ನವದೆಹಲಿ: ಮಯಾನ್ ಕ್ಯಾಲೆಂಡರ್ ಪ್ರಕಾರ 2020ರ ಜೂನ್ 21ಕ್ಕೆ ಪ್ರಪಂಚವೇ ಕೊನೆಯಾಗುತ್ತೆ ಎಂಬ ವದಂತಿ ತೀವ್ರವಾಗಿ ಹರಡಲು ಆರಂಭಿಸಿದೆ.
ಇದಕ್ಕೂ ಮುನ್ನ 2012ರ ಡಿಸೆಂಬರ್ಗೆ ಪ್ರಳಯವಾಗಿ ಪ್ರಪಂಚವೇ ಕೊನೆಯಾಗುತ್ತೆ ಎಂದು ಹೇಳಲಾಗುತ್ತಿತ್ತು. ಇದಕ್ಕೂ ಮಯಾನ್ ಕ್ಯಾಲೆಂಡರ್ ಅನ್ನೇ ಉದಾಹರಣೆಯಾಗಿ ನೀಡಲಾಗುತ್ತಿತ್ತು.
ಆದರೆ, ಆ ಭವಿಷ್ಯದ ನುಡಿ ಸರಿಯಿರಲಿಲ್ಲ. ತಪ್ಪು ಗ್ರಹಿಕೆಯಿಂದಾಗಿ ಹಾಗೆ ಹೇಳಲಾಗಿತ್ತು. ಇದೀಗ ಸರಿಯಾಗಿ ಲೆಕ್ಕಾಚಾರ ಹಾಕಿ, ಪ್ರಪಂಚ ಕೊನೆಯಾಗುವ ದಿನವನ್ನು ನಿಖರವಾಗಿ ಗುರುತಿಸಲಾಗಿದೆ ಎಂದು ಹೇಳಲಾಗುತ್ತಿದೆ.
ಇದನ್ನೂ ಓದಿ: 70ರ ವೃದ್ಧೆ ತನ್ನ ಶತಾಯುಷಿ ತಾಯಿಯನ್ನು ಮಂಚದ ಮೇಲಿರಿಸಿ ಬ್ಯಾಂಕ್ಗೆ ಎಳೆದೊಯ್ದಿದ್ದು ಏಕೆ?
ಇದು 2020ನೇ ವರ್ಷವಾಗಿದ್ದರೂ, ಜೂಲಿಯನ್ ಕ್ಯಾಲೆಂಡರ್ ಪ್ರಕಾರ ಇದು 2012ನೇ ಇಸವಿಯಾಗಿದೆ ಎಂದು ಪೌಲೋ ಟ್ಯಾಗಲೋಗ್ಯುನ್ ಎಂಬ ವಿಜ್ಞಾನಿ ಸರಣಿ ಟ್ವೀಟ್ ಮಾಡಿದ್ದರು. ಇದಕ್ಕಾಗಿ ಅವರು ತಮ್ಮದೇ ಲೆಕ್ಕಾಚಾರವನ್ನೂ ನೀಡಿದ್ದರು.
ಅದರಂತೆ, ಗ್ರೆಗೋರಿಯನ್ ಕ್ಯಾಲೆಂಡರ್ ಪ್ರಕಾರ ಪ್ರತಿ ವರ್ಷದ ಬದಲಾವಣೆಯಲ್ಲಿ ನಾವು 11 ದಿನಗಳನ್ನು ಕಳೆದುಕೊಳ್ಳುತ್ತಿದ್ದೇವೆ. 1752ರಿಂದ 2020ರವರೆಗಿನ 268 ವರ್ಷಗಳೊಂದಿಗೆ 11 ಅನ್ನು ಗುಣಿಸಿದಾಗ 2948 ದಿನಗಳಾಗುತ್ತವೆ. ಈ 2948 ದಿನಗಳನ್ನು 365 ದಿನಗಳಿಂದ ಭಾಗಿಸಿದಾಗ 8 ವರ್ಷಗಳು ಉಳಿಯುತ್ತವೆ. ಇದನ್ನು 2020ರಿಂದ ಕಳೆದಾಗ 2012 ಬರುತ್ತದೆ ಎಂದು ಅವರು ತಮ್ಮ ಟ್ವೀಟ್ನಲ್ಲಿ ಪ್ರತಿಪಾದಿಸಿದ್ದರು.
ಇದೆಲ್ಲವನ್ನೂ ಲೆಕ್ಕ ಹಾಕಿ ಹೇಳುವುದಾದರೆ ಮಯಾನ್ ಕ್ಯಾಲೆಂಡರ್ನಲ್ಲಿ ಹೇಳಿರುವಂತೆ ಪ್ರಪಂಚ ಕೊನೆಯಾಗುವ ದಿನ 2020ರ ಜೂನ್ 21 ಆಗುತ್ತದೆ ಎಂದು ಹೇಳಿದ್ದರು. ಆದರೆ ಸಾಕಷ್ಟು ಟೀಕೆಗಳು ವ್ಯಕ್ತವಾಗಲು ಆರಂಭಿಸಿದ್ದರಿಂದ, ಅವರು ತಮ್ಮ ಸರಣಿ ಟ್ವೀಟ್ಗಳನ್ನು ಡಿಲೀಟ್ ಮಾಡಿದ್ದಾರೆ.