷತ್ನ ಹಿರಿಯ ಸದಸ್ಯರೊಬ್ಬರು ಬೇಸರ ಹೊರಹಾಕಿದ್ದಾರೆ.
